ଚଣ୍ଡୀଗଡ଼: ଆସନ୍ତା ବର୍ଷ ପଞ୍ଜାବ ବିଧାନସଭା ନିର୍ବାଚନ। ନିର୍ବାଚନ ପୂର୍ବରୁ ରାଜ୍ୟରେ ରାଜନୈତିକ ତାତି ବଢ଼ାଇବାକୁ ବିଜେପି ଏବେଠାରୁ ପ୍ରସ୍ତୁତି ଆରମ୍ଭ କରିଛି। ଆମ ଆଦମୀ ପାର୍ଟି ସରକାରକୁ ଘେରିବା ସହ ନିଶା ସମସ୍ୟାକୁ ଏକ ପ୍ରମୁଖ ରାଜନୈତିକ ପ୍ରସଙ୍ଗ କରିବା ଦିଗରେ ଦଳ ରଣନୀତି ପ୍ରସ୍ତୁତ କରୁଛି।
ଏହି ରଣନୀତିର ଅଂଶ ଭାବେ ପଞ୍ଜାବର ଚାରୋଟି ଅଞ୍ଚଳରୁ ଏକାସାଙ୍ଗରେ ବାହାରିବ ‘ନିଶା ବିରୋଧୀ ଯାତ୍ରା’। ସେପ୍ଟେମ୍ବର ୧୮ରୁ ଆରମ୍ଭ ହେବାକୁ ଥିବା ଏହି ଯାତ୍ରା ପ୍ରାୟ ଦୁଇ ସପ୍ତାହ ଧରି ରାଜ୍ୟର ବିଭିନ୍ନ ଅଞ୍ଚଳ ପରିକ୍ରମା କରିବ। ସୂତ୍ର ଅନୁସାରେ, ବିଜେପି ସଭାପତି ନୀତିନ ନବୀନ ଯାତ୍ରାର ଶୁଭାରମ୍ଭ କରିବେ। ଏଥିରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମଧ୍ୟ ସାମିଲ ହେବାର ସମ୍ଭାବନା ରହିଛି।
୪ ଦିଗରୁ ବିଜେପିର ମେଗା ଅଭିଯାନ
ବିଜେପି ଏହି ଅଭିଯାନକୁ କେବଳ ଗୋଟିଏ ଅଞ୍ଚଳରେ ସୀମିତ ନରଖି ସମଗ୍ର ପଞ୍ଜାବକୁ କଭର କରିବାକୁ ଯୋଜନା କରିଛି। ଚାରୋଟି ଭିନ୍ନ ଅଞ୍ଚଳରୁ ଯାତ୍ରା ବାହାରି ବିଧାନସଭା ନିର୍ବାଚନମଣ୍ଡଳୀ, ସହର ଓ ଗାଁଗୁଡ଼ିକରେ ପହଞ୍ଚିବ।
ଉତ୍ତର ପଞ୍ଜାବରେ ପଠାନକୋଟର ଲଖନପୁର/ମାଧୋପୁରରୁ ପ୍ରଥମ ଯାତ୍ରା ଆରମ୍ଭ ହେବ। ଦ୍ୱିତୀୟ ଯାତ୍ରା ମାଲୱା ଅଞ୍ଚଳର ତଖ୍ତ ଶ୍ରୀ ଦମଦମା ସାହିବ, ତାଳୱଣ୍ଡି ସାବୋରୁ ବାହାରିବ। ତୃତୀୟ ଯାତ୍ରା ଶ୍ରୀ ଆନନ୍ଦପୁର ସାହିବ/ଫତେହଗଡ଼ ସାହିବ ଅଞ୍ଚଳରୁ ଏବଂ ଚତୁର୍ଥ ଯାତ୍ରା ଭାରତ-ପାକିସ୍ତାନ ସୀମା ନିକଟ ଫାଜିଲକାର ବୀର ଭୂମି ସ୍ମାରକୀରୁ ଆରମ୍ଭ ହେବ।
ଟାର୍ଗେଟ୍ରେ ୧୧୭ ବିଧାନସଭା ଆସନ
ବିଜେପିର ଏହି ଅଭିଯାନର ସବୁଠାରୁ ବଡ଼ ଲକ୍ଷ୍ୟ ହେଉଛି ପଞ୍ଜାବର ସମସ୍ତ ୧୧୭ଟି ବିଧାନସଭା ଆସନରେ ପହଞ୍ଚିବା। ପ୍ରାୟ ଦୁଇ ସପ୍ତାହ ଧରି ଚାଲିବାକୁ ଥିବା ଯାତ୍ରା ସମୟରେ ଦଳୀୟ କର୍ମୀଙ୍କ ସହ ଯୁବପିଢ଼ି, ସ୍ଥାନୀୟ ସଂଗଠନ ଓ ବିଭିନ୍ନ ସାମାଜିକ ଗୋଷ୍ଠୀଙ୍କୁ ଯୋଡ଼ିବା ଉପରେ ଗୁରୁତ୍ୱ ଦିଆଯିବ।
ନିଶାଦ୍ରବ୍ୟର କୁପ୍ରଭାବ, ଯୁବପିଢ଼ି ଉପରେ ଏହାର ପ୍ରଭାବ ଏବଂ ପରିବାର ଓ ସମାଜ ଉପରେ ଏହାର ପରିଣାମକୁ ନେଇ ଜନସଚେତନତା ସୃଷ୍ଟି କରାଯିବ। ଏଥିପାଇଁ ବିଜେପିର ପ୍ରଚାର ରଥ ମଧ୍ୟ ରାଜ୍ୟର ବିଭିନ୍ନ ଗାଁ ଓ ସ୍ଥାନୀୟ ଅଞ୍ଚଳରେ ପହଞ୍ଚିବ।
ନିଶା ପ୍ରସଙ୍ଗରେ ‘ଆପ୍’ ସରକାରକୁ ଘେରିବ ବିଜେପି?
