ଭୁବନେଶ୍ୱର: ପତ୍ର ସୂଚନା କାର୍ଯ୍ୟାଳୟ (ପିଆଇବି), ଭୁବନେଶ୍ୱର ପକ୍ଷରୁ ଆଜି ଭୁବନେଶ୍ୱରଠାରେ ସରକାରଙ୍କ ପ୍ରମୁଖ କାର୍ଯ୍ୟକ୍ରମଗୁଡ଼ିକ ଉପରେ ଏକ ଗଣମାଧ୍ୟମ କର୍ମଶାଳା ‘ବାର୍ତ୍ତା’ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମରେ ଗଣମାଧ୍ୟମ ପ୍ରତିନିଧି ଏବଂ ବିଶେଷଜ୍ଞମାନେ ଯୋଗା ଦେଇ ପ୍ରଭାବଶାଳୀ ଗଣଯୋଗାଯୋଗ ଏବଂ ବିକାଶମୂଳକ ପ୍ରଚାରପ୍ରସାର ଉପରେ ବିଚାରବିମର୍ଶ କରିଛନ୍ତି।
ଆଜିର ବାର୍ତ୍ତା କାର୍ଯ୍ୟକ୍ରମରେ ପତ୍ର ସୂଚନା କାର୍ଯ୍ୟାଳୟ (ପିଆଇବି) ଏବଂ କେନ୍ଦ୍ରୀୟ ସଞ୍ଚାର ବ୍ୟୁରୋ (ସିବିସି)ର ଅତିରିକ୍ତ ମହାନିର୍ଦ୍ଦେଶକ (ଓଡ଼ିଶା ଏବଂ ଝାଡ଼ଖଣ୍ଡ କ୍ଷେତ୍ର) ଅଖିଳ କୁମାର ମିଶ୍ର ଅଧ୍ୟକ୍ଷତା କରିଥିଲେ। ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗର କମିଶନର ତଥା ସଚିବ ଡକ୍ଟର ମୃଣାଳିନୀ ଦର୍ସୱାଲ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ। ଏହି ବୈଷୟିକ ଅଧିବେଶନରେ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗର ଅତିରିକ୍ତ ସଚିବ ବିଜୟ କୁମାର ଦାସ, ଓଡ଼ିଶା ସରକାରଙ୍କ ମୃତ୍ତିକା ସଂରକ୍ଷଣ ଓ ଜଳଛାୟା ବିକାଶ ନିର୍ଦ୍ଦେଶକ ସୁବ୍ରତ କୁମାର ପଣ୍ଡା, ଉତ୍କଳ ବିଶ୍ୱବିଦ୍ୟାଳୟର ଅର୍ଥନୀତି ବିଭାଗ ପ୍ରାଧ୍ୟାପିକା ଡକ୍ଟର ମିତାଲି ଚିନାରା, ସାମ୍ବାଦିକ ରାକେଶ ମହାନ୍ତି ପ୍ରମୁଖ ଉପସ୍ଥିତ ରହି ସରକାରଙ୍କ ପ୍ରମୁଖ ଯୋଜନା ଓ କାର୍ଯ୍ୟକ୍ରମ ସମ୍ପର୍କରେ ବକ୍ତବ୍ୟ ରଖିବା ସହିତ ପ୍ରଭାବୀ ଗଣଯୋଗାଯୋଗ ଉପରେ ସେମାନଙ୍କର ବିଚାର ବ୍ୟକ୍ତ କରିଥିଲେ।
ଅଖିଳ କୁମାର ମିଶ୍ର ତାଙ୍କ ଭାଷଣରେ ସରକାରୀ କାର୍ଯ୍ୟକ୍ରମର ପ୍ରଭାବଶାଳୀ ରୂପାୟନ ସୁନିଶ୍ଚିତ କରିବା ନିମନ୍ତେ ସଚ୍ଚୋଟ, ସମାବେଶୀ ଏବଂ ଲୋକକୈନ୍ଦ୍ରିକ ଯୋଗାଯୋଗ ଉପରେ ଗୁରୁତ୍ୱାରୋପ କରିଥିଲେ। ସମାଜର ସବୁଠାରୁ ପଛୁଆ ଏବଂ ସୂଚନାରୁ ବଞ୍ଚିତ ବର୍ଗର ସ୍ୱର ଶୁଣିବା ଏବଂ ସମାଧାନ କରାଯିବା ଉପରେ ସେ ଜୋର ଦେଇଥିଲେ। ଶ୍ରୀ ମିଶ୍ର କହିଥିଲେ, ଯୋଗାଯୋଗ ଏବଂ ପ୍ରଶାସନ ମିଳିତ ଭାବରେ କାର୍ଯ୍ୟ କରିବା ଉଚିତ ଯାହା ଦ୍ୱାରା ସରକାରୀ ଯୋଜନାଗୁଡ଼ିକ ନିର୍ଦ୍ଦିଷ୍ଟ ହିତାଧିକାରୀଙ୍କ ନିକଟରେ ପହଞ୍ଚିପାରିବ। ସେ ସୂଚନା ପ୍ରସାର କ୍ଷେତ୍ରରେ ରହିଥିବା ବ୍ୟବଧାନ ପୂରଣ କରିବା ସମ୍ପର୍କରେ ମତ ରଖିଥିଲେ। ଏଥିସହିତ ବିକାଶମୂଳକ ଖବର ପ୍ରସାରଣ କରିବା ଏବଂ ଦେଶ ନିର୍ମାଣ ପ୍ରୟାସରେ ଅଧିକ ଜନସଚେତନତା ଓ ଅଂଶଗ୍ରହଣକୁ ପ୍ରୋତ୍ସାହିତ କରିବାରେ ସାମ୍ବାଦିକ ଏବଂ ଗଣମାଧ୍ୟମ ପେସାଦାରଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ।
ଏହି ଅବସରରେ ଡକ୍ଟର ମୃଣାଳିନୀ ଦର୍ସୱାଲ ପୁଷ୍ଟିସାଧନ, ମହିଳା ସଶକ୍ତିକରଣ, ପ୍ରାରମ୍ଭିକ ଶୈଶବ ଶିକ୍ଷା ଏବଂ ଆର୍ଥିକ ଅନ୍ତର୍ଭୁକ୍ତିକରଣ କ୍ଷେତ୍ରରେ ପ୍ରମୁଖ ସରକାରୀ ଯୋଜନା ଓ ପଦକ୍ଷେପଗୁଡ଼ିକର ପରିବର୍ତ୍ତନକାରୀ ପ୍ରଭାବ ଉପରେ ଆଲୋକପାତ କରିଥିଲେ। ପୋଷଣ ୨.୦, ସକ୍ଷମ ଅଙ୍ଗନୱାଡି, ମିଶନ ଶକ୍ତି ଏବଂ ସୁଭଦ୍ରା ଭଳି କାର୍ଯ୍ୟକ୍ରମ ବିଷୟରେ ସେ ମତ ରଖିଥିଲେ। ସେ କହିଥିଲେ, ହିତାଧିକାରୀଙ୍କୁ ପ୍ରାଥମିକତା ଦେବା ଲାଗି ସରକାରଙ୍କ ଆଭିମୁଖ୍ୟ ଏବଂ ତୃଣମୂଳ ସ୍ତରରେ ସେବା ପ୍ରଦାନକୁ ସୁଦୃଢ଼ କରିବା ପାଇଁ ପ୍ରଯୁକ୍ତିବିଦ୍ୟା ବ୍ୟବହାର କରିବାର ଆବଶ୍ୟକତା ରହିଛି । ସରକାର ରାଜ୍ୟରେ ପୋଷଣ ଏବଂ ଶିଶୁ ବିକାଶ କ୍ଷେତ୍ରରେ ଉଲ୍ଲେଖନୀୟ ନିବେଶ କରୁଛନ୍ତି । ସଂସ୍ଥାଗତ ସହାୟତା ଏବଂ ଆର୍ଥିକ ସୁଯୋଗ ମାଧ୍ୟମରେ ମହିଳାମାନଙ୍କୁ ସଶକ୍ତ କରିବା ଲାଗି ପଦକ୍ଷେପ ନିଆଯାଉଛି । ପ୍ରତ୍ୟେକ ଯୋଗ୍ୟ ନାଗରିକଙ୍କ ନିକଟରେ ଯୋଜନା ଓ କାର୍ଯ୍ୟକ୍ରମର ଲାଭ ପହଞ୍ଚାଇବା ପାଇଁ କଲ୍ୟାଣକାରୀ ଯୋଜନା ଏବଂ ବିକାଶମୂଳକ ପଦକ୍ଷେପ ସମ୍ପର୍କରେ ସୂଚନା ପ୍ରସାରଣରେ ଗଣମାଧ୍ୟମର ଅଧିକ ଅଂଶଗ୍ରହଣ ପାଇଁ ଡକ୍ଟର ଦର୍ସୱାଲ ଆହ୍ୱାନ କରିଥିଲେ।
ଶ୍ରୀ ବିଜୟ କୁମାର ଦାସ ସ୍ୱାସ୍ଥ୍ୟସେବା ଭିତ୍ତିଭୂମିକୁ ସୁଦୃଢ଼ କରିବା, ଗୁଣାତ୍ମକ ସ୍ୱାସ୍ଥ୍ୟସେବା ଉପଲବ୍ଧତାକୁ ବିସ୍ତାର କରିବା ଏବଂ ପ୍ରତିରୋଧକ ସ୍ୱାସ୍ଥ୍ୟସେବାକୁ ପ୍ରୋତ୍ସାହିତ କରିବାର ଗୁରୁତ୍ୱ ଉପରେ ଆଲୋକପାତ କରିଥିଲେ। ରାଜ୍ୟବ୍ୟାପୀ ଉନ୍ନତ ସ୍ୱାସ୍ଥ୍ୟସେବା ପ୍ରଦାନ ସୁନିଶ୍ଚିତ କରିବା ପାଇଁ ଆୟୁଷ୍ମାନ ଆରୋଗ୍ୟ ମନ୍ଦିର, ଡିଜିଟାଲ୍ ସ୍ୱାସ୍ଥ୍ୟ ବ୍ୟବସ୍ଥା, ପ୍ରାରମ୍ଭିକ ରୋଗ ଯାଞ୍ଚ ଏବଂ ସ୍ୱାସ୍ଥ୍ୟସେବା ପେସାଦାରଙ୍କ ଦକ୍ଷତା ବିକାଶ ଭଳି ପଦକ୍ଷେପ ସମ୍ପର୍କରେ ସେ ମତ ରଖିଥିଲେ ।
ଶ୍ରୀ ସୁବ୍ରତ କୁମାର ପଣ୍ଡା କୃଷି ଅଭିବୃଦ୍ଧିର ପ୍ରାଥମିକ ବାହକ ଭାବରେ ଜଳ, ମାଟି ଏବଂ ପ୍ରଯୁକ୍ତିବିଦ୍ୟାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ, ଜଳସେଚନକୁ ସୁଦୃଢ଼ କରିବା, ପ୍ରାକୃତିକ କୃଷିକୁ ପ୍ରୋତ୍ସାହିତ କରିବା, କୃଷକଙ୍କ ବଜାର ପ୍ରବେଶକୁ ଉନ୍ନତ କରିବା ଏବଂ ଉତ୍ପାଦକତା ବୃଦ୍ଧି ପାଇଁ ଡିଜିଟାଲ ଉଦ୍ଭାବନ ବ୍ୟବହାର କରିବା ପାଇଁ ସରକାରୀ ସ୍ତରରେ ବ୍ୟାପକ ପ୍ରୟାସ ଜାରି ରହିଛି । ଖାଦ୍ୟ ସୁରକ୍ଷା ଏବଂ କୃଷି ରପ୍ତାନିରେ ଓଡ଼ିଶାର ଅବଦାନ ବଢ଼ୁଥିବା ସମ୍ପର୍କରେ ସେ ସୂଚନା ଦେଇଥିଲେ ।
ଡକ୍ଟର ମିତାଲି ଚିନାରା ଆର୍ଥିକ ଅନ୍ତର୍ଭୁକ୍ତିକରଣ, ଉଦ୍ୟୋଗ ବିକାଶ ଏବଂ ସାମାଜିକ ସଶକ୍ତିକରଣକୁ ଆଗକୁ ବଢ଼ାଇବାରେ ମହିଳା-କୈନ୍ଦ୍ରିକ ପଦକ୍ଷେପର ପରିବର୍ତ୍ତନକାରୀ ପ୍ରଭାବ ଉପରେ ଆଲୋକପାତ କରିଥିଲେ। ସେ କହିଥିଲେ, ବ୍ୟାଙ୍କିଙ୍ଗ, ସ୍ୱୟଂ ସହାୟକ ଗୋଷ୍ଠୀ, ଜୀବିକା ସୁଯୋଗ ଏବଂ ଡିଜିଟାଲ ପ୍ରଯୁକ୍ତିବିଦ୍ୟା କ୍ଷେତ୍ରରେ ପ୍ରଗତି ଫଳରେ ଦେଶର ବିକାଶ ଯାତ୍ରାରେ ମହିଳାମାନଙ୍କ ଅଂଶଗ୍ରହଣ ସୁଦୃଢ଼ ହୋଇଛି।
ଶ୍ରୀ ରାକେଶ ମହାନ୍ତି କହିଥିଲେ, ବିକାଶମୂଳକ ସାମ୍ବାଦିକତାକୁ ପ୍ରୋତ୍ସାହିତ କରିବା ଏବଂ ଜନ କଲ୍ୟାଣକାରୀ ପଦକ୍ଷେପ ସମ୍ପର୍କରେ ସୂଚନା ନାଗରିକମାନଙ୍କ ପାଖରେ ପ୍ରଭାବଶାଳୀ ଭାବରେ ପହଞ୍ଚାଇବାରେ ଗଣମାଧ୍ୟମର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ଭିତ୍ତିଭୂମି ବିକାଶ, ଡିଜିଟାଲ ଯୋଗାଯୋଗ ଏବଂ ସମାବେଶୀ ଅଭିବୃଦ୍ଧି ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହି ପରିପ୍ରେକ୍ଷୀରେ ସେ ଗଣମାଧ୍ୟମ ପ୍ରତିନିଧିମାନଙ୍କୁ ବିକାଶମୂଳକ ଖବର ପ୍ରସାରଣ ଉପରେ ଅଧିକ ଧ୍ୟାନ ଦେବା ସହିତ ବିକଶିତ ଓଡ଼ିଶା ଏବଂ ବିକଶିତ ଭାରତର ଦୃଷ୍ଟିକୋଣରେ ସକ୍ରିୟ ଭାବରେ ଯୋଗଦାନ ଦେବାକୁ ଆହ୍ୱାନ କରିଥିଲେ।
ସିବିସିର ସହାୟକ ନିର୍ଦ୍ଦେଶକ ଶ୍ରୀ ପ୍ରଦୀପ କୁମାର ଚୌଧୁରୀ ଅଂଶଗ୍ରହଣକାରୀମାନଙ୍କୁ ସ୍ୱାଗତ କରିଥିଲେ । ସେ କହିଥିଲେ, ଆଲୋଚନା ଏବଂ ସୂଚନାର ଆଦାନପ୍ରଦାନ ପାଇଁ ‘ବାର୍ତ୍ତା’ ଏକ ଗୁରୁତ୍ୱପୂର୍ଣ୍ଣ ମଞ୍ଚ । ପିଆଇବି ଭୁବନେଶ୍ୱରର ସହାୟକ ନିର୍ଦ୍ଦେଶକ ମହେନ୍ଦ୍ର କୁମାର ଜେନା ଧନ୍ୟବାଦ ଅର୍ପଣ କରିବା ସହିତ କାର୍ଯ୍ୟକ୍ରମ ଶେଷ ହୋଇଥିଲା। ବିଭିନ୍ନ ଗଣମାଧ୍ୟମ ସଂସ୍ଥାର ସାମ୍ବାଦିକମାନେ କର୍ମଶାଳାରେ ଅଂଶଗ୍ରହଣ କରିଥିଲେ ଏବଂ କଲ୍ୟାଣକାରୀ ଯୋଜନା ଏବଂ ନୀତି ଉପରେ ବକ୍ତାମାନଙ୍କ ସହିତ ଭାବବିନିମୟ କରିଥିଲେ।