ନୂଆଦିଲ୍ଲୀ: ନିମ୍ନ ଯୋଗ୍ୟତା ଥିବା ପ୍ରାର୍ଥୀଙ୍କ ପାଇଁ ଉଦ୍ଦିଷ୍ଟ ଚାକିରିରେ ଆବେଦନ କରିବା ସମୟରେ ନିଜର ଉଚ୍ଚ ଶିକ୍ଷାଗତ ଯୋଗ୍ୟତା ଲୁଚାଇବା ପ୍ରକୃତ ଯୋଗ୍ୟ ପ୍ରାର୍ଥୀଙ୍କ ଅଧିକାରକୁ କ୍ଷୁଣ୍ଣ କରେ ବୋଲି ସୁପ୍ରିମକୋର୍ଟ କହିଛନ୍ତି।
ଜଷ୍ଟିସ୍ ଆହସାନୁଦ୍ଦିନ୍ ଅମାନୁଲ୍ଲା ଓ ଜଷ୍ଟିସ୍ ଆର. ମହାଦେବନଙ୍କ ଖଣ୍ଡପୀଠ ଏକ ରାୟରେ କହିଛନ୍ତି ଯେ, ନିର୍ଦ୍ଦିଷ୍ଟ ଯୋଗ୍ୟତା ଥିବା ପ୍ରାର୍ଥୀଙ୍କ ପାଇଁ ସଂରକ୍ଷିତ ପଦବୀରେ ଅଧିକ ଯୋଗ୍ୟତା ଥିବା ବ୍ୟକ୍ତିଙ୍କୁ ନିଯୁକ୍ତି ଦେବା ଦ୍ୱାରା ପ୍ରକୃତ ହକଦାରଙ୍କୁ ସୁଯୋଗରୁ ବଞ୍ଚିତ କରାଯାଏ।
କୋର୍ଟ କହିଛନ୍ତି, ଚାକିରି ପାଇଁ ଆବଶ୍ୟକ ଯୋଗ୍ୟତାଠାରୁ ଅଧିକ ଯୋଗ୍ୟତା ରହିବା ମାତ୍ରେ କୌଣସି ପ୍ରାର୍ଥୀଙ୍କୁ ସେହି ଚାକିରି ପାଇବାର ସ୍ୱତଃସିଦ୍ଧ ଅଧିକାର ଦେଇନଥାଏ। ନିଯୁକ୍ତି କର୍ତ୍ତୃପକ୍ଷଙ୍କ ଦାୟିତ୍ୱ ହେଉଛି ଧାର୍ଯ୍ୟ ଯୋଗ୍ୟତା ମାନଦଣ୍ଡକୁ କଡ଼ାକଡ଼ି ପାଳନ କରିବା।
ରାୟରେ ସୁପ୍ରିମକୋର୍ଟ Jomon K.K. vs Shajimon P. ମାମଲାର ଉଲ୍ଲେଖ କରି କହିଛନ୍ତି ଯେ, ସରକାରୀ ନିଯୁକ୍ତି ସର୍ବଦା ବିଜ୍ଞପ୍ତିରେ ଧାର୍ଯ୍ୟ ଯୋଗ୍ୟତା ଅନୁଯାୟୀ ହେବା ଆବଶ୍ୟକ।
ସୁପ୍ରିମକୋର୍ଟଙ୍କ ଏହି ରାୟକୁ ସରକାରୀ ନିଯୁକ୍ତି ପ୍ରକ୍ରିୟାରେ ସ୍ୱଚ୍ଛତା ଓ ସମାନ ସୁଯୋଗ ସୁନିଶ୍ଚିତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ମତାମତ ଭାବେ ଦେଖାଯାଉଛି।