ଭୁବନେଶ୍ବର: ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଦଦରାଘାଟି ଫାଣ୍ଡି ଅଧୀନ ଆଖୁଆପାଳ ପଞ୍ଚାୟତ ୩ନଂ କଲୋନୀରେ ଏକ ଅଭାବନୀୟ ଘଟଣା ଘଟିଯାଇଛି। ସ୍ତ୍ରୀକୁ ପିଟିପିଟି ହତ୍ୟା କରିବା ପରେ ସ୍ୱାମୀ ନିଜେ ଆତ୍ମହତ୍ୟା କରିଛି। ମୃତ ସ୍ତ୍ରୀ ରଶ୍ମିତା ନାଏକ (୩୧) ହୋଇଥିବା ବେଳେ ସ୍ୱାମୀଙ୍କ ନାମ ମିଥୁନ ନାଏକ (୩୬) ହୋଇଥିବା ଜଣାପଡ଼ିଛି।
ସୂଚନା ଅନୁସାରେ, ଶନିବାର ବିଳମ୍ବିତ ରାତିରେ ଉଭୟ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ କୌଣସି କାରଣକୁ ନେଇ କଳହ ସୃଷ୍ଟି ହୋଇଥିଲା। ପରେ ସ୍ୱାମୀ ମିଥୁନ ନାଏକ କ୍ରୋଧର ବଶୀଭୂତ ହୋଇ ଘରେ ଥିବା ତିନିଜଣ ଛୁଆଙ୍କୁ ଅନ୍ୟ ଏକ ଘରେ ବାହାରୁ ତାଲା ପକାଇ ଦେଇଥିଲେ। ଏହାପରେ ସ୍ତ୍ରୀ ରଶ୍ମିତାଙ୍କୁ ଏକ ଘରେ ଭର୍ତ୍ତି କରି ଭିତରୁ ବନ୍ଦ କରି ବାଡ଼ିରେ ପିଟି ଚାଲିଥିଲେ। ଫଳରେ ସ୍ତ୍ରୀ ପ୍ରାଣମୂର୍ଚ୍ଛା ହୋଇଯିବା ପରେ ମୁହଁରେ ପାଣି ମାରିଥିଲେ। ମାତ୍ର ସେତେବେଳକୁ ତାଙ୍କର ମୃତ୍ୟୁ ହୋଇସାରିଥିଲା। ସ୍ତ୍ରୀଙ୍କ ମୃତ୍ୟୁ ପରେ ଅନୁତାପ କରି ମିଥୁନ ନିଜ ଘର ସାମ୍ନାରେ ଥିବା ଏକ ଆମ୍ବ ଗଛରେ ଓଢ଼ଣୀ ଲଗାଇ ଆତ୍ମହତ୍ୟା କରିଥିବା କାମାକ୍ଷାନଗର ଉପଖଣ୍ଡ ଆରକ୍ଷୀ ଅଧୀକ୍ଷକ ଚିତ୍ତରଞ୍ଜନ ବେହେରା କହିଛନ୍ତି।
ଖବର ପାଇ ଢେଙ୍କାନାଳ ଜିଲ୍ଲା ସାଇଣ୍ଟିଫିକ୍ ଟିମ୍, ଅତିରିକ୍ତ ଜିଲ୍ଲା ଅଧୀକ୍ଷିକା ଇନ୍ଦୁରେଖା ପଶ୍ଚିମକବାଟ, ପରଜଙ୍ଗ ଥାନା ଅଧିକାରୀ ସୁବ୍ରତ କୁମାର ସାହୁ, ଉପନିରୀକ୍ଷକ ଆଦର୍ଶ ଭୋଳ, ଉପନିରୀକ୍ଷକ ଟେରେସା କିଣ୍ଡୋ ଓ ପୁଲିସ ଟିମ୍ ଘଟଣାସ୍ଥଳରେ ପହଞ୍ଚି ବିଭିନ୍ନ ଦିଗକୁ ନେଇ ତଦନ୍ତ କରିଛନ୍ତି। ପୁଲିସ ମୃତଦେହକୁ ପରଜଙ୍ଗ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଶବ ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ଅଧିକ ତଦନ୍ତ ଜାରି ରଖିଛି।