ସୀତାରାମ ଅଗ୍ରୱାଲ
ବାଣପୁର: ଗୁରୁବାର ପୂର୍ବାହ୍ନରେ ଗମ୍ଭାରୀମୁଣ୍ଡା ଅଞ୍ଚଳର ତଥା ଦେଓଗାଁ ଗ୍ରାମପଞ୍ଚାୟତର ବିଜେପିର ଜଣେ ପ୍ରତିଷ୍ଠିତ ନେତା ଭାବରେ ଜଣାଶୁଣା ବ୍ୟକ୍ତିତ୍ୱ ସୁଶୀଲ କୁମାର ବିଶୋଇଙ୍କର ନିଜ ବାସଭବନରେ ମୃତ୍ୟୁବରଣ କରିଛନ୍ତି। ମୃତ୍ୟୁ ବେଳକୁ ତାଙ୍କୁ ୬୩ ବର୍ଷ ହୋଇଥିବା ଜଣାଯାଇଛି। ଦୀର୍ଘଦିନ ଧରି ଶରୀର ଅସୁସ୍ଥତା କାରଣରୁ ତାଙ୍କର ମୃତ୍ୟୁ ହୋଇଥିବା ତାଙ୍କ ପରିବାର ତରଫରୁ କୁହାଯାଇଛି।
ସେ ପିଲାଟି ବେଳରୁ ଜନସେବାରେ ନିଜକୁ ଉତ୍ସର୍ଗ କରି ବିଶ୍ୱ ଭୂଷଣ ହରିଚନ୍ଦନଙ୍କ ଆଦର୍ଶରେ ଅନୁପ୍ରାଣିତ ହୋଇ ଦେଓଗାଁ ପଞ୍ଚାୟତର ଥରେ ସରପଞ୍ଚ, ଥରେ ସମିତି ସଭ୍ୟ ଭାବରେ ନିର୍ବାଚିତ ହୋଇ ଅଂଚଳର ବହୁ ବିକାଶମୁଖି କାର୍ଯ୍ୟ କରିଥିଲେ। ତାଙ୍କ ଧର୍ମପତ୍ନୀ ସମିତିସଭ୍ୟ ଭାବରେ ନିର୍ବାଚିତ ହୋଇ ବାଣପୁର ବ୍ଲକ ଅଧ୍ୟକ୍ଷା ପଦରେ ଅଧିଷ୍ଠିତ ହୋଇଥିବା ବେଳେ ବାଣପୁର ଅଂଚଳର ବହୁ ଉନ୍ନତି ମୁଲକ କାର୍ଯ୍ୟ କରିଛନ୍ତି।
ଅଂଚଳର ଜଣେ ନିର୍ଭିକ ଓ ଅପ୍ରତିଦ୍ବନ୍ଦି ନେତା ଭାବରେ ସେ ଜଣାଶୁଣା ଥିଲେ। ସୁଶୀଲ ଭାଇ ଭାବରେ ସେ ଘରେ ଘରେ ପରିଚିତ ଥିଲେ। ତାଙ୍କର ଅବର୍ତମାନରେ ଗମ୍ଭାରୀମୁଣ୍ଡା ଅଞ୍ଚଳରେ ଶୋକର ଛାୟା ଖେଳି ଯାଇଛି।
ବିଜେପି ରାଜ୍ୟ ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ, ଦୁଷ୍ମନ୍ତ ହରିଚନ୍ଦନ, ପୂର୍ବତନ ବିଧାୟକ ବିଭୁତି ଭୂଷଣ ହରିଚନ୍ଦନଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ତାଙ୍କର ଅନ୍ତେଷ୍ଟି କ୍ରିୟାରେ ଯୋଗଦେଇ ମର ଶରୀରରେ ପୁଷ୍ପମାଲ୍ୟ ଦେଇ ଶେଷ ଦର୍ଶନ କରିଥିଲେ।