ସମୀକ୍ଷା ବ୍ୟୁରୋ
ବାଲୁଗାଁ, ୧୫/୧୨: ବାଲୁଗାଁର ଶିବାନୀ ହତ୍ୟାକାଣ୍ଡ ଉପରୁ ପରଦା ଉଠାଇଛି ପୋଲିସ୍। ମୃତ ଶିବାନୀଙ୍କ ଭାଉଜ କାବେରୀ ଏହି ଘଟଣାର ମୁଖ୍ୟ କାର୍ପଟଦାର ବୋଲି ଜଣାପଡିଛି । ଏକତରଫା ପ୍ରେମର ରୂପ ଦେଇ ଶିବାନୀଙ୍କୁ ନିଜେ ହତ୍ୟା କରିଥିଲା କାବେରୀ। ରବିବାର ଖୋର୍ଦ୍ଧା ଏସ୍ପି ଅଜୟ ପ୍ରତାପ ସ୍ବାଇଁ କାବେରୀ ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ବୋଲି ପ୍ରକାଶ କରିଛନ୍ତି। ଉଭୟଙ୍କ ମଧ୍ୟରେ ସମ୍ପର୍କ ତିକ୍ତ ରହିଥିବାରୁ କାବେରୀ ପ୍ରତିଶୋଧ ପରାୟଣ ହୋଇ ହତ୍ୟା କରିଥିବା ଜଣାପଡିଛି ।
ଗଙ୍ଗନଗର ଘରେ ଦୁଇ ଜଣ ଥିବା ବେଳେ କାବେରୀ ଶିବାନୀଙ୍କୁ ହତ୍ୟା କରିବା ସହିତ ଏକତରଫା ପ୍ରେମ କାରଣରୁ ସେହି ଗ୍ରାମର ଜନୈକ ଯୁବକଙ୍କୁ ଦୋଷାରୋପ କରିଥିଲେ। ଶିବାନୀଙ୍କ ପ୍ରେମିକ ବିଭୁ ଏବଂ ଭାଉଜ କାବେରୀଙ୍କୁ ପୋଲିସ୍ ଥାନାକୁ ନେଇ ଜେରା କରିବା ପରେ ସତ ସାମ୍ନାକୁ ଆସିଥିଲା। ଶିବାନୀଙ୍କ ଭାଇଙ୍କୁ କାବେରୀ ପ୍ରେମ ବିବାହ କରିଥିବା ବେଳେ ଏହାକୁ ନେଇ ଉଭୟଙ୍କ ମଧ୍ୟରେ ସମ୍ପର୍କ ତିକ୍ତ ରହିଥିଲା। ଶିବାନୀ ସବୁବେଳେ କାବେରୀଙ୍କୁ ଅସମ୍ମାନ କରୁଥିବା ବେଳେ ଶନିବାର ମଧ୍ୟ ସମାନ ଘଟଣା ଘଟିବାରୁ ଉତ୍କ୍ଷିପ୍ତ କାବେରି ଏକ ଧାରୁଆ ଅସ୍ତ୍ରରେ ଶିବାନୀଙ୍କ ଗଳାକାଟି ହତ୍ୟା କରିଥିଲେ। ଘରେ କେହି ନ ଥିବା ସୁଯୋଗ ନେଇ ପାଖରେ ପଡ଼ିଥିବା ଏକ ଧାରୁଆ ଛୁରୀରେ ତାଙ୍କ ବେକ କାଟିଦେଇଥିଲେ। ଏତିକି ନୁହେଁ, ନିଜକୁ ବଞ୍ଚାଇବାକୁ ସେ ଏହି ହତ୍ୟାକାଣ୍ଡକୁ ନାଟକୀୟ ରଙ୍ଗ ଦେଇଥିଲେ। କେହି ଦୁର୍ବୃତ୍ତ ଶିବାନୀଙ୍କ ଗଳାକାଟି ଶିଡ଼ି ବାଟେ ଫେରାର ହୋଇଯାଇଥିବା ସେ ଲୋକଙ୍କୁ କହିଥିଲେ। ତେବେ ପୋଲିସ ତଦନ୍ତରୁ ଜଣାପଡ଼ିଥିଲା ଯେ ଘଟଣା ବେଳେ ଶିବାନୀ ଓ କାବେରୀଙ୍କ ବ୍ୟତୀତ କୌଣସି ତୃତୀୟ ବ୍ୟକ୍ତି ଘରେ ଉପସ୍ଥିତ ନ ଥିଲେ। ତଦନ୍ତ ଆଗକୁ ବଢ଼ାଇ କାବେରୀଙ୍କୁ ପଚରାଉଚରା କରିଥିଲା। ଜେରା ସମୟରେ କାବେରୀ ଦୋଷ ସ୍ୱୀକାର କରିଥିବା ଏସପି ସୂଚନା ଦେଇଛନ୍ତି। ପୋଲିସ କାବେରୀଙ୍କୁ ଗିରଫ କରିବା ସହିତ ତାଙ୍କ ବିରୋଧରେ ଆଇପିସି ଦଫା ୩୦୨ ଏବଂ ୪୫୦ ବଳରେ ବାଲୁଗାଁ ଥାନାରେ ମାମଲା (ନଂ.-୧୬୦) ରୁଜୁ କରିଛି ।
ରିପୋର୍ଟର : ସୀତାରାମ ଅଗ୍ରଓ୍ବାଲ
