ପୁରୀ: ପୁରୀ ଟାଉନ ଥାନାଧିକାରୀ ସୁନୀଲ ପ୍ରଧାନ ପୁଣିଥରେ ମାନବିକତା ଦେଖାଇଛନ୍ତି। ଜଣେ ଅସହାୟ ବ୍ୟକ୍ତିଙ୍କ ଶବକୁ ଥାନାଧିକାରୀ ଶ୍ରୀ ପ୍ରଧାନ ସସମ୍ମାନେ ସ୍ୱର୍ଗଦ୍ୱାରରେ ଦାହ ସତ୍କାର କରିଛନ୍ତି।
ସୂଚନା ମୁତାବକ ଟାଉନ ଥାନା ବାଲିସାହିର ଗୋପାଳ ବେଗ (୫୬) ନାମକ ଜଣେ ଅସହାୟ ବ୍ୟକ୍ତି ଯିଏକି ଶ୍ରୀ ମନ୍ଦିର ଉତ୍ତରଦ୍ୱାରରେ କଦଳୀ ପତ୍ର ବିକି ଗୁଜୁରାଣ ମେଣ୍ଟାଉଥିଲେ, ଆଜି ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଥିଲେ। କିନ୍ତୁ ଦୁଃଖର ବିଷୟ ଗୋପାଳଙ୍କ ଶବ ସତ୍କାର ନିମନ୍ତେ ତାଙ୍କ ପରିବାରବର୍ଗ ଅମଙ୍ଗ ହୋଇଥିଲେ।
ଉକ୍ତ ଖବର ଟାଉନ ଥାନାଧିକାରୀ ପାଇ ସଙ୍ଗେସଙ୍ଗେ ଗୋପାଳଙ୍କ ଶବ ସତ୍କାର ପାଇଁ ଅଣ୍ଟା ଭିଡ଼ିଥିଲେ। ପରିଶେଷରେ ଥାନାଧିକାରୀଙ୍କ ସମେତ ଅଞ୍ଚଳର ଅନ୍ୟ ୩ ଭଦ୍ରବ୍ୟକ୍ତି ଗୋପାଳଙ୍କ ଶବକୁ ପୁରୀ ସ୍ୱର୍ଗଦ୍ୱାରରେ ସସମ୍ମାନେ ସତ୍କାର କରାଇଥିଲେ।
ଟାଉନ ଥାନାଧିକାରୀଙ୍କ ନେତୃତ୍ୱରେ ସମସ୍ତ କାର୍ଯ୍ୟ ସମ୍ପାଦନ ହୋଇଥିଲା। ଉକ୍ତ କାର୍ଯ୍ୟକୁ ପୁରୀ ଅଂଚଳବାସି ଉଚ୍ଚ ପ୍ରଶଂସା କରିଛନ୍ତି।
