ପୁରୀ: ଦୀର୍ଘ ୬ ବର୍ଷର ଦୀର୍ଘ ପ୍ରତୀକ୍ଷା ପରେ ଶେଷରେ ସର୍ବସାଧାରଣଙ୍କ ଦର୍ଶନ ପାଇଁ ଖୋଲିଛି ପବିତ୍ର ଶ୍ରୀଗୁଣ୍ଡିଚା ମନ୍ଦିର। ଆଜି ସକାଳୁ ମନ୍ଦିର ଦ୍ୱାର ଖୋଲିବା ମାତ୍ରକେ ମହାପ୍ରଭୁଙ୍କ ଜନ୍ମବେଦି ଦର୍ଶନ ପାଇଁ ସମ୍ମୁଖରେ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି। ଶ୍ରୀମନ୍ଦିର ପ୍ରଶାସନର ନିଷ୍ପତ୍ତି ଅନୁଯାୟୀ, ଆଜିଠାରୁ ପ୍ରଥମ ୩ ଦିନ ପର୍ଯ୍ୟନ୍ତ ଭକ୍ତମାନେ ସମ୍ପୂର୍ଣ୍ଣ ମାଗଣାରେ ମନ୍ଦିର ପ୍ରବେଶ କରିପାରିବେ।
ଏହି ୩ ଦିନିଆ ମାଗଣା ଦର୍ଶନ ଅବଧି ଶେଷ ହେବା ପରେ, ପ୍ରତି ଭକ୍ତଙ୍କ ପାଇଁ ଟିକେଟ୍ ମୂଲ୍ୟ ୧୦ ଟଙ୍କା ଧାର୍ଯ୍ୟ କରାଯାଇଛି। ତେବେ ୫ ବର୍ଷରୁ କମ୍ ଶିଶୁ, ୮୦ ବର୍ଷରୁ ଊର୍ଦ୍ଧ୍ୱ ବୟସ୍କ ଏବଂ ଦିବ୍ୟାଙ୍ଗ ଶ୍ରଦ୍ଧାଳୁଙ୍କ ପାଇଁ ସଦାସର୍ବଦା ପ୍ରବେଶ ଦେୟମୁକ୍ତ ରହିବ। ଶ୍ରୀମନ୍ଦିର ମୁଖ୍ୟ ପ୍ରଶାସକ ନିଜେ ମନ୍ଦିରର ସ୍ଥିତି ଅନୁଧ୍ୟାନ କରିବା ପରେ ଏହି ସୂଚନା ଦେଇଛନ୍ତି।
ସାଧାରଣ ଦିନଗୁଡ଼ିକରେ ପ୍ରତିଦିନ ସକାଳ ୬ଟାରୁ ସଂଧ୍ୟା ୬ଟା ପର୍ଯ୍ୟନ୍ତ ୧୨ ଘଣ୍ଟା ଭକ୍ତମାନେ ଶ୍ରୀଗୁଣ୍ଡିଚା ମନ୍ଦିର ପ୍ରବେଶ କରିପାରିବେ। ତେବେ ଶୀତଦିନେ (ନଭେମ୍ବରରୁ ଫେବ୍ରୁଆରୀ) ମନ୍ଦିର ସକାଳ ୬ଟାରୁ ସଂଧ୍ୟା ୫ଟା ପର୍ଯ୍ୟନ୍ତ ଖୋଲା ରହିବ। ଭକ୍ତମାନେ ସିଂହଦ୍ୱାର ଦେଇ ପ୍ରବେଶ ଓ ପ୍ରସ୍ଥାନ କରିବେ। ଦିବ୍ୟାଙ୍ଗ ଭକ୍ତଙ୍କ ସୁବିଧା ପାଇଁ ସ୍ୱତନ୍ତ୍ର ରାମ୍ପ୍ ବ୍ୟବସ୍ଥା କରାଯାଇଥିବା ବେଳେ ମୋବାଇଲ୍ ଓ ଜୋତା ଷ୍ଟାଣ୍ଡ ସେବା ସମ୍ପୂର୍ଣ୍ଣ ଦେୟମୁକ୍ତ ରଖାଯାଇଛି।
ସୂଚନାଯୋଗ୍ୟ ଯେ, ମହାପ୍ରଭୁଙ୍କ ଜନ୍ମବେଦି ତଥା ବାଲ୍ୟକାଳର ଲୀଳାଭୂମି ଭାବେ ପରିଚିତ ଏହି ପବିତ୍ର ପୀଠକୁ କରୋନା ସମୟରେ ବନ୍ଦ କରାଯାଇଥିଲା। ୨୦୨୨ ମସିହାରେ ପରିଚାଳନା କମିଟି ବୈଠକରେ ଏହାକୁ ଖୋଲିବାକୁ ନିଷ୍ପତ୍ତି ହୋଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଇ ନଥିଲା। ସମ୍ପ୍ରତି ଶ୍ରୀମନ୍ଦିର ପ୍ରଶାସନର ଏହି ଆଭିମୁଖ୍ୟ ଯୋଗୁଁ ଶ୍ରଦ୍ଧାଳୁଙ୍କ ମଧ୍ୟରେ ପ୍ରବଳ ଉତ୍ସାହ ପ୍ରକାଶ ପାଇଛି।