ପୁରୀ: ଆଜି ଏକ ଘଣ୍ଟା ବିଳମ୍ବରେ ଆରମ୍ଭ ହୋଇଥିଲା ରଥଟଣା। ଫଳରେ ରାତି ହୋଇଯିବାରୁ ନିୟମ ଅନୁସାରେ ରଥଟଣା ବନ୍ଦ କରାଯାଇଛି। ବର୍ତ୍ତମାନ ବଳଭଦ୍ରଙ୍କ ରଥ ତାଳଧ୍ବଜ ମାର୍କେଟ ଛକ, ସୁଭଦ୍ରାଙ୍କ ଦର୍ପଦଳନ ମରିଚିକୋଟ ଛକରେ ଅଟକି ରହିଛି। ପ୍ରଭୃ ଜଗନ୍ନାଥଙ୍କ ନନ୍ଦିଘୋଷ ରଥ ସିଂହଦ୍ବାରରୁ ଅଳ୍ପ ଦୂର ଟଣା ହେବାପରେ ସେହିଠାରେ ଅଟକି ରହିଛି। ଆଜି ସନ୍ଧ୍ୟା ୫ଟାରୁ ଆରମ୍ଭ ହୋଇଥିବା ରଥଟଣା କାର୍ଯ୍ୟ ରାତି ପ୍ରାୟ ୭ଟା ୨୫ରେ ବନ୍ଦ କରାଯାଇଛି। ଶ୍ରୀମନ୍ଦିର ପ୍ରଶାସନ ସୂଚନା ଅନୁସାରେ ଆସନ୍ତାକାଲି ସକାଳ ନଅ ଟା ତିରିଶିରେ ପୁଣି ରଥଟଣା ହେବ। ସେଥିପାଇଁ ସମସ୍ତ ପ୍ରସ୍ତୁତି ପ୍ରଶାସନ ତରଫରୁ କରାଯାଇଛି।
ଆଜି ପୁରୀରେ ବର୍ଷା ସତ୍ବେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା। ପ୍ରଭୃଙ୍କ ରଥଟାଣିବା ପାଇଁ ବହୁ ସମୟ ଧରି ଭକ୍ତମାନେ ଅପେକ୍ଷା କରିଥିଲେ। ସକାଳୁ ତିନିଠାକୁରଙ୍କ ପହଣ୍ଡି ବିଜେ କରାଯାଇ ରଥାଋଢ କରାଯାଇଥିଲା। ପ୍ରଥମେ ସୁଦର୍ଶନ ରଥରେ ବିଜେ କରିଥିଲେ। ଏହାପରେ ବଡଭାଇ ବଳଭଦ୍ର, ମା ସୁଭଦ୍ରା ଏବଂ ଶେଷରେ ପ୍ରଭୃ ଜଗନ୍ନାଥ ରଥରେ ବିଜେ କରିଥିଲେ। ବର୍ଷାରେ ଓଦା ହୋଇ ଠାକୁର ରଥ ଉପରେ ବସିଥିଲେ। ଏହାପରେ ଗଜପତି ମହାରାଜାଙ୍କ ଛେରା ପହଁରା ନୀତି ଶେଷ ହେବା ପରେ ରଥଟଣା ଆରମ୍ଭ ହୋଇଥିଲା।