ମୁମ୍ବାଇ: ମହାରାଷ୍ଟ୍ର ରାଜନୀତିରେ ଶୁକ୍ରବାର ଏକ ଅପ୍ରତ୍ୟାଶିତ ଦୃଶ୍ୟ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ରାଜ୍ୟର ଦୁଇ ପ୍ରମୁଖ ରାଜନୈତିକ ପ୍ରତିଦ୍ୱନ୍ଦ୍ୱୀ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ ଓ ଶିବସେନା (UBT) ମୁଖ୍ୟ ଉଦ୍ଧବ ଠାକରେ ଏକା ବିମାନରେ ମୁମ୍ବାଇରୁ ନାଗପୁର ଯାତ୍ରା କରୁଥିବା ଦେଖାଯାଇଛି। ବିମାନ ଭିତରେ ଦୁଇ ନେତା ପରସ୍ପରକୁ ଅଭିବାଦନ ଜଣାଇବା ସହ ହାତ ମିଳାଇଥିଲେ। ଏହାର ଫଟୋ ସାମ୍ନାକୁ ଆସିବା ପରେ ମହାରାଷ୍ଟ୍ରର ରାଜନୈତିକ ମହଲରେ ନୂଆ କଳ୍ପନାଜଳ୍ପନା ଆରମ୍ଭ ହୋଇଛି।
ଯଦିଓ ଏହି ସାକ୍ଷାତକୁ ନେଇ ବିଭିନ୍ନ ରାଜନୈତିକ ଚର୍ଚ୍ଚା ଜୋର ଧରିଛି, ଉଭୟ ପକ୍ଷର ନେତାମାନେ ଏହାକୁ କେବଳ ଏକ ସୌଜନ୍ୟମୂଳକ ସାକ୍ଷାତ ବୋଲି କହିଛନ୍ତି। ରାଜନୈତିକ ମତଭେଦ ଥିଲେ ମଧ୍ୟ ସାର୍ବଜନୀନ ଜୀବନରେ ପରସ୍ପରକୁ ସମ୍ମାନ ଜଣାଇବା ସାଧାରଣ କଥା ବୋଲି ସେମାନେ ସ୍ପଷ୍ଟ କରିଛନ୍ତି।
ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ ତାଙ୍କ ପୂର୍ବ ନିର୍ଦ୍ଧାରିତ ସରକାରୀ ଏବଂ ସାଂଗଠନିକ କାର୍ଯ୍ୟକ୍ରମ ପାଇଁ ନାଗପୁର ଯାଉଥିଲେ। ଅନ୍ୟପକ୍ଷରେ ଉଦ୍ଧବ ଠାକରେ ବିଦର୍ଭ ଓ ମରାଠୱାଡାର ତିନି ଦିନିଆ ସାଂଗଠନିକ ଗସ୍ତରେ ଯାଇଛନ୍ତି। ଏହି ଗସ୍ତରେ ସେ ସେହି ଲୋକସଭା କ୍ଷେତ୍ରଗୁଡ଼ିକୁ ଯିବେ, ଯେଉଁଠାରେ ତାଙ୍କ ଦଳର ପୂର୍ବତନ ସାଂସଦମାନେ ଏକନାଥ ସିନ୍ଦେ ଶିବିରକୁ ଯାଇଛନ୍ତି।
ଏକା ବିମାନରେ ଦୁଇ ରାଜନୈତିକ ପ୍ରତିଦ୍ୱନ୍ଦ୍ୱୀଙ୍କ ଯାତ୍ରା ଏବଂ ହସି ହସି ହାତ ମିଳାଇବା ଘଟଣାକୁ ନେଇ ସୋସିଆଲ୍ ମିଡିଆରୁ ଆରମ୍ଭ କରି ରାଜନୈତିକ ମହଲ ପର୍ଯ୍ୟନ୍ତ ଚର୍ଚ୍ଚା ଜୋର ଧରିଛି। ତେବେ ଉଭୟ ପକ୍ଷ ଏହାକୁ କୌଣସି ରାଜନୈତିକ ସମୀକରଣ ସହ ଯୋଡ଼ି ନ ଦେଖିବାକୁ ଅନୁରୋଧ କରିଛନ୍ତି।
ମହାରାଷ୍ଟ୍ରର ରାଜନୀତିରେ ଏହି ଦୃଶ୍ୟ ନୂଆ ଚର୍ଚ୍ଚା ସୃଷ୍ଟି କରିଥିଲେ ମଧ୍ୟ, ବର୍ତ୍ତମାନ ସୁଦ୍ଧା ଏହାକୁ କେବଳ ଏକ ସୌଜନ୍ୟମୂଳକ ସାକ୍ଷାତ ବୋଲି ଦେଖାଯାଉଛି।