ସୀତାରାମ ଅଗ୍ରୱାଲ
ଚିଲିକା: ଦିନକୁ ଦିନ ସୋସିଆଲ୍ ମିଡିଆ ତାର କାୟାବିସ୍ତାର କରିବାରେ ଲାଗିଛି। ଯାହାଫଳରେ ସାଧାରଣ ଜନତା ସୋସିଆଲ ମିଡିଆକୁ ପ୍ରାଧାନ୍ୟ ଦେଉଛନ୍ତି। ଟ୍ଵିଟର, ଫେସବୁକ ଅବା ହ୍ଵାଟ୍ସଆପ ଜରିଆରେ କୋଣ ଅନୁକୋଣରୁ ସମସ୍ତ ସୂଚନା ସାଙ୍ଗକୁ ଦୁନିଆର ଖବର କ୍ଷଣିକ ମଧ୍ୟରେ ଏବେ ପ୍ରତିଟି ଲୋକ ପାଖରେ ପହଞ୍ଚି ପାରୁଛି।
ଖୋର୍ଦ୍ଧା ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ସରକାରଙ୍କ ୫-ଟି ନିୟମକୁ ପ୍ରାଧାନ୍ୟ ଦେବାସହ ଜିଲ୍ଲାର ପ୍ରତ୍ୟେକ ଦିନର କାର୍ଯ୍ୟକ୍ରମ ତଥା ଉନ୍ନୟନମୂଳକ କାର୍ଯ୍ୟର ତଥ୍ୟ ଟ୍ୱିଟରରେ ଅପଡେଟ କରୁଥିବାବେଳେ କିନ୍ତୁ ତଳସ୍ତରରେ ତାହା କାର୍ଯ୍ୟକାରୀ ହେଉନାହିଁ। ବର୍ଷ ବର୍ଷ ଧରି ବିଭିନ୍ନ ଗୁରୁତ୍ୱପୂର୍ଣ କାର୍ଯ୍ୟାଳୟର ଟ୍ୱିଟର ହ୍ୟାଣ୍ଡେଲରୁ କୌଣସି ତଥ୍ୟ ଅପଡେଟ କରାଯାଉନାହିଁ।
ଟ୍ୱିଟର ଜରିଆରେ ଜନସାଧାରଣଙ୍କ ଅଭିଯୋଗକୁ ଗ୍ରହଣ ଏବଂ ସମାଧାନ ଦିଗରେ ସମସ୍ତ ବିଭାଗ କାର୍ଯ୍ୟ କରିବେ ବୋଲି ସରକାରୀ ନିର୍ଦ୍ଦେଶଥିବା ବେଳେ ଚିଲିକା ତହସିଲ ଓ ବ୍ଲକ କାର୍ଯ୍ୟାଳୟରେ ଏହାର ବ୍ୟତିକ୍ରମ ଦେଖିବାକୁ ମିଳିଛି।
ଉକ୍ତ ଦୁଇ କାର୍ଯ୍ୟାଳୟର ଟ୍ୱିଟର ହ୍ୟାଣ୍ଡେଲ ଏକପ୍ରକାର ନିଷ୍କ୍ରିୟ ହୋଇପଡିଛି। ତହସିଲ ଓ ବ୍ଲକ ପ୍ରଶାସନ ତରଫରୁ ଟ୍ୱିଟର ଆକାଉଣ୍ଟରେ କୌଣସି ତଥ୍ୟ ବା ପ୍ରସ୍ତାବ ଅପଡେଟ୍ କରାଯାଉ ନାହିଁ, ଯାହା ଫଳରେ ଫଲୋଅରଙ୍କ ସଂଖ୍ୟା ବଢୁନାହିଁ। ଏହା ସହ ପ୍ରଶାସନିକ ଅଧିକାରୀମାନେ ମଧ୍ୟ ନିଜ ନିଜ ବିଭାଗର ଟୁଇଟର ଆକାଉଣ୍ଟରେ କୌଣସି ପ୍ରକାର ସୂଚନା ପୋଷ୍ଟ କରୁନାହାଁନ୍ତି, ଯାହାକୁ ନେଇ ବୁଦ୍ଧିଜିବୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ଏପରିକି ଜନସାଧାରଣ ଟ୍ୱିଟରରେ ବାରମ୍ବାର ବିଭିନ୍ନ ବିଷୟରେ ଅଭିଯୋଗ କରୁଥିବା ବେଳେ ସ୍ଥାନୀୟ ପ୍ରଶାସନର ଉକ୍ତ ଅଭିଯୋଗଗୁଡିକ ଉପରେ କୌଣସି ପ୍ରତିକ୍ରିୟା ମିଳୁନାହିଁ। ଗୋଟେ ପକ୍ଷରେ ଜିଲ୍ଲାପାଳ ଖୋଦ ଟ୍ୱିଟରରେ ଜନସାଧାରଣଙ୍କ ଅଭିଯୋଗ ଉପରେ ଗୁରୁତ୍ୱ ଦେବା ସହ ତାହାକୁ ସମାଧାନ କରିବା ପାଇଁ ଧ୍ୟାନ ଦେଉଥୁବା ବେଳେ ଅନ୍ୟପକ୍ଷରେ ସ୍ଥାନୀୟ ପ୍ରଶାସନ ଜିଲ୍ଲାପାଳଙ୍କ ଏହି ନିର୍ଦ୍ଦେଶକୁ ଫୁ କରି ଉଡ଼ାଇଦେଉଛି।
ବର୍ଷେ ପୂର୍ବେ ବଦଳି ହୋଇଥିବା ଚିଲିକା ବିଡ଼ିଓ ସୁଷମା ବାରିକଙ୍କ ଫୋଟୋ ଅଦ୍ୟାବଧି ଚିଲିକା ବିଡ଼ିଓଙ୍କ ଅଫିସିଆଲ ଟ୍ୱିଟର ଆକାଉଣ୍ଟରେ ଥିବା ବେଳେ ବର୍ଷ ବର୍ଷ ଧରି ସେଥିରେ କୌଣସି ଅପଡେଟ ଦିଆଯାଉନାହିଁ।
ସେହିପରି ଭାବେ ଦୁଇ ବର୍ଷ ପୂର୍ବେ ଚିଲିକା ତହସିଲଦାର ଥିବା ପୁନମ ମହାପାତ୍ରଙ୍କ ଶେଷ ଅପଡେଟ ପରେ ଅଫିସିଆଲ ଚିଲିକା ତହସିଲ ଆକାଉଣ୍ଟରେ କୌଣସି ଅପଡେଟ ହେଉନାହିଁ। ଫଳରେ ଜନସାଧାରଣ ଏବଂ ବୁଦ୍ଧିଜୀବୀ ସରକାରଙ୍କ ବିଭିନ୍ନ ଉନ୍ନୟନ ଯୋଜନାର ସଫଳ ରୂପାୟନ ବିଷୟରେ ସୂଚନା ପାଇପାରୁନାହାନ୍ତି ଏବଂ ବିଭିନ୍ନ ଅଭିଯୋଗର ସମାଧାନ ଟ୍ୱିଟର ମାଧ୍ୟମରେ ପାଇପାରୁନାହାନ୍ତି।
ତେବେ ବାଣପୁର ବ୍ଲକ, ତହସିଲ, ଏନଏସି ଏବଂ ବାଲୁଗାଁ ଏନଏସି ଆଦିର ଅଫିସିଆଲ ଟ୍ୱିଟର ଆକାଉଣ୍ଟରେ ନିୟମିତ ବ୍ୟବଧାନରେ ନହେଲେ ମଧ୍ୟ ସମୟ ସମୟରେ ବିଭିନ୍ନ ଅପଡେଟ ପୋଷ୍ଟ କରାଯାଉଛି। ଉକ୍ତ ବିଷୟକୁ ଖୋର୍ଦ୍ଧା ଜିଲ୍ଲାପାଳ ଗୁରୁତ୍ୱ ଦେବାପାଇଁ ସାଧାରଣରେ ଦାବି ହେଉଛି।