ନୂଆଦିଲ୍ଲୀ: ସିଆଇଆଇ ର ଏକ କାର୍ଯ୍ୟକ୍ରମ ସମୟରେ କେନ୍ଦ୍ର ମନ୍ତ୍ରୀ ନିତିନ ଗଡକରୀ ଡିଜେଲ ବିଷୟରେ ଏକ ବଡ଼ କଥା କହିଛନ୍ତି। ଶୀଘ୍ର ଡିଜେଲକୁ ବିଦାୟ କହିବା ପାଇଁ ଶ୍ରୀ ଗଡକରୀ ପରାମର୍ଶ ଦେଇଛନ୍ତି। କେବଳ ଏତିକି ନୁହେଁ ଡିଜେଲ ଯାନ ଉତ୍ପାଦନ ବନ୍ଦ କରିବାକୁ ମନ୍ତ୍ରୀ କାର ଉତ୍ପାଦନକାରୀ କମ୍ପାନୀମାନଙ୍କୁ ମଧ୍ୟ ନିବେଦନ କରିଛନ୍ତି।
ନିତିନ ଗଡକରୀ କହିଛନ୍ତି ଯେ, ଯଦି ଡିଜେଲ ଯାନ ଉତ୍ପାଦନ ଶୀଘ୍ର ବନ୍ଦ ନହୁଏ, ତେବେ ସେମାନେ ଏହି ଯାନ ଉପରେ ଏତେ ଟିକସ ଲାଗୁ କରିବେ ଯେ ଏହାକୁ ବିକ୍ରୟ କରିବା କଷ୍ଟକର ହୋଇଯିବ। ନିତିନ ଗଡକରୀଙ୍କ ଅନୁଯାୟୀ, ଆମକୁ ଶୀଘ୍ର ପେଟ୍ରୋଲ ଏବଂ ଡିଜେଲ ଛାଡି ପ୍ରଦୂଷଣମୁକ୍ତ ହେବା ପାଇଁ ଏକ ନୂତନ ରାସ୍ତାରେ ଯିବାକୁ ପଡିବ।
ଇନ୍ଧନରୁ ହେଉଥିବା ପ୍ରଦୂଷଣ ଏବଂ ଏହାର ଆମଦାନୀ ହ୍ରାସ କରିବାକୁ ଗଡକରୀ ନିରନ୍ତର ଉଦ୍ୟମ କରୁଛନ୍ତି। ଗଡକରୀ ଏହା ମଧ୍ୟ କହିଛନ୍ତି ଯେ, ମୁଁ ଅର୍ଥମନ୍ତ୍ରୀଙ୍କ ଠାରୁ ଡିଜେଲ ଯାନ ଉପରେ ୧୦ ପ୍ରତିଶତ ଅତିରିକ୍ତ ଜିଏସ୍ଟି ଦାବି କରିବି।
ଏହାପୂର୍ବରୁ ନିତିନ ଗଡକରୀ ତାଙ୍କ କାର ବିଷୟରେ କହିଥଲେ ଯେ, ମୋ କାର ଇଥାନଲରେ ଚାଲିଥାଏ। ଯଦି ଆପଣ ଏହି କାରକୁ ପେଟ୍ରୋଲ ସହିତ ତୁଳନା କରନ୍ତି, ତେବେ ଏହାର କିଲୋମିଟର ପିଛା ୨୫ ଟଙ୍କା ଥିବାବେଳେ ଇଥାନଲ ସହିତ ଏହାର ମୂଲ୍ୟ ମଧ୍ୟ କମ୍ ଅଟେ। ଗୋଟିଏ ଲିଟର ଇଥାନଲ ମୂଲ୍ୟ ୬୦ ଟଙ୍କା ଥିବାବେଳେ ପେଟ୍ରୋଲ ଦର ୧୨୦ ଟଙ୍କାରୁ ଅଧିକ ଅଟେ।
ନିତିନ ଗଡକରୀ ଏହା ମଧ୍ୟ କହିଛନ୍ତି ଯେ, ମୁଁ ଚାହୁଁଛି ଯେ ପେଟ୍ରୋଲ ଏବଂ ଡିଜେଲରେ ଚାଲୁଥିବା ଯାନଗୁଡିକ ଆସନ୍ତା ୧୦ ବର୍ଷ ମଧ୍ୟରେ ସମ୍ପୂର୍ଣ୍ଣ ରୂପେ ବନ୍ଦ ହୋଇଯାଉ। ଗଡକରୀ ଏହି ପେଟ୍ରୋଲ ଏବଂ ଡିଜେଲ ଚାଲୁଥିବା ଯାନ ବଦଳରେ ବଜାରରେ ବୈଦ୍ୟୁତିକ ଯାନ ପ୍ରବର୍ତ୍ତନ ବିଷୟରେ କହିଥିଲେ।
ନିତିନ ଗଡକରୀ କହିଛନ୍ତି ଯେ, ଆଜିର ସମୟରେ ବୈଦ୍ୟୁତିକ ସ୍କୁଟର, କାର ଏବଂ ବସ୍ ଏକ ଉତ୍ତମ ବିକଳ୍ପ ଭାବରେ ଉଭା ହୋଇଛି। ଯଦି ଆପଣ ଡିଜେଲ ପାଇଁ ୧୦୦ ଟଙ୍କା ଖର୍ଚ୍ଚ କରନ୍ତି, ତେବେ ବିଦ୍ୟୁତ୍ ପାଇଁ ମାତ୍ର ୪ ଟଙ୍କା ଲାଗିବ।