ଭୁବନେଶ୍ୱର: ଆର୍ଥିକ ସ୍ୱାବଲମ୍ବନ ଏବଂ ଯାତ୍ରୀ-କୈନ୍ଦ୍ରିକ ବିକାଶ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ, ପୂର୍ବତଟ ରେଳପଥ ଏହାର ସମଗ୍ର ନେଟୱାର୍କରେ ରେଳ ସମ୍ପତ୍ତିର ଅଭିନବ ଏବଂ ବିବିଧ ଉପାୟ ବ୍ୟବହାର କରି ଅଣ-ଭଡ଼ା ରାଜସ୍ୱ ଆୟରେ ଉଲ୍ଲେଖନୀୟ ବୃଦ୍ଧି ହାସଲ କରିଛି। ପାରମ୍ପରିକ ଯାତ୍ରୀ ଏବଂ ମାଲ୍ ପରିବହନ ଆୟରୁ ଊର୍ଦ୍ଧ୍ୱକୁ ଯାଇ, ରେଳବାଇ ଏହାର ଅନେକ ସ୍ୱଳ୍ପ-ବ୍ୟବହୃତ ସମ୍ପତ୍ତି ଏବଂ ସେବା କ୍ଷେତ୍ରକୁ ସଫଳତାର ସହ ଆକର୍ଷଣୀୟ ରାଜସ୍ୱ ଉପାର୍ଜନକାରୀ ମାଧ୍ୟମରେ ରୂପାନ୍ତରିତ କରିଛି; ଯାହା ଯାତ୍ରୀମାନଙ୍କ ସୁବିଧା, ସ୍ଥାନୀୟ ନିଯୁକ୍ତି ସୃଷ୍ଟି ଏବଂ ପରିବେଶ ସ୍ଥିରତାରେ ମଧ୍ୟ ଯୋଗଦାନ ଦେଉଛି।
ଏହି ସଫଳତା ପୂର୍ବତଟ ରେଳପଥର ସେହି ଦୂରଦୃଷ୍ଟିକୁ ପ୍ରତିଫଳିତ କରେ ଯେଉଁଠାରେ ରେଳ ଭିତ୍ତିଭୂମିକୁ କେବଳ ପରିବହନ ସମ୍ପତ୍ତି ଭାବରେ ନୁହେଁ, ବରଂ ଗୋଷ୍ଠୀ-କେନ୍ଦ୍ରିକ ସ୍ଥାନ ଭାବରେ ବିକଶିତ କରାଯାଉଛି, ଯାହା ଯାତ୍ରା ଅଭିଜ୍ଞତାକୁ ସୁଧାରିବା ସହ ଅର୍ଥନୈତିକ ସୁଯୋଗ ସୃଷ୍ଟି କରୁଛି।
ସବୁଠାରୁ ଦୃଶ୍ୟମାନ ଓ ଲୋକପ୍ରିୟ ପଦକ୍ଷେପଗୁଡ଼ିକ ମଧ୍ୟରେ ଖୋର୍ଦ୍ଧା ରୋଡ୍, ପୁରୀ, ରାୟଗଡ଼ା, ଟିଟିଲାଗଡ଼, ମୁନିଗୁଡ଼ା ଏବଂ ହୀରାକୁଦ ଷ୍ଟେସନରେ କାର୍ଯ୍ୟକାରୀ ହୋଇଥିବା ‘ରେଳ କୋଚ୍ ରେଷ୍ଟୁରାଣ୍ଟ’ ଅନ୍ତର୍ଭୁକ୍ତ। ସୃଜନଶୀଳ ଭାବେ ପୁନଃବ୍ୟବହୃତ ଏହି କୋଚ୍ଗୁଡ଼ିକ ଲୋକପ୍ରିୟ ଭୋଜନସ୍ଥଳୀ ଭାବେ ପରିଚିତ ହୋଇଉଠିଛି। ଏଗୁଡ଼ିକ ଷ୍ଟେସନ ପରିସରର ସୌନ୍ଦର୍ଯ୍ୟବର୍ଦ୍ଧନ, ପର୍ଯ୍ୟଟନର ପ୍ରୋତ୍ସାହନ ଓ ସ୍ଥାନୀୟ ନିଯୁକ୍ତି ସୃଷ୍ଟିରେ ସହାୟକ ହେବା ସହିତ ୧,୩୬,୬୦,୩୬୯ ଟଙ୍କା ରାଜସ୍ୱ ଆଦାୟ କରିଛି।