ପଞ୍ଜାବ ରାଜନୀତିରେ ନିଶା ସମସ୍ୟା ଦୀର୍ଘଦିନ ଧରି ଏକ ସମ୍ବେଦନଶୀଳ ପ୍ରସଙ୍ଗ ହୋଇଆସିଛି। ଏବେ ବିଜେପି ଏହାକୁ ନେଇ ରାଜ୍ୟବ୍ୟାପୀ ଅଭିଯାନ ଆରମ୍ଭ କରୁଥିବାରୁ ଏହାର ରାଜନୈତିକ ପ୍ରଭାବକୁ ନେଇ ଚର୍ଚ୍ଚା ବଢ଼ିଛି।
ଦଳର ଉଦ୍ଦେଶ୍ୟ କେବଳ ନିଶା ବିରୋଧରେ ସଚେତନତା ସୃଷ୍ଟି କରିବା ନୁହେଁ, ବରଂ ଏହି ପ୍ରସଙ୍ଗକୁ ନେଇ ଆମ ଆଦମୀ ପାର୍ଟି ସରକାରଙ୍କୁ ରାଜନୈତିକ ଭାବେ ଘେରିବା ମଧ୍ୟ ରହିଥିବା ଚର୍ଚ୍ଚା ହେଉଛି। ନିର୍ବାଚନ ପୂର୍ବରୁ ଗ୍ରାଉଣ୍ଡରେ ନିଜ ସଂଗଠନକୁ ସକ୍ରିୟ କରିବାରେ ଏହି ଯାତ୍ରା ବିଜେପି ପାଇଁ ଏକ ବଡ଼ ସୁଯୋଗ ହୋଇପାରେ।
ଜଳନ୍ଧରରେ ହେବ ବଡ଼ ସମାବେଶ
ରାଜ୍ୟର ବିଭିନ୍ନ ଅଞ୍ଚଳ ପରିକ୍ରମା କରିବା ପରେ ଚାରୋଟି ଯାତ୍ରା ଜଳନ୍ଧରରେ ଏକାଠି ହେବ। ଏହା ପରେ ବିଜେପି ପକ୍ଷରୁ ଏକ ବଡ଼ ରାଲି ଆୟୋଜନ କରାଯିବାକୁ ଯୋଜନା ରହିଛି। ରାଲିରେ ଦଳର ବରିଷ୍ଠ ନେତାମାନେ ସାମିଲ ହେବେ।
ଏହି ଯାତ୍ରା ଓ ଜଳନ୍ଧର ରାଲି ମାଧ୍ୟମରେ ନିର୍ବାଚନର ଅନେକ ମାସ ପୂର୍ବରୁ ପଞ୍ଜାବରେ ରାଜନୈତିକ ମାହୋଲ ନିଜ ସପକ୍ଷରେ ତିଆରି କରିବାକୁ ବିଜେପି ଉଦ୍ୟମ କରୁଥିବା ଚର୍ଚ୍ଚା ହେଉଛି। ଏବେ ନଜର ରହିଛି, ନିଶା ବିରୋଧୀ ଏହି ଅଭିଯାନ ବିଜେପି ପାଇଁ କେତେ ରାଜନୈତିକ ଲାଭ ଆଣୁଛି।