ବାଣପୁର (ସୀତାରାମ ଅଗ୍ରୱାଲ): ବେଆଇନ ଦେଶୀ ମଦ କାରବାରକୁ ନେଇ ସାରା ରାଜ୍ୟରେ ତାତି ଧରିଥିବା ବେଳେ ଅବକାରୀ ମନ୍ତ୍ରୀଙ୍କ ନିର୍ଦ୍ଦେଶ ମୁତାବକ ସାରା ରାଜ୍ୟରେ ଅବକାରୀ ବିଭାଗ ଦ୍ୱାରା ଧରପଗଡ ଜାରି ରହିଛି। ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଅବକାରୀ ଓ ପୋଲିସ ମିଳିତ ଚଢ଼ାଉ କରି ହଜାର ହଜାର ଲିଟର ପୋଚ ଓ ଦେଶୀ ମଦ ନଷ୍ଟ କରିଛି।
ବାଣପୁର ଅତିରିକ୍ତ ତହସିଲଦାର ସାହୀନ ନାଜଙ୍କ ଉପସ୍ଥିତିରେ ବାଣପୁର ଥାନା ଶାଳିଆ ଡ୍ୟାମ ଜଙ୍ଗଲ ଅଞ୍ଚଳ ଏବଂ ଦାଶରଥୀପୁର ଗ୍ରାମ କେନାଲ ପାର୍ଶ୍ୱ ଅଞ୍ଚଳରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ସମୁଦାୟ ୧୭ ହଜାର ଲିଟର ପୋଚ ଏବଂ ୧୧୬୦ ଲିଟର ଦେଶୀ ମଦ ଜବତ କରାଯାଇ ନଷ୍ଟ କରିଦିଆଯାଇଛି।
ଉକ୍ତ ଚଢ଼ାଉରେ ଖୋର୍ଦ୍ଧା ଜିଲ୍ଲା ଅବକାରୀ ମୋବାଇଲ ୟୁନିଟ, ଟାଙ୍ଗୀ ରେଞ୍ଜ ଅବକାରୀ ଅଧିକାରୀ, ବାଲୁଗାଁ ଅବକାରୀ ଅଧିକାରିଣୀ, ବାଣପୁର ପୋଲିସ ଏବଂ ଏପିଆର ଫୋର୍ସ ସାମିଲ ଥିଲେ।