ଭୁବନେଶ୍ବର: ବିଜୟିନୀ ସ୍ମୃତି ଟ୍ରଷ୍ଟ ଆନୁକୂଲ୍ୟରେ ଗୀତଗୋବିନ୍ଦ ସଦନ, ଭୁବନେଶ୍ୱରଠାରେ ଡାକ୍ତର ଇନ୍ଦ୍ରମଣି ଜେନାଙ୍କ ରଚିତ ଉପନ୍ୟାସ ‘ଦିଗ୍ବିଜୟୀ ଗଜପତି’ ଏବଂ ‘ଆମଚଳଣି, ଆମ ଚରିତ୍ର, ଆମଚମକ’ ପୁସ୍ତକ ଉନ୍ମୋଚନ ସଭାରେ ଛତିଶଗଡ଼଼ ରାଜ୍ୟପାଳ ଶ୍ରୀବିଶ୍ୱଭୂଷଣ ହରିଚନ୍ଦନ ମୁଖ୍ୟ ଅତିଥି ଭାବେ ଯୋଗ ଦେଇ ଉକ୍ତ ପୁସ୍ତକର ଉନ୍ମୋଚନ କରିଥିଲେ।
ରାଜ୍ୟପାଳ ଶ୍ରୀହରିଚନ୍ଦନ ଏହି ଅବସରରେ ଗଙ୍ଗାଠାରୁ କୃଷ୍ଣା ପର୍ଯ୍ୟନ୍ତ ବିଜୟର ବାନା ଉଡାଇଥିବା ଓଡ଼ିଶାର ଦିଗବିଜୟୀ ସମ୍ରାଟ କପିଳେନ୍ଦ୍ର ଦେବଙ୍କୁ ସ୍ମରଣ କରିଥିଲେ। କପିଳେନ୍ଦ୍ର ଦେବ ହେଉଛନ୍ତି ଓଡ଼ିଶାର ଗର୍ବିତ ଇତିହାସର ଦିଗ୍ବିଜୟୀ ମହାନାୟକ। ଜାତୀୟ ସ୍ତରରେ ଓଡ଼ିଶାର ବୀରତ୍ୱ,ସଂହତି ଓ ଅପୂର୍ବ ସାହସିକତାର ସୂଚନା ଦେଇଥିଲେ। ବାସ୍ତବରେ ସେ ଥିଲେ ନିର୍ଭିକ, ସାହସୀ,ବୀର, ପ୍ରଜାହିତକାରୀ, ଦେଶମାତୃକାର ସର୍ବଶ୍ରେଷ୍ଠ ମହାନାୟକ।
୧୪୩୫ ଖ୍ରୀଷ୍ଟାବ୍ଦରୁ ୧୪୬୫ ପର୍ଯ୍ୟନ୍ତ ତାଙ୍କର ଶାସନ କାଳରେ ଅନେକ ଲୋକହିତର କାର୍ଯ୍ୟମାନ କରିଥିବାର ଦୃଷ୍ଟାନ୍ତ ମିଳିଥାଏ। ପ୍ରଜାବତ୍ସଳତା ଓ ସୁଶାସନ କାରଣରୁ ତାଙ୍କର ସୁଖ୍ୟାତି ଆଜି ପର୍ଯ୍ୟନ୍ତ ଲୋକଲୋଚନରେ ରହିଆସିଛି। ସେ ଏଭଳି ଜଣେ ସମ୍ରାଟ ଥିଲେ ଯିଏ ଜୀବନରେ କେବ ପରାଜୟର ସ୍ୱାଦ ଚାଖି ନାହାନ୍ତି ବୋଲି ରାଜ୍ୟପାଳ ପ୍ରକାଶ କରିଛନ୍ତି।
ରାଜ୍ୟପାଳ ଶ୍ରୀହରିଚନ୍ଦନ ଓଡ଼ିଶାର ମହାନାୟକ ଦିଗବିଜୟୀ କପିଳେନ୍ଦ୍ର ଦେବଙ୍କର ଅଦମ୍ୟ ବୀରତ୍ୱକୁ ମନେ ପକାଇ ଓଡ଼ିଶାର ଜନସାଧାରଣକୁ ତାଙ୍କ ଭଳି ଲଢ଼ୁଆ ହେବା ପାଇଁ ଆହ୍ୱାନ ଦେଇଛନ୍ତି। ସେ କହିଛନ୍ତି,ତୁମର ପୂର୍ବ ପୁରୁଷ ସଂଗ୍ରାମୀ, ଲଢ଼ୁଆ ବୀର ଥିଲେ,ତୁମେ ସେହି ବୀରମାନଙ୍କର ଦାୟାଦ; କାପୁରୁଷ ନୁହଁ। ତୁମେ ନିଜକୁ ଚିହ୍ନ, ଜାଣ, ଅନ୍ୟାୟ ଅନୀତି ବିରୁଦ୍ଧରେ ଲଢ଼େଇ କର। ସେହିବୀରମାନଙ୍କୁ ମନେପକାଇ ଆମେ ତାଙ୍କ ଭଳି ହେବାକୁ ଆଜିର ଯୁବକମାନଙ୍କୁ ରାଜ୍ୟପାଳ ଆହ୍ୱାନ ଦେଇଛନ୍ତି।
‘ଦିଗ୍ବିଜୟୀ ଗଜପତି’ ଏବଂ ‘ଆମ ଚଳଣୀ, ଆମ ଚରିତ୍ର, ଆମ ଚମକ’ ପୁସ୍ତକର ରଚୟିତା ଡାକ୍ତର ଇନ୍ଦ୍ରମଣି ଜେନାଙ୍କୁ ଦିଗ୍ବିଜୟୀ ଗଜପତି କପିଳେନ୍ଦ୍ର ଦେବଙ୍କ ଉପରେ ଏଭଳି ଉପନ୍ୟାସ ପୁସ୍ତକ ରଚନା କରିଥିବାରୁ ରାଜ୍ୟପାଳ ସାଧୁବାଦ ଜଣାଇଛନ୍ତି। ଏହି ପୁସ୍ତକ ଆମ ସାହିତ୍ୟ ଭଣ୍ଡାରକୁ ଋଦ୍ଧିମନ୍ତ କରିବା ସହିତ ସାଧାରଣ ଲୋକମାନେ ଆମ ଓଡ଼ିଶାର ଗର୍ବିତ ଇତିହାସକୁ ଜାଣିବାକୁ ପାଇବେ ବୋଲି ସେ ମତବ୍ୟକ୍ତ କରିଛନ୍ତି।
ଉକ୍ତ କାର୍ଯ୍ୟକ୍ରମରେ ରାଜ୍ୟପାଳଙ୍କ ସମେତ ‘ସମ୍ବାଦ’ର ସଂପାଦକ ସୌମ୍ୟରଂଜନ ପଟ୍ଟନାୟକ, ଐତିହାସିକ ନିହାର ରଂଜନ ପଟ୍ଟନାୟକ, ସଭାର ସଭାପତି ପ୍ରଫେସର ବିଜୟାନନ୍ଦ ସିଂହ ଉନ୍ମୋଚିତ ପୁସ୍ତକ ଉପରେ ନିଜସ୍ୱ ମତ ରଖିଥିଲେ।
