ଭୁବନେଶ୍ବର: ଗଞ୍ଜେଇ ମାଫିଆଙ୍କ ସହ ଅସାଧୁ ସମ୍ପର୍କ ଏବଂ କାର୍ଯ୍ୟରେ ଅନିୟମିତତା ଅଭିଯୋଗକୁ ନେଇ ଚର୍ଚ୍ଚାରେ ଥିବା ବୌଦ୍ଧ ଥାନାର ପୂର୍ବତନ ଅଧିକାରୀ ନଳିନୀକାନ୍ତ ଦାସଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ରାଜ୍ୟ ପୁଲିସ ମହାନିର୍ଦ୍ଦେଶକ ବିନୟତୋଷ ମିଶ୍ରଙ୍କ ସ୍ୱତନ୍ତ୍ର ନିର୍ଦ୍ଦେଶକ୍ରମେ ତାଙ୍କୁ କେନ୍ଦ୍ରାଞ୍ଚଳ ଆଇଜି କାର୍ଯ୍ୟାଳୟକୁ ବଦଳି କରାଯାଇଛି। ମାତ୍ର ପନ୍ଦର ଦିନ ମଧ୍ୟରେ ତାଙ୍କୁ ଲଗାତାର ଦୁଇଥର ବଦଳି କରାଯିବା ଘଟଣା ପୁଲିସ ପ୍ରଶାସନ ମହଲରେ ବେଶ୍ ଆଲୋଡ଼ନ ସୃଷ୍ଟି କରିଛି।
ସୂଚନାଯୋଗ୍ୟ ଯେ, ଗଞ୍ଜେଇ ମାଫିଆମାନଙ୍କ ସହ ସମ୍ପୃକ୍ତି ରଖିବା ଏବଂ ସେମାନଙ୍କୁ ସହଯୋଗ କରିବା ଭଳି ସଙ୍ଗୀନ ଅଭିଯୋଗ ସାମ୍ନାକୁ ଆସିବା ପରେ ପ୍ରଥମେ ତାଙ୍କୁ ବୌଦ୍ଧ ଥାନାରୁ ବୌଦ୍ଧ ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟକୁ ବଦଳି କରାଯାଇଥିଲା। ତେବେ ଅଭିଯୋଗର ଗାମ୍ଭୀର୍ଯ୍ୟକୁ ଦୃଷ୍ଟିରେ ରଖି ରାଜ୍ୟ ପୁଲିସ ମୁଖ୍ୟାଳୟ ପକ୍ଷରୁ ଏହି ପଦକ୍ଷେପକୁ ଆହୁରି କଠୋର କରାଯାଇ ତାଙ୍କୁ ଜିଲ୍ଲା ବାହାରକୁ ଅର୍ଥାତ୍ କେନ୍ଦ୍ରାଞ୍ଚଳ ଆଇଜି କାର୍ଯ୍ୟାଳୟକୁ ପଠାଇ ଦିଆଯାଇଛି।
ବର୍ତ୍ତମାନ ପୁଲିସ ବିଭାଗ ପକ୍ଷରୁ ନଳିନୀକାନ୍ତ ଦାସଙ୍କ ବିରୋଧରେ ଏକ ଆଭ୍ୟନ୍ତରୀଣ ଓ ବିଭାଗୀୟ ତଦନ୍ତ ଜାରି ରହିଛି। ଗଞ୍ଜେଇ କାରବାର ସହ ତାଙ୍କର କିପରି ଓ କେତେ ଦୂର ସମ୍ପୃକ୍ତି ଥିଲା, ସେ ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ପଦାକୁ ଆଣିବା ପାଇଁ ଛାନଭିନ୍ କରାଯାଉଛି। ତଦନ୍ତ ପ୍ରକ୍ରିୟା ଶେଷ ହେବା ପରେ ତାଙ୍କ ବିରୋଧରେ ଅଧିକ କଡ଼ା ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ସମ୍ଭାବନା ରହିଛି।