ଭୁବନେଶ୍ୱର: କୌଣସି ସଫଳତା ସଂଯୋଗବଶତଃ ମିଳେ ନାହିଁ। ଆକସ୍ମିକ ଭାବରେ ଲବ୍ଧ ସାଫଲ୍ୟ କ୍ଷଣସ୍ଥାୟୀ। କଠିନ ପରିଶ୍ରମ ଓ ସାଧନା ଜରିଆରେ ମିଳିଥିବା ସଫଳତା ଦୀର୍ଘସ୍ଥାୟୀ ଓ ଫଳପ୍ରଦ ହୋଇଥାଏ ବୋଲି ଡିଏଭି ପବ୍ଲିକ୍ ସ୍କୁଲ୍, ଚନ୍ଦ୍ରଶେଖରପୁରର ୩୪ତମ ପ୍ରତିଷ୍ଠା ଦିବସ ସମାରୋହରେ ଅଭିଭାଷଣ ପ୍ରଦାନ କରି ବିଶିଷ୍ଟ ବୈଜ୍ଞାନିକ ପଦ୍ମଶ୍ରୀ ଆଦିତ୍ୟ ପ୍ରସାଦ ଦାଶ ମତପ୍ରକାଶ କରିଛନ୍ତି।
ଏସିଆନ୍ ଇନ୍ଷ୍ଟିଚ୍ୟୁଟ୍ ଅଫ ପବ୍ଲିକ୍ ହେଲ୍ଥର ଭାଇସ୍-ଚାନସେଲର୍ ପ୍ରଫେସର ଦାଶ ମହାଭାରତ ଠାରୁ ଆରମ୍ଭ କରି ସମସାମୟିକ ଘଟଣାବଳୀରୁ ଏକାଧିକ ଉଦାହରଣ ଦେଇ ଛାତ୍ରଛାତ୍ରୀଙ୍କୁ କୃତସଂକଳ୍ପ ଭାବରେ ଲକ୍ଷ୍ୟହାସଲ ଦିଗରେ ଆଗେଇଯିବାକୁ ପରାମର୍ଶ ଦେଇଥିଲେ । ବିଦ୍ୟାଳୟକୁ ଜାତୀୟ ଚରିତ୍ରର ଦର୍ପଣ ସହ ତୁଳନା କରି ପ୍ରଫେସର ଦାଶ ଏହା ସତତ ସ୍ୱଚ୍ଛ ଓ ସମୁଜ୍ଜ୍ୱଳ ହେବା ଉଚିତ ବୋଲି କହିଥିଲେ।
ବିଦ୍ୟାଳୟର ଚେୟାରମ୍ୟାନ ଶରତ ଚନ୍ଦ୍ର ମିଶ୍ରଙ୍କ ପୌରୋହିତ୍ୟରେ ସମାହିତ ଏହି ମନୋଜ୍ଞ ଉତ୍ସବରେ ଡିଏଭି ଆଞ୍ଚଳିକ ନିର୍ଦ୍ଦେଶକ ଡ. କେ.ସି. ଶତପଥୀ, ମାଡାମ୍ ଦାଶ, ଡିଏଭି କଳିଙ୍ଗନଗର ଚେୟାରମ୍ୟାନ୍ ମଦନମୋହନ ପଣ୍ଡା, ଡିଏଭି ୟୁନିଟ୍-୮ ଚେୟାରମ୍ୟାନ୍ ବିଜୟ ପଟ୍ଟନାୟକ, ଡିଏଭି ସହକାରୀ ଆଞ୍ଚଳିକ ଅଧିକାରୀଗଣ ଡ. ସୁଜାତା, ଏ. କେ. ଭୋଇ, ଈପ୍ସିତା ଦାସ, ଡିଏଭି ଅନୁଷ୍ଠାନସମୂହର ଅଧ୍ୟକ୍ଷଅଧ୍ୟକ୍ଷା ଅତିଥିରୂପେ ମଞ୍ଚାସୀନ ଥିଲେ। ଇତ୍ୟବସରରେ, ବିଦ୍ୟାଳୟର ପରୀକ୍ଷାଫଳ ଟାବ୍ଲଏଡ୍ ‘ଇପୋକ’ ଉନ୍ମେଚିତ ହୋଇଥିଲା।
ବିଦ୍ୟାଳୟର ଭାରପ୍ରାପ୍ତ ଅଧ୍ୟକ୍ଷା ଇନ୍ଦିରା ଭଟ୍ଟାଚାର୍ଯ୍ୟ ବିଦ୍ୟାଳୟର ସାଫଲ୍ୟମଣ୍ଡିତ ବିବରଣୀ ଉପସ୍ଥାପନ କରିବାସହ ଆନୁଷ୍ଠାନିକ ଧନ୍ୟବାଦ ଅର୍ପଣ କରିଥିଲେ। ଛାତ୍ରଛାତ୍ରୀଙ୍କ ଦ୍ୱାରା ପରିବେଷିତ ନୃତ୍ୟସଂଗୀତ ଭିତ୍ତିକ କାର୍ଯ୍ୟକ୍ରମ ‘ଏଇ ଆମ ରତ୍ନମଣ୍ଡପ’, ଲୋକନୃତ୍ୟ ‘ମାଟି ଆମର ମାଆ’, ସୁସ୍ଥ ଶରୀର ଓ ମନ ପାଇଁ ଯୋଗାସନ ପ୍ରଦର୍ଶନ ଆଦି ଅତ୍ୟନ୍ତ ଚିତ୍ତାକର୍ଷକ ହୋଇଥିଲା। ନିରବଚ୍ଛିନ୍ନ ୨୫ବର୍ଷ ସେବା ପ୍ରଦାନ କରିଥିବା ଶିକ୍ଷକ ଓ କର୍ମଚାରୀଙ୍କୁ ଅତିଥିଗଣ ସମ୍ବର୍ଦ୍ଧିତ କରିଥିଲେ।
ପୂର୍ବାହ୍ଣରେ, ଡିଏଭି ଆଞ୍ଚଳିକ ନିର୍ଦ୍ଦେଶକ ଡ. କେ.ସି. ଶତପଥୀଙ୍କ ପୌରୋହିତ୍ୟରେ ବୈଦିକ ଯଜ୍ଞାନୁଷ୍ଠାନ ଆୟୋଜିତ ହୋଇଥିଲା। ଶିକ୍ଷକ ଲକ୍ଷ୍ମୀଧର ରାଉତରାୟ, ଈଶା ଶତପଥୀ, ସି.ଜ୍ୟୋତି ପ୍ରମୁଖ କାର୍ଯ୍ୟକ୍ରମ ସଂଯୋଜନା କରିଥିଲେ। ଛାତ୍ରଛାତ୍ରୀ, ଅଭିଭାବକ, ଆମନ୍ତ୍ରିତ ଅତିଥିଗଣ ବହୁସଂଖ୍ୟାରେ ସମୁଦାୟ କାର୍ଯ୍ୟକ୍ରମ ଉପଭୋଗ କରିଥିଲେ।