ସମୀକ୍ଷା ବ୍ୟୁରୋ
ବିଜେପିର ବରିଷ୍ଠ ନେତା ତଥା ପୂର୍ବତ୍ତନ ମନ୍ତ୍ରୀ ଦାମୋଦର ରାଉତ କହୁକହୁ କହିଦେଲେ ତାଙ୍କର ମନର କଥା। ମିଡିଆ ଆଗରେ ଦାମ ସ୍ପଷ୍ଟ ଭାବେ କହିଛନ୍ତି ଯେ, ବିଜେପିରେ ବର୍ତ୍ତମାନ ମୁଁ ଅଲୋଡା ହୋଇଯାଇଛି। ନିର୍ବାଚନ ପୂର୍ବରୁ ବିଜେପି ଡାକି ନେଇଥିଲା। ପ୍ରଚାର କମିଟର ଅଧ୍ୟକ୍ଷ ମଧ୍ୟ କଲା। ହେଲିକାପ୍ଟରରେ ମୋତେ ବୁଲାଇ ପ୍ରଚାର ମଧ୍ୟ କଲେ। ହେଲେ ନିର୍ବାଚନ ସରିବା ପରେ ଦଳ ମୋତେ ଯେପରି ଗୁରୁତ୍ବ ଦେବା କଥା ଦେଉ ନାହିଁ। ଦାମଙ୍କ ଏପରି ମନ କି ବାତ ପରେ ବର୍ତ୍ତମାନ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଯାଇଛି। ସେତିକି ନୁହେଁ ସେ ପୁଣି କହିଛନ୍ତି ଯେ, ଦଳ ମୋତେ ବାଲିକୁଡା ଏରସମା ରେ ପ୍ରାର୍ଥୀ କଲା। ହେଲେ ସେଠାରେ ପୂର୍ବରୁ ବିଜେପିର ସଂଗଠନ କରିଥିବା ରଘୁନନ୍ଦନ ଦାସ ବିଜେପି ଛାଡି ବିଜେଡିରେ ଯୋଗ ଦେଲେ। ମନ୍ତ୍ରୀ ହେଲେ। ସେଥିରେ ମୋର ଦୁଃଖ ନାହିଁ। କିନ୍ତୁ ସେହି ଅଞ୍ଚଳର ଯେଉଁ ସବୁ ବିଜେପି କର୍ମି ଥିଲେ ସେମାନେ ମୋତେ ଭୋଟ ଦେଲେ ନାହିଁ। ସେଥିପାଇଁ ହାରିଲି ବୋଲି ଦାମୋଦର ରାଉତ କହିଛନ୍ତି। ତେବେ ନିର୍ବାଚନରେ ହାରଜିତ ରହିଛି। ହାରିବାଟା ମୋ ପାଇଁ ଦୁଃଖଦାୟକ ନୁହେଁ। କିନ୍ତୁ ହାରିବା ପରେ ମୋତେ ବିଜେପି ଯେପରି ଗୁରୁତ୍ବ ଦେବା କଥା ତାହା ଦେଉ ନାହିଁ ବୋଲି ଦାମ କ୍ଷୋଭ ପ୍ରକାଶ କରିଛନ୍ତି। ବର୍ତ୍ତମାନ ବିଜେପିର ସଭ୍ୟ ସଂଗ୍ରହ ଚାଲିଥିବାରୁ ସେ ଆଶା ରଖିଛନ୍ତି ଯେ ଦଳ ତାଙ୍କୁ ଗୁରୁତ୍ବ ଦେବ। ଦୀର୍ଘ ବର୍ଷର ରାଜନୈତିକ ଅଭିଜ୍ଞତା ରହିଛି, ତାହାକୁ ବିଜେପି କାମରେ ଲଗାଇବ ବୋଲି ଦାମ ଆଶା ବାନ୍ଧି ଘରେ ବସି ରହିଛନ୍ତି।
ଦାମଙ୍କର ଏପରି ମନ୍ତବ୍ୟକୁ ନେଇ ବର୍ତ୍ତମାନ ରାଜ୍ୟ ରାଜନୀତିରେ ବେଶ୍ ଆଲୋଚନା ଚାଲିଛି। କାରଣ ଦାମଙ୍କର ଏପରି ବିବୃତି ଦେବା ହେଉଛି ତାଙ୍କର ପୁରୁଣା ରୋଗ। ସେ ଯେତେବେଳେ ବିଜେଡିରେ ଥିଲେ ସେତେବେଳେ ମଧ୍ୟ ଦଳ ବିରୋଧରେ ଅନେକ କଥା କହି ଅଡୁଆ ସୃଷ୍ଟି କରୁଥିଲେ। ହେଲେ ଜଣେ ବରିଷ୍ଠ ନେତା ହିସାବରେ ଦଳ ତରଫରୁ ସେପରି କିଛି ପଦକ୍ଷେପ ନିଆଯାଉ ନ ଥିଲା। ହେଲେ ପରିସ୍ଥିତି ଏପରି ହେଲା ଯେ, ଏପରି ବିବୃତି ପାଇଁ ଅନେକ ଥର ତାଙ୍କୁ ମନ୍ତ୍ରୀ ପଦ ହରାଇବାକୁ ପଡିଛି। ଏପରିକି ବିଜେଡିରେ ପ୍ୟାରୀ ମୋହନ ମହାପାତ୍ରଙ୍କ ଆଧିପତ୍ୟ ଥିବା ବେଳେ ଦାମ ରାଉତ ହେଉଛନ୍ତି ଏକମାତ୍ର ବିଜେଡି ନେତା ଯେ କି ପ୍ୟାରୀବାବୁଙ୍କୁ ବିରୋଧରେ ବିଷ ଉଦ୍ଗାର କରୁଥିଲେ। ତାଙ୍କ ବିରୋଧରେ ବିଭିନ୍ନ ସମୟରେ ବିବୃତି ଦେଇ ଦଳକୁ ହରଡ ଘଣାରେ ମଧ୍ୟ ପକାଇ ଦେଉଥିଲେ। ବର୍ତ୍ତମାନ ବିଜେପିରେ ମଧ୍ୟ ଦାମଙ୍କର ସେହି ପୁରୁଣା ଲକ୍ଷଣ ଆରମ୍ଭ ହୋଇଯାଇଛି। ଦଳ ଭିତରେ ରହି ଦଳ ଅଲୋଡା କରିଦେଇଛି ବୋଲି କହି ନିଜକୁ ଏକ ବିବାଦ ଭିତରକୁ ଠେଲି ଦେଇଛନ୍ତି। ତେବେ ଏ ନେଇ ବିଜେପି ତରଫରୁ କୌଣସି ପ୍ରତିକ୍ରିୟା ପ୍ରକାଶ ପାଇ ନାହିଁ।