ନୂଆଦିଲ୍ଲୀ, ସାମାଜିକ-ଆର୍ଥିକ ଦୃଷ୍ଟିରୁ ଅବହେଳିତ ବର୍ଗଙ୍କୁ ଆର୍ଥିକ ଅନ୍ତର୍ଭୂକ୍ତିକରଣ ଏବଂ ସହାୟତା ଯୋଗାଇ ଦେବା ଲାଗି ପ୍ରଚଳନ ହୋଇଛି ପ୍ରଧାନମନ୍ତ୍ରୀ ମୁଦ୍ରା ଯୋଜନା ବା ପିଏମଏମଓ୍ବାଇ। ଏହି ଯୋଜନା ମାଧ୍ୟମରେ ଲକ୍ଷ ଲକ୍ଷ ଲୋକଙ୍କ ସ୍ବପ୍ନକୁ ସାକାର କରାଯିବା ସହିତ ସେମାନଙ୍କୁ ଆତ୍ମନିର୍ଭରଶୀଳତାର ଅନୁଭବ ଦିଆଯାଉଛି।
ଅଣ କର୍ପୋରେଟ, ଅଣ କୃଷି କ୍ଷୁଦ୍ର ଏବଂ ଲଘୁ ଉଦ୍ୟୋଗଗୁଡ଼ିକୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଯୋଗାଇ ଦେବା ଉଦ୍ଦେଶ୍ୟରେ ୮ ଏପ୍ରିଲ ୨୦୧୫ରେ ପ୍ରଧାନମନ୍ତ୍ରୀଙ୍କ ଦ୍ବାରା ପିଏମଏମଓ୍ବାଇ ଯୋଜନା ଶୁଭାରମ୍ଭ କରାଯାଇଥିଲା। ବର୍ତ୍ତମାନ ପିଏମଏମଓ୍ବାଇର ଷଷ୍ଠ ବର୍ଷରେ ପଦାର୍ପଣ କରିଛି।
ମୁଦ୍ରା ଯୋଜନା କାହିଁକି
ଭାରତ ଏକ ଯୁବ ରାଷ୍ଟ୍ର ଯାହା ଯୁବସୁଲଭ ଉତ୍ସାହ ଏବଂ ଆକାଂକ୍ଷାରେ ପରିପୂର୍ଣ୍ଣ। ଭାରତରେ ବିକାଶର ମଞ୍ଜି ବୁଣିବା ଲାଗି ଏକ ଉର୍ବର କ୍ଷେତ୍ର ଯୋଗାଇ ଦେବା ଉଦ୍ଦେଶ୍ୟରେ, ଏହି ଯୁବ ଭାରତର ଅଭିନବ ଉତ୍ସାହକୁ ଉପଯୋଗ କରିବା ଗୁରୁତ୍ବପୂର୍ଣ୍ଣ ଯାହା ଦେଶର ଅର୍ଥନୈତିକ ପରିବେଶରେ ରହିଥିବା ଶୂନ୍ୟସ୍ଥାନକୁ ପୂରଣ କରିବା ଲାଗି ନୂତନ ପିଢ଼ିର ସମାଧାନ ଯୋଗାଇ ଦେଇପାରିବ। ଭାରତରେ ଲୁଚି ରହିଥିବା ଉଦ୍ୟମିତା ସାମର୍ଥ୍ୟକୁ ଉପଯୋଗ କରିବାର ଆବଶ୍ୟକତାକୁ ହୃଦୟଙ୍ଗମ କରି ଏନଡିଏ ସରକାର ଏହାର ପ୍ରଥମ ବଜେଟରେ ପ୍ରଧାନମନ୍ତ୍ରୀ ମୁଦ୍ରା ଯୋଜନାର ଶୁଭାରମ୍ଭ କରିଥିଲା।
ମୁଦ୍ରା ଯୋଜନା କିପରି କାର୍ଯ୍ୟ କରିଥାଏ
ସଦସ୍ୟ ଋଣ ପ୍ରଦାନକାରୀ ସଂସ୍ଥାନ ବା ଏମଏଲଆଇ ଗୁଡ଼ିକ ଦ୍ବାରା ପିଏମଏମଓ୍ବାଇ ଅନ୍ତର୍ଗତ ୧୦ ଲକ୍ଷ ଟଙ୍କା ପର୍ୟ୍ୟନ୍ତ ଋଣ ଯୋଗାଇ ଦିଆଯାଇଥାଏ। ଅନୁସୂଚିତ ବାଣିଜ୍ୟିକ ବ୍ୟାଙ୍କ, ଆଞ୍ଚଳିକ ଗ୍ରାମୀଣ ବ୍ୟାଙ୍କ ବା ଆରଆରବି, କ୍ଷୁଦ୍ର ଅର୍ଥ ଲଗାଣକାରୀ ବ୍ୟାଙ୍କ ବା ଏସଏଫବି, ଅଣବ୍ୟାଙ୍କିଙ୍ଗ ଆର୍ଥିକ କମ୍ପାନୀ ବା ଏନବିଏଫସି , ଲଘୁ ଆର୍ଥିକ ସଂସ୍ଥାନ ବା ଏମଏଫଆଇ ଆଦି ଏମଏଲଆଇଗୁଡ଼ିକ ଏହି ଋଣ ଯୋଗାଇ ଦେଇଥାନ୍ତି।
ଉତ୍ପାଦନ, ବାଣିଜ୍ୟ ଓ ସେବା କ୍ଷେତ୍ର ଏବଂ କୃଷି ଆନୁସଙ୍ଗିକ କ୍ଷେତ୍ରରେ ଆୟ ସୃଷ୍ଟିକାରୀ କାର୍ୟ୍ୟକଳାପ ନିମନ୍ତେ ଋଣ ଦିଆଯାଇଥାଏ।
ଋଣଗ୍ରହିତାଙ୍କ ଅଭିବୃଦ୍ଧିର ସ୍ତର କିମ୍ବା ବିକାଶ ଏବଂ ପାଣ୍ଠି ଆବଶ୍ୟକତା ଆଧାରରେ ତିନୋଟି ବର୍ଗ ‘ଶିଶୁ’, ‘କିଶୋର’ ଓ ‘ତରୁଣ’ ଆଧାରରେ ଋଣ ଉପଲବ୍ଧ ହୋଇଥାଏ।
ଶିଶୁ : ୫୦,୦୦୦ ଟଙ୍କା ପର୍ଯ୍ୟନ୍ତ ଋଣ
କିଶୋର : ୫୦,୦୦୦ ଟଙ୍କାରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ
ତରୁଣ : ୫ ଲକ୍ଷ ଟଙ୍କାରୁ ଅଧିକ ଏବଂ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ
ନୂଆ ପିଢ଼ିର ଆକାଂକ୍ଷୀ ଯୁବକମାନଙ୍କ ମଧ୍ୟରେ ଉଦ୍ୟମିତାକୁ ପ୍ରୋତ୍ସାହନ ଦେବାର ଲକ୍ଷ୍ୟ ନେଇ ଶିଶୁ ବର୍ଗର ୟୁନିଟ ଉପରେ ଅଧିକ ଧ୍ୟାନ ଦେବା ଏବଂ ଏହାପରେ କିଶୋର ଓ ତରୁଣ ବର୍ଗ ଉପରେ ଧ୍ୟାନ ଦିଆଯିବା ସୁନିଶ୍ଚିତ କରାଯାଇଛି।
ଏହି ଯୋଜନାର ସଫଳତା
ଯୋଜନା ଆରମ୍ଭ ହେବା ପରଠାରୁ ବର୍ତ୍ତମାନ ସୁଦ୍ଧା ୧୪.୯୬ ଲକ୍ଷ କୋଟି ଟଙ୍କାର ୨୮.୬୮ କୋଟିରୁ ଅଧିକ ଋଣ ମଞ୍ଜୁର କରାଯାଇଛି। ୨୦୨୦-୨୧ ଆର୍ଥିକ ବର୍ଷରେ ୪.୨୦ କୋଟି ପିଏମଏମଓ୍ବାଇ ଋଣ ମଞ୍ଜୁର ହୋଇଥିବା ବେଳେ ୨୦୨୦-୨୧ ଆର୍ଥିକ ବର୍ଷରେ ୨.୬୬ ଲକ୍ଷ କୋଟି ଟଙ୍କାର ଋଣ ମଞ୍ଜୁର ହୋଇଛି।
ତଥ୍ୟ ଅନୁସାରେ ବର୍ତ୍ତମାନ ୧୧ ପ୍ରତିଶତ ଋଣ ସଂଖ୍ୟାଲଘୁ ସମୁଦାୟର ଋଣଗ୍ରହିତାଙ୍କୁ ଦିଆଯାଇଛି। ଶ୍ରମ ଏବଂ ନିୟୋଜନ ମନ୍ତ୍ରଣାଳୟ ପକ୍ଷରୁ କରାଯାଇଥିବା ଏକ ସର୍ବେକ୍ଷଣ ଅନୁଯାୟୀ ୨୦୧୫ରୁ ୨୦୧୮ ମଧ୍ୟରେ ପିଏମଏମଓ୍ବାଇ୧.୧୨ କୋଟି ମୋଟ ଅତିରିକ୍ତ ନିଯୁକ୍ତି ସୃଷ୍ଟିରେ ସହାୟକ ହୋଇଛି। ଆନୁମାନିକ ୧.୧୨ କୋଟି ବର୍ଦ୍ଧିତ ନିଯୁକ୍ତି, ମଧ୍ୟରୁ ମହିଳାଙ୍କ ସଂଖ୍ୟା ହେଉଛି ୬୯ ଲକ୍ଷ ବା ୬୨ ପ୍ରତିଶତ।