ନୂଆଦିଲ୍ଲୀ: ଆଜି ତାମିଲନାଡୁରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ପ୍ରମୁଖ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଇଡି ଦଳ ଡିଏମକେ ନେତା ତଥା ତାମିଲନାଡୁର ଅବକାରୀ ମନ୍ତ୍ରୀ ସେନ୍ଥିଲ ବାଲାଜୀ ଏବଂ ତାଙ୍କ ସହଯୋଗୀଙ୍କ ଘରେ ଚଢାଉ କରିଛି। ଏଥିରେ ତାଙ୍କର ସମ୍ପର୍କୀୟ ଏବଂ ସାଙ୍ଗମାନେ ଅନ୍ତର୍ଭୁକ୍ତ। ସମୁଦାୟ ୧୦ ଟି ସ୍ଥାନରେ ଚଢାଉ କରାଯାଇଛି। ଅର୍ଥ ହେରଫେର ମାମଲାରେ ଏହି ଚଢାଉ କରାଯାଇଛି।
ତାମିଲନାଡୁର ବିଭିନ୍ନ ସହରରେ ଏହି କାର୍ଯ୍ୟାନୁଷ୍ଠାନ ଚାଲିଛି। ଇଡି ଅଧିକାରୀମାନେ କରୁରର ତିନୋଟି ସ୍ଥାନରେ ଚଢାଉ କରିଛନ୍ତି। କେନ୍ଦ୍ରୀୟ ସୁରକ୍ଷାକର୍ମୀଙ୍କ ସହ ଅଧିକାରୀମାନେ ଏଠାରେ ପହଞ୍ଚିଥିଲେ। ଅଧିକାରୀମାନେ କେରଳ ଏବଂ ତେଲେଙ୍ଗାନା ରାଜ୍ୟର ପଞ୍ଜୀକୃତ ଗାଡି ସହିତ ସହରରେ ପ୍ରବେଶ କରିଥିଲେ। କରୁରର କୋଡାଇ ନଗର ଶକ୍ତି ମେସର ମାଲିକ କାର୍ତ୍ତିକଙ୍କ ଘର, ୮୦ ଫୁଟ ରାସ୍ତା ଅଞ୍ଚଳରେ ଅବସ୍ଥିତ ଏମସିଏସ ଶଙ୍କର ଏବଂ ରାୟନୁର ଅଞ୍ଚଳରେ ଅବସ୍ଥିତ କୋଙ୍ଗୁ ମେସର ମାଲିକ ମଣିଙ୍କ ଉପରେ ଚଢାଉ କରାଯାଇଛି। ସେହିଭଳି ରାଜ୍ୟର ଅନ୍ୟାନ୍ୟ ସହରରୁ ମଧ୍ୟ କାର୍ଯ୍ୟାନୁଷ୍ଠାନର ଖବର ଆସୁଛି।
ଅଗଷ୍ଟ ୨୦୨୨ ରେ ଅର୍ଥ ହେରଫେର ମାମଲାରେ ସେନ୍ଥିଲ ବାଲାଜୀଙ୍କ ବିରୋଧରେ ଇଡି ଏକ ଚାର୍ଜସିଟ ଦାଖଲ କରିଥିଲା। ଏହା ପରେ ତାଙ୍କୁ ଜୁନ୍ ୧୪ ତାରିଖ ୨୦୨୩ ରେ ଇଡି ଗିରଫ କରିଥିଲା। ପରିବହନ ମନ୍ତ୍ରୀ ହିସାବରେ ଚାକିରି ବଦଳରେ ଲାଞ୍ଚ ନେଇଥିବା ତାଙ୍କ ଉପରେ ଅଭିଯୋଗ ହୋଇଥିଲା। ସେ ମୋଟ ୪୭୧ ଦିନ ଜେଲରେ ରହିଥିଲେ। ଏହା ପରେ ସେ ସେପ୍ଟେମ୍ବର ୨୦୨୪ ରେ ସୁପ୍ରିମକୋର୍ଟରୁ ଜାମିନ ପାଇଥିଲେ। ସୁପ୍ରିମକୋର୍ଟଙ୍କ ପୂର୍ବରୁ ବାଲାଜୀ ମଧ୍ୟ ମାଡ୍ରାସ ହାଇକୋର୍ଟ ଏବଂ ନିମ୍ନ ଅଦାଲତରେ ଜାମିନ ଆବେଦନ କରିଥିଲେ ମଧ୍ୟ ପ୍ରତ୍ୟେକ ଥର ସେ ନିରାଶ ହୋଇଥିଲେ।
ଉଲ୍ଲେଖ ଯୋଗ୍ୟ ଯେ, ସେନ୍ଥିଲ ବାଲାଜୀ ପୂର୍ବରୁ AIADMK ରେ ଥିଲେ। ଅଭିଯୋଗ ହୋଇଛି ଯେ, ସେ AIADMK ସରକାର ସମୟରେ ମନ୍ତ୍ରୀ ଥିବାବେଳେ ବହୁ ଲାଞ୍ଚ ନେଇଥିଲେ। ବର୍ତ୍ତମାନ ବାଲାଜୀ DMK ରେ ଅଛନ୍ତି।
