ବାଣପୁର: ବାଣପୁର ତାଲୁକ ଆଇନ ସେବା ସମିତି ପକ୍ଷରୁ ସ୍ଥାନୀୟ ଶ୍ରୀ ଅରବିନ୍ଦ ସ୍କୁଲ ଏଫ ଇଣ୍ଟେଗ୍ରାଲ ଏଜୁକେସନ ପରିସରରେ ଅନ୍ତର୍ଜାତୀୟ ମହିଳା ଦିବସ ପାଳିତ ହୋଇଯାଇଛି। ଏହି ଅବସରରେ ଏକ ଆଇନ ସଚେତନତା ସଭାର ଆୟୋଜନ ହୋଇଥିଲା। ତାଲୁକ ଆଇନ ସେବା ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ର ଉକ୍ତ ସଭାରେ ଅଧ୍ୟକ୍ଷତା କରିଥିବାବେଳେ ,ବିଦ୍ୟାଳୟ ପ୍ରଧାନ ଶିକ୍ଷକ ସଞ୍ଜୟ କୁମାର ଦାସ ଯୋଗ ଦେଇଥିଲେ। ପ୍ରାକ ଗର୍ଭଧାରଣ ଓ ପ୍ରାକ ପ୍ରସୂତି ଲିଙ୍ଗ ଚୟନ ନିଦାନ କୌଶଳ ଅଧିନିୟମ, ଘରୋଇ ହିଂସା ଅଧିନିୟମ, ପୋକସୋ ଆଇନ,ବାଲ୍ୟ ବିବାହ ନିଷେଧ ଅଧିନିୟମ,ଯୌତୁକ ନିରୋଧ ଆଇନ, ଲିଙ୍ଗଗତ ସମ୍ମାନତା ଆଦି ବିଷୟରେ ବିଚାରପତି ଶ୍ରୀ ମହାପାତ୍ର ଉପସ୍ଥିତ ଛାତ୍ରଛାତ୍ରୀଙ୍କୁ ଅବଗତ କରାଇଥିଲେ।
ଚଳିତ ବର୍ଷ ‘ଅନ୍ତର୍ଜାତୀୟ ମହିଳା ଦିବସ’ର ବିଷୟବସ୍ତୁ ଥିଲା ‘ଦିଅ ଏବଂ ପାଅ’। ଏହି ବିଷୟରେ ମାନ୍ୟବର ବିଚାରପତି ଅବଗତ କରାଇ କହିଥିଲେ ଯେ, “ଭାରତର ନାରୀମାନଙ୍କୁ ଶିକ୍ଷା ଓ ସୁରକ୍ଷା ପ୍ରଦାନ କଲେ, ତାହା ବଦଳରେ ସେମାନେ ଏକ ସୁନ୍ଦର ସମାଜ ଗଠନ କରିବା ଦିଗରେ ସହଯୋଗ କରିବେ। ତେଣୁ ସେମାନେ ଶିକ୍ଷା, ସୁରକ୍ଷା ଓ ନିଜ ଅଧିକାର କିପରି ପାଇପାରିବେ, ସେ ଦିଗରେ ଆମେ ସମସ୍ତେ ଯତ୍ନବାନ ହେବା ଉଚିତ।” ତେବେ ମୁଖ୍ୟ ଅତିଥିଙ୍କ ଠାରୁ ବହୁମୂଲ୍ୟ ତଥ୍ୟ ଗ୍ରହଣ କରି ଛାତ୍ରଛାତ୍ରୀ ମାନେ ବେଶ ଖୁସି ଅନୁଭବ କରିଥିଲେ। ପରିଶେଷରେ ବିଦ୍ୟାଳୟ ପ୍ରଧାନ ଶିକ୍ଷକ ଶ୍ରୀ ଦାସ ଧନ୍ୟବାଦ ପ୍ରଦାନ କରିଥିଲେ।