ସୀତାରାମ ଅଗ୍ରଓ୍ବାଲ
ବାଲୁଗାଁ: କରୋନା ଲକଡ଼ାଉନ ସମୟରେ ଆଜି ବାଲୁଗାଁ ପୋଲିସ ଦ୍ୱାରା ବିଭିନ୍ନ ସ୍ଥାନରେ ସେବା କାର୍ଯ୍ୟ କରାଯାଇଛି। ବାଲୁଗାଁ ଥାନାଧିକାରୀ ରମାକାନ୍ତ ମାହାଲିକଙ୍କ ନେତୃତ୍ୱରେ ଏ.ଏସ.ଆଇ ଦିଲୀପ ବିଶ୍ୱାଳ, କନଷ୍ଟେବଳ ଗୋପୀନାଥ ମଙ୍ଗରାଜ, ଓଏପିଫ ପ୍ରକାଶ ନାଏକ ଆଦି ଆଙ୍କୁଲା ପଞ୍ଚାୟତରେ ଥିବା ବାତ୍ୟା ଆଶ୍ରୟ ସ୍ଥଳୀରେ ଶ୍ରମିକ ମାନଙ୍କ ସହାୟତା କରିଥିଲେ। ସୁଦୂର ଛତିଶଗଡ଼ରୁ ଆସିଥିବା ୩୬ ଶ୍ରମିକ ପରିବାର ଲକଡ଼ାଉନ ସମୟରୁ ଫସି ରହିଥିବା ବେଳେ ସେମାନଙ୍କୁ ଶୁଖିଲା ଖାଦ୍ୟ, ପାଣି ଓ ଫଳମୂଳ ଆଦି ପ୍ରଦାନ କରିଥିଲେ ଥାନାଧିକାରୀ। ଲକଡ଼ାଉନ ସରିବା ଯାଏଁ ଧୈର୍ଯ୍ୟ ଧରି ସେଠାରେ ରହିବାକୁ ଥାନାଧିକାରୀ ସବୁ ପରିବାରକୁ ପରାମର୍ଶ ଦେଇଥିଲେ। ଏହା ସହିତ ପ୍ରତିଦିନ ସେମାନଙ୍କ ଖାଦ୍ୟପେୟର ବ୍ୟବସ୍ଥା କରିବା ପାଇଁ ମଧ୍ୟ ପ୍ରତିଶ୍ରୁତି ଦେଇଥିଲେ।
ଅନୁରୂପ ଭାବେ ବାଲୁଗାଁ ପୋଲିସର ସହଯୋଗରେ ଶିବଶକ୍ତି ଆଞ୍ଚଳିକ ମହିଳା ମହାସଂଘର ସଭାନେତ୍ରୀ ଉଷାରାଣି ମିଶ୍ର, ସମ୍ପାଦିକା ଚନ୍ଦ୍ରପ୍ରଭା ସାହୁ ଓ ଅନ୍ୟ ସଦସ୍ୟମାନଙ୍କ ଦ୍ୱାରା ବାଲୁଗାଁ ଉମାମହେଶ୍ୱର ମନ୍ଦିର ବାହାରେ ବସବାସ କରୁଥିବା ବହୁ ଭିକ୍ଷୁକ ମାନଙ୍କୁ ପାଖାପାଖି ୭0 ପ୍ୟାକେଟ ଶୁଖିଲା ଖାଦ୍ୟ ପ୍ରଦାନ କରାଯାଇଥିଲା। ପରବର୍ତ୍ତୀ ସମୟରେ ବାଲୁଗାଁ ଥାନାଧିକାରୀ ଶ୍ରୀ ମାହାଲିକ ଓ ମହିଳା ସଂଘର କର୍ମକର୍ତ୍ତା ମାନେ ସବୁ ଭିକ୍ଷୁକ ମାନଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିବା ସହ କରୋନା ପାଇଁ ସଚେତନ କରାଇଥିଲେ। ସମ୍ପୂର୍ଣ୍ଣ କାର୍ଯ୍ୟକ୍ରମରେ ସାମାଜିକ ଦୂରତ୍ୱକୁ କଡ଼ାକଡ଼ି ଭାବେ ପାଳନ କରିଥଲେ ସଙ୍ଘର କର୍ମକର୍ତ୍ତାମାନେ। ଲକଡ଼ାଉନ ସମୟରେ ମାନବିକତାକୁ ଦୃଷ୍ଟିରେ ରଖି ବାଲୁଗାଁ ପୋଲିସ ଓ ଶିବଶକ୍ତି ଆଞ୍ଚଳିକ ମହିଳା ମହାସଂଘର ଏପରି ସେବା କାର୍ଯ୍ୟକୁ ଅଞ୍ଚଳବାସୀ ଭୁୟସୀ ପ୍ରଶଂସା କରିଛନ୍ତି।
