ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଆସନ୍ତା ଡ଼ିସେମ୍ବର ୧୨ରେ ଓକିଲ ସଂଘ ନିର୍ବାଚନ ହେବାକୁ ଯାଉଛି। ଯାହାକୁ ନେଇ ବର୍ତ୍ତମାନ ବ୍ରହ୍ମପୁରର କୋର୍ଟ ପରିସର ବେଶ୍ ସରଗରମ ଦେଖିବାକୁ ମିଳିଛି। କରୋନାକୁ ଆଖି ଆଗରେ ରଖି ହେବାକୁ ଥିବା ଓକିଲ ସଂଘ ନିର୍ବାଚନକୁ ଘୁଞ୍ଚାଇ ଦିଆଯାଇଥିଲା। ବର୍ତ୍ତମାନ ତିନିମାସ ପାଇଁ ଏହି ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଯେଉଁଥିରେ ବ୍ରହ୍ମପୁର ସମେତ ଗଂଜାମ ଜିଲ୍ଲାର ସମସ୍ତ କୋର୍ଟର ଓକିଲ ସଂଘ ନିର୍ବାଚନ ଅନୁଷ୍ଠିତ ହେବ।
ଏଠାରେ ସୂଚନାଥାଉକି ବ୍ରହ୍ମପୁର ଓକିଲ ସଂଘ ନିର୍ବାଚନରେ ମୋଟ ବିଭିନ୍ନ ପଦପଦବି ପାଇଁ ୧୦ ଜଣ ପ୍ରାର୍ଥୀ ପତ୍ର ଦାଖଲ କରିଥିବାବେଳେ ସଭାପତି ପଦ ପାଇଁ ବରିଷ୍ଠ ଆଇନଜୀବୀ କପିଳ ପଟ୍ଟନାୟକ ଏବଂ ବଂଶିଧର ପାଳ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସଂପାଦକ ପାଇଁ ବରିଷ୍ଠ ଆଇନଜୀବୀ ପ୍ରଦୀପ ବେହେରା ଏବଂ ରାମକୃଷ୍ଣ ମହାରଣା ପ୍ରତିଦ୍ୱନ୍ଦ୍ୱିତା କରିବେ। ଏହି ନିର୍ବାଚନକୁ ଓଡ଼ିଶା ବାର୍ କାଉନ୍ସିଲ ପରିଚାଳନା କରୁଥିବାବେଳେ ଏହି ନିର୍ବାଚନରେ ନିର୍ବାଚନ ଅଧିକାରୀ ଭାବେ ନୟନ ମହାପାତ୍ର କାର୍ଯ୍ୟ ନିର୍ବାହ କରିବେ।
ବ୍ରହ୍ମପୁର ବାର୍ର ୧୩୩୩ ଜଣ ଭୋଟ ଦେବାର କାର୍ଯ୍ୟକ୍ରମ ଅଛି। ୧୨ ତାରିଖ ସକାଳ ୮ ଘଣ୍ଟାଠାରୁ ୪ଟା ପର୍ଯ୍ୟନ୍ତ ନିର୍ବାଚନ ଅନୁଷ୍ଠିତ ହେବ। ୪ଟା ପରେ ଭୋଟ ଗଣତି ହୋଇ ସେହିଦିନ ହିଁ ଅପରାହ୍ନରେ ଫଳାଫଳ ଘୋଷିତ ହେବ। ଯାହାକି ଆସନ୍ତା ବର୍ଷ ତଥା ମାର୍ଚ୍ଚ ୨୧, ୨୦୨୧ ଯାଏଁ ଏମାନଙ୍କର କାର୍ଯ୍ୟକାଳ ରହିବ ଏବଂ ପୁଣିଥରେ ବିଜ୍ଞପ୍ତି ପ୍ରକାଶ ପାଇ ନିର୍ବାଚନ ହେବାର କାର୍ଯ୍ୟସୂଚୀ ରହିଛି।
ବର୍ତ୍ତମାନ କରୋନା ସମୟରେ ନିର୍ବାଚନ ବିଜ୍ଞପ୍ତି ଜାରି ହେବା ପରେ ସ୍ଥଗିତ ରଖାଯାଇଥିଲା। ଏହି ପରିପ୍ରେକ୍ଷୀରେ ବ୍ରହ୍ମପୁର ପୂର୍ବତନ ସଭାପତି ତଥା ବରିଷ୍ଠ ଆଇନଜୀବୀ ସୁଧାଂଶୁ ପଣ୍ଡାଙ୍କୁ ସଂପାଦକ ଦାୟିତ୍ୱ ତୁଲାଇବା ପାଇଁ ଓଡ଼ିଶା ବାର୍ କାଉନ୍ସିଲ ନିର୍ଦ୍ଦେଶ ଦେଇଥିଲା। ଯାହାକି ଏହି ନିର୍ବାଚନ ସରିବା ପରେ ସୁଧାଂଶୁ ପଣ୍ଡା ନବ ନିର୍ବାଚିତ ସଂପାଦକଙ୍କୁ କାର୍ଯ୍ୟଭାର ହସ୍ତାନ୍ତର କରିବେ।
ନିର୍ବାଚନକୁ ଆଖି ଆଗରେ ରଖି ଆଇନଶୃଙ୍ଖଳାକୁ ମଧ୍ୟ ତ୍ୱରାନ୍ୱିତ କରାଯାଇଛି। ବର୍ତ୍ତମାନ ବ୍ରହ୍ମପୁର କୋର୍ଟ ପରିସର ନିର୍ବାଚନ ପାଇଁ ସରଗରମ ହୋଇଥିବା ଦେଖିବାକୁ ମିଳିଛି। ପ୍ରାର୍ଥୀମାନେ ନିଜ ନିଜର ଲବି ଜାହିର କରିଛନ୍ତି। ପ୍ରାରମ୍ଭିକ ଅନୁସନ୍ଧାନରୁ ଜଣାପଡ଼ିଛି ସଭାପତି ପାଇଁ କପିଲ ପଟ୍ଟନାୟକଙ୍କ ପଲା ଭାରି ଥିବାବେଳେ ସଂପାଦକ ପାଇଁ ପ୍ରଦୀପ ବେହେରାଙ୍କ ପଲା ଭାରି ରହିଥିବା ଚର୍ଚ୍ଚା ହେଉଛି।