ଚେନ୍ନାଇ: ତାମିଲନାଡୁରେ ଅବସ୍ଥିତ ଦେଶର ସର୍ବବୃହତ କୁଡନକୁଲମ ପରମାଣୁ ଶକ୍ତି କେନ୍ଦ୍ର ସହିତ ଜଡିତ ସମ୍ବେଦନଶୀଳ ତଥ୍ୟ ଲିକ୍ ହୋଇଛି। ୱାର୍ଲ୍ଡ ଲିକ୍ସ ନାମରେ ଜଣାଶୁଣା ଦୁଇଟି ହ୍ୟାକର ଗୋଷ୍ଠୀ ପାୱାର ପ୍ଲାଣ୍ଟ ବିଷୟରେ ସୂଚନା ପୋଷ୍ଟ କରିଛନ୍ତି, ଯେଉଁଥିରେ ପ୍ଲାଣ୍ଟର କିଛି ଅଂଶର ବ୍ଲୁପ୍ରିଣ୍ଟ, ଯୋଗାଣକାରୀ ସୂଚନା, ବୈଠକ ଏବଂ ଯାଞ୍ଚ ରେକର୍ଡ, ଉପକରଣ ସମୀକ୍ଷା ଏବଂ ବୀମା ପଲିସି ସହିତ ଜଡିତ ପ୍ରାୟ ୧୯,୦୦୦ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟର ବିବରଣୀ ଅନ୍ତର୍ଭୁକ୍ତ। ୱାର୍ଲ୍ଡ ଲିକ୍ସ ହ୍ୟାକର ଗୋଷ୍ଠୀ ଦାବି କରିଛି ଯେ, ଏହି ଡକ୍ୟୁମେଣ୍ଟଗୁଡ଼ିକ ଅନିଲ ଅମ୍ବାନୀଙ୍କ ରିଲାଏନ୍ସ ଗ୍ରୁପର, ଯାହା ପ୍ଲାଣ୍ଟର ଠିକାଦାର ଭାବରେ କାର୍ଯ୍ୟ କରୁଛି।
ସରକାରଙ୍କୁ ସୂଚନା ଦେଲା ରିଲାଏନ୍ସ ଗ୍ରୁପ
ତାମିଲନାଡୁରେ ଅବସ୍ଥିତ କୁଡନକୁଲମ ପରମାଣୁ ଶକ୍ତି କେନ୍ଦ୍ର ହେଉଛି ଭାରତର ସାତଟି ପରମାଣୁ କେନ୍ଦ୍ର ମଧ୍ୟରୁ ସର୍ବବୃହତ। ସୂଚନା ଅନୁଯାୟୀ, ଅନିଲ ଅମ୍ବାନୀଙ୍କ ରିଲାଏନ୍ସ ଗ୍ରୁପ ରିପୋର୍ଟ କରିଛି ଯେ ଏହାର ତଥ୍ୟ ଆଂଶିକ ଭାବରେ ଲିକ ହୋଇଛି। କମ୍ପାନୀ କହିଛି ଯେ, ଡାଟା ତୃତୀୟ-ପକ୍ଷ ଡାଟା ସେଣ୍ଟର ସେବା ପ୍ରଦାନକାରୀ ୟୋଟାର ସର୍ଭରରେ ହୋଷ୍ଟ କରାଯାଇଥିଲା। ରିଲାଏନ୍ସ ଘଟଣା ବିଷୟରେ ଭାରତ ସରକାରଙ୍କୁ ସୂଚନା ଦେଇଛି। ତଥାପି, କମ୍ପାନୀ ଚୋରି ହୋଇଥିବା ତଥ୍ୟର ପ୍ରକାର ପ୍ରକାଶ କରିନାହିଁ।
ନ୍ୟୁକ୍ଲିୟର ଥ୍ରେଟ୍ ଇନିସିଏଟିଭ୍ ର ବରିଷ୍ଠ ନିର୍ଦ୍ଦେଶକ ନିକୋଲାସ୍ ରୋଥ୍ କହିଛନ୍ତି ଯେ, ତଥ୍ୟ ଲିକ୍ ହେଉଛି ପ୍ଳାଣ୍ଟ ସୁରକ୍ଷା ପାଇଁ ଏକ ଗମ୍ଭୀର ବିପଦ। ଏପରି ଘଟଣା କମ୍ପାନୀଗୁଡ଼ିକର ଏହି ବିପଦଗୁଡ଼ିକର ମୁକାବିଲା କରିବାର କ୍ଷମତା ଉପରେ ପ୍ରଶ୍ନ ଉଠାଇଛି।
ଲିକ୍ ହୋଇଥିବା ୧୯,୦୦୦ ଫାଇଲ୍ ସବୁଠାରୁ ସମ୍ବେଦନଶୀଳ
ରଏଟର୍ସ ଦାବି କରିଛି ଯେ, ସେମାନେ ୨୦୧୬ ରୁ ୨୦୨୫ ପର୍ଯ୍ୟନ୍ତ ଲିକ୍ ହୋଇଥିବା ଦଲିଲଗୁଡ଼ିକୁ ଯାଞ୍ଚ କରିଛନ୍ତି। ତଥାପି ଏହି ଖବର ସଂସ୍ଥା ଏହି ଫାଇଲଗୁଡ଼ିକର ସତ୍ୟତାକୁ ନିଶ୍ଚିତ କରିନାହିଁ। ୱାର୍ଲ୍ଡ ଲିକ୍ସ ୱେବସାଇଟରେ ଉପଲବ୍ଧ ୮,୫୮,୦୦୦ ରିଲାଏନ୍ସ ଫାଇଲ୍ ମଧ୍ୟରୁ ୧୯,୦୦୦ ସବୁଠାରୁ ସମ୍ବେଦନଶୀଳ ଏବଂ ଗୁପ୍ତ ମନେହୁଏ।
ରିଲାଏନ୍ସ ଗ୍ରୁପ୍ କମ୍ପାନୀ ରିଲାଏନ୍ସ ଇନଫ୍ରାଷ୍ଟକ୍ଚରକୁ ୨୦୧୮ ମସିହାରେ କୁଡନକୁଲମ୍ ପ୍ଲାଣ୍ଟର ୟୁନିଟ୍ ୩ ଏବଂ ୟୁନିଟ୍ ୪ ର ଡିଜାଇନ୍ ଏବଂ ନିର୍ମାଣ ପାଇଁ ଚୁକ୍ତିନାମା ଦିଆଯାଇଥିଲା। ଉଭୟ ୟୁନିଟ୍ ବର୍ତ୍ତମାନ ନିର୍ମାଣାଧୀନ ଏବଂ ୨୦୨୭ ସୁଦ୍ଧା କାର୍ଯ୍ୟକ୍ଷମ ହେବାର ଆଶା କରାଯାଉଛି। କାର୍ଯ୍ୟକ୍ଷମ ହେବା ପରେ ସେଥିରେ ମୋଟ ୨୦୦୦ ମେଗାୱାଟ୍ ବିଦ୍ୟୁତ୍ ଉତ୍ପାଦନ କରିବେ।