ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ ସରକାରୀ ସ୍ତରରେ ବହୁ ବଡବଡ ନିଷ୍ପତି ନେଇ ସାରା ଦେଶ ପାଇଁ ଉଦାହରଣ ସୃଷ୍ଟି କରିଛନ୍ତି। ସେହିପରି ଫନି ବାତ୍ୟାରେ ଲୋକଙ୍କୁ ସ୍ଥାନାନ୍ତର କରି ଜୀବନ ବଞ୍ଚାଇବା କାର୍ଯ୍ୟ କରି ବିଦେଶରୁ ପ୍ରସଂଶା ହାସଲ କରିଛନ୍ତି। ହେଲେ ବର୍ତ୍ତମାନ ବ୍ୟକ୍ତିଗତ ଭାବେ ଏକ ନିଷ୍ପତି କରି ନୂଆ ଉଦାହରଣ ସୃଷ୍ଟି କରିଛନ୍ତି ନବୀନ। ତାହା ହେଉଛି ମୁଖ୍ୟମନ୍ତ୍ରୀ ତାଙ୍କର ଗୋଟିଏ ବର୍ଷର ଦରମା ବାତ୍ୟା କ୍ଷତିଗସ୍ତ ଲୋକଙ୍କୁ ସହାୟତା ଦେବା ପାଇଁ ଘୋଷଣା କରିବା। ଆଜି ପ୍ରଧାନ ମନ୍ତ୍ରୀ ଏକ ହଜାର କୋଟି କେନ୍ଦ୍ରୀୟ ସହାୟତା ଘୋଷଣା କରିବାର କିଛି ଘଣ୍ଟା ପରେ ନବୀନ ଏହି ଘୋଷଣା କରିଛନ୍ତି। ସେ କହିଛନ୍ତି ଯେ, ତାଙ୍କର ଏକ ବର୍ଷର ଦରମା ଯାହା ହେବ ସେସବୁ ରିଲିଫ ଫଣ୍ଡକୁ ଦାନ କରିବେ। ଏପରି ଘୋଷଣା ପରେ ସାରା ରାଜ୍ୟ କାହିଁକି ଦେଶରେ ମଧ୍ୟ ନୂଆ ଉଦାହରଣ ସୃଷ୍ଟି କରିଛି। କାରଣ ପ୍ରାୟତଃ ସାଂସଦ ହୁଅନ୍ତୁ କିମ୍ବା ବଡ ବଡ ନେତା, ସେମାନେ ଏକ ମାସର ଦରମା ଏହି ବିପର୍ଯ୍ୟୟ ସମୟରେ ଦାନ କରିଥାନ୍ତି। ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ଥରକେ ଗୋଟିଏ ବର୍ଷର ଦରମା ପ୍ରଦାନ କରିବା ଜାତୀୟ ରାଜନୀତିରେ ଏକ ଉଦାହରଣ ସୃଷ୍ଟି କରିଛି କହିଲେ ଅତ୍ୟୁକ୍ତି ହେବ ନାହିଁ।
