ବାଣପୁର (ସୀତାରାମ ଅଗ୍ରୱାଲ): ପରିବାରର ଗୁଜୁରାଣ ମେଣ୍ଟାଇବାକୁ ସୁଦୂର ଆବୁଧାବି ଯାଇଥିବା ଜଣେ ଶ୍ରମିକଙ୍କର ଅକାଳ ମୃତ୍ୟୁ ଘଟିଛି। ଘଟଣାରୁ ଜଣାପଡିଛି ବାଣପୁର ଥାନା ଅନ୍ତର୍ଗତ ସୁନାକେରା ଗ୍ରାମର ଅଶୋକ ପ୍ରଧାନ (୩୧) ନିଜ ପରିବାର ପ୍ରତିପୋଷଣ ପାଇଁ ନାସିର କମ୍ପାନୀ ସହାୟତାରେ ଆବୁଧାବିରେ ଶ୍ରମିକ ଭାବେ ଛଅମାସ ପୂର୍ବେ କାମ କରିବାକୁ ଯାଇଥିଲେ।
ଗତ ୨୦ ତାରିଖରେ ରୁମରେ ଶୋଇଥିବା ଅବସ୍ଥାରେ ତାଙ୍କର ହୃଦଘାତରେ ମୃତ୍ୟୁ ହୋଇଥିବା କମ୍ପାନୀ କର୍ମଚାରୀ ପରିବାର ଲୋକଙ୍କୁ ଜଣାଇଥିଲେ। ପରିବାର ଲୋକ ଶବକୁ ଗ୍ରାମକୁ ପଠାଇବାକୁ କମ୍ପାନୀ କର୍ତ୍ତୃପକ୍ଷଙ୍କୁ ଆକୁଳ ନିବେଦନ କରିଥିଲେ। କମ୍ପାନୀ କର୍ତ୍ତୃପକ୍ଷ ଗ୍ରାମକୁ ଶବ ପଠାଇବାର ସମସ୍ତ ବନ୍ଦୋବସ୍ତ କରିଥିବା ବେଳେ ଶୁକ୍ରବାର ସନ୍ଧ୍ୟାରେ ମୃତଦେହ ଗ୍ରାମରେ ପହଂଚିଛି।
ତେବେ କଲିକତା ବିମାନ ବନ୍ଦର ଠାରୁ ପରିବାର ଲୋକ ନିଜସ୍ୱ ଖର୍ଚ୍ଚରେ ଶବ ଆଣିଥିବା ଜଣାପଡିଛି। ମୃତ ଅଶୋକଙ୍କର ପରିବାର ଲୋକ ଅତ୍ୟନ୍ତ ଗରିବ ଶ୍ରେଣୀର ହୋଇଥିବା ବେଳେ ତାଙ୍କର ଗୋଟିଏ ଝିଅ ଓ ଦୁଇଟି ପୁଅ ଅଛନ୍ତି। ସେମାନଙ୍କ ପ୍ରତିପୋଷଣ ନିମିତ୍ତ କମ୍ପାନୀ କର୍ତ୍ତୃପକ୍ଷ ଆର୍ଥିକ ସାହାଯ୍ୟ କରିବାକୁ ଗ୍ରାମବାସୀ ଦାବି କରିଛନ୍ତି।
