ରଣପୁର: ଓଡ଼ିଶା ମାଧ୍ୟମିକ ଶିକ୍ଷା ବୋର୍ଡ ଦ୍ୱାରା ପ୍ରକାଶିତ ୨୦୨୫ ମାଟ୍ରିକ ପରୀକ୍ଷା ଫଳାଫଳରେ ରଣପୁର ବ୍ଲକର ବିଜ୍ଞାପିତ ପରିଷଦ ହରଚଣ୍ଡୀ ସାହି ର ମେଧାବୀ ଛାତ୍ର ଆଦିତ୍ୟ ପ୍ରସାଦ ପତି ୫୬୦ ନମ୍ବର ରଖି ରଣପୁର ବ୍ଲକ ମଧ୍ୟରେ ଶୀର୍ଷ ସ୍ଥାନ ହାସଲ କରିଛନ୍ତି। ସେ ତାଙ୍କ ଦୃଢ଼ ପ୍ରତିବଦ୍ଧତା, କଠିନ ପରିଶ୍ରମ ଏବଂ ଅଭିଭାବକ ଓ ଶିକ୍ଷକଶିକ୍ଷୟତ୍ରୀଙ୍କ ସହଯୋଗ ଦ୍ୱାରା ଏହି ସଫଳତା ଅର୍ଜନ କରିପାରିଛନ୍ତି।
ଏହି ବର୍ଷ ରଣପୁର ବ୍ଲକରୁ ମୋଟ ୯ ଜଣ ଛାତ୍ରଛାତ୍ରୀ ଏ-୧ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି। ରାମଚଣ୍ଡୀ ସରକାରୀ ଉଚ୍ଚ ବିଦ୍ୟାଳୟର ବିଷ୍ନୁପ୍ରିୟା ସାହୁ ୫୫୮ ନମ୍ବର ଓ ଆୟୁଷ୍ମାନ ସାହୁ ୫୪୭ ନମ୍ବର, ଗୋପାଳପୁର ପଞ୍ଚାୟତ ସରକାରୀ ଉଚ୍ଚ ବିଦ୍ୟାଳୟର ଶୁଭସ୍ମିତା ବରାଡ଼ ୫୫୦ ନମ୍ବର ଓ ବିଶ୍ୱଜିତ ସାହୁ ୫୪୭ ନମ୍ବର, ବ୍ରଜରାଜପୁର ପଞ୍ଚାୟତ ଉଚ୍ଚ ବିଦ୍ୟାଳୟର ରୁଦ୍ର ପ୍ରତାପ ମହାପାତ୍ର ୫୪୪ ନମ୍ବର, ଅଡାଲ ଶଙ୍କର୍ଷଣ ବିଦ୍ୟାପୀଠ ର ସ୍ନେହଲତା ମୁଦୁଲି ୫୪୫ ନମ୍ବର ଓ ଶୁଭମ ବରାଡ଼ ୫୪୦ ନମ୍ବର, ମଝିଆଖଣ୍ଡ ରଘୁନାଥ ନୋଡାଲ ଉଚ୍ଚ ବିଦ୍ୟାଳୟ ଅଶ୍ୱିନ ପ୍ରିୟ ଦର୍ଶିନୀ ୫୪୧ ନମ୍ବରରଖି ଏ-୧ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି। ବିଭିନ୍ନ ବିଦ୍ୟାଳୟର ଶିକ୍ଷକମାନେ ଏହି ସଫଳତା ପାଇଁ ଛାତ୍ରଛାତ୍ରୀମାନଙ୍କୁ ଅଭିନନ୍ଦନ ଜଣାଇଛନ୍ତି ଓ ଭବିଷ୍ୟତରେ ଆଉ ଭଲ କରିବାକୁ ଉତ୍ସାହିତ କରିଛନ୍ତି।
ଏହି ଅବସରରେ ଆଦିତ୍ୟଙ୍କ ଅଭିଭାବକ ତାଙ୍କ ସନ୍ତାନଙ୍କ ସଫଳତା ଉପରେ ଗର୍ବିତ ଓ ଆନନ୍ଦିତ ଅନୁଭବ କରୁଛନ୍ତି। ଗ୍ରାମବାସୀ ମଧ୍ୟ ଏହି ସଫଳତାକୁ ଉତ୍ସବ ଭାବରେ ଅନୁଭବ କରୁଛନ୍ତି। ଜିଲ୍ଲା ଶିକ୍ଷା ଅଧିକାରୀ ଚିତ୍ତ ରଞ୍ଜନ ପାଣ୍ଡେ, ବ୍ଲକ ଶିକ୍ଷା ଅଧିକାରୀ ପିଣ୍ଟୁ କୁମାର ପ୍ରଧାନ, ବିଦ୍ୟାଳୟ ଶିକ୍ଷକ ଶିକ୍ଷୟତ୍ରୀ ଓ ସମ୍ପୂର୍ଣ୍ଣ ଶିକ୍ଷା ପରିବାର ଏହି ସଫଳ ଛାତ୍ରଛାତ୍ରୀମାନଙ୍କୁ ଅଭିନନ୍ଦନ ଜଣାଇଛନ୍ତି।