ଯାତ୍ରୀ-କେନ୍ଦ୍ରିକ ଲଜିଷ୍ଟିକ୍ସ ସେବା ମଧ୍ୟ ଏଥିରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛି, ଯେଉଁଥିରେ ତାଳଚେର, ବ୍ରହ୍ମପୁର, ଭୁବନେଶ୍ୱର ଏବଂ ସମ୍ବଲପୁର ଷ୍ଟେସନରେ ଦୁଇଚକିଆ ଯାନ ପାର୍କିଙ୍ଗ ଚୁକ୍ତି ମାଧ୍ୟମରେ ଯାତ୍ରୀମାନଙ୍କୁ ସୁରକ୍ଷିତ ଏବଂ ସୁବିଧାଜନକ ପରିବହନ ସମାଧାନ ଯୋଗାଇ ଦିଆଯାଇ ୩୫,୪୮,୬୦୬ ଟଙ୍କା ଆୟ ହୋଇଛି। ଅନୁଗୁଳ BOXN ଶେଡ୍ ଏବଂ ସରଲା ଠାରେ ୱାଗନ୍ ସଫେଇ ଚୁକ୍ତିରୁ ୭୪,୪୫,୪୫୫ ଟଙ୍କା ରାଜସ୍ୱ ମିଳିଛି, ଯାହା ଉନ୍ନତ ମାଲ୍ ପରିବହନ କାର୍ଯ୍ୟକଳାପ, ସମ୍ପତ୍ତିର ରକ୍ଷଣାବେକ୍ଷଣ ଏବଂ ସ୍ୱଚ୍ଛ ରେଳ ଭିତ୍ତିଭୂମିକୁ ମଧ୍ୟ ସହାୟତା ପ୍ରଦାନ କରିଛି।
ଜମି ଲାଇସେନ୍ସ ପ୍ରଦାନ ପଦକ୍ଷେପଗୁଡ଼ିକ ଅଣ-ଭଡ଼ା ଆୟରେ ୬୯.୩୫ ଲକ୍ଷ ଟଙ୍କାର ଯୋଗଦାନ ଦେଇଛନ୍ତି; ଯେଉଁଥିରେ ଜଗଦଲପୁରଠାରେ କାର୍ଗୋ ସମ୍ବନ୍ଧୀୟ ଜମି ଲାଇସେନ୍ସରୁ ୬୧.୦୦ ଲକ୍ଷ ଟଙ୍କା, ହଣ୍ଡପାଠାରେ କୋଇଲା ଗଦା କରିବା ଏବଂ ଲୋଡିଂ କାର୍ଯ୍ୟ ପାଇଁ ଜମି ଲାଇସେନ୍ସରୁ ୬.୮୫ ଲକ୍ଷ ଟଙ୍କା ଏବଂ ସମ୍ବଲପୁର ଡିଭିଜନ ଅଧୀନରେ ଥିବା ବରଗଡ଼ ରୋଡ୍ ଷ୍ଟେସନରେ ଏକ ରେଳ ପୋଖରୀକୁ ଲିଜ୍ (leasing) ଦେବା ଦ୍ୱାରା ମିଳିଥିବା ୧.୫୦ ଲକ୍ଷ ଟଙ୍କା ସାମିଲ ଅଛି।
ପୋଖରୀ ଲିଜ୍ ଦେବା ପଦକ୍ଷେପଟି ବିଶେଷ ଭାବରେ ଉଲ୍ଲେଖନୀୟ, କାରଣ ଏହା ଦର୍ଶାଏ ଯେ କିପରି ରେଳ ସମ୍ପତ୍ତି ପରିବେଶ ସ୍ଥିରତାକୁ ରକ୍ଷା କରିବା ସହିତ ରାଜସ୍ୱ ସୃଷ୍ଟି କରିପାରିବ। ରେଳବାଇ ମାଲିକାନାରେ ଥିବା ଜଳାଶୟଗୁଡ଼ିକର ଉତ୍ପାଦନକ୍ଷମ ବ୍ୟବହାର ଜଳଜ ପରିସଂସ୍ଥାର ସଂରକ୍ଷଣ, ଜବରଦଖଲ ରୋକିବା ଏବଂ ସବୁଜ ପରିବେଶକୁ ପ୍ରୋତ୍ସାହିତ କରିବାରେ ସାହାଯ୍ୟ କରେ, ଯାହା ସମ୍ପତ୍ତି ମୁଦ୍ରାକରଣ ଏବଂ ପରିବେଶ ପରିଚାଳନା ମଧ୍ୟରେ ଏକ ସନ୍ତୁଳିତ ଏବଂ ଦାୟିତ୍ୱଶୀଳ ଆଭିମୁଖ୍ୟର ପ୍ରତିଫଳନ। ଅଣ-ଭଡ଼ା ରାଜସ୍ୱର ଏହି ଅଭିବୃଦ୍ଧି ପୂର୍ବତଟ ରେଳପଥର ସମ୍ପତ୍ତି ମୁଦ୍ରୀକରଣ, ଅଭିନବତା ଏବଂ ଦକ୍ଷ ସମ୍ବଳ ପରିଚାଳନା ଉପରେ ରଣନୈତିକ ଧ୍ୟାନକୁ ସ୍ପଷ୍ଟ କରୁଛି ।