ଅମୃତସର: ପୂର୍ବତନ ଅଲିମ୍ପିଆନ୍ ତଥା ହକି ଦଳର ନାୟକ ପର୍ଗଟ୍ ସିଂହଙ୍କୁ ପଞ୍ଜାବ ପ୍ରଦେଶ କଂଗ୍ରେସ କମିଟିର ନୂତନ ସଭାପତି ଭାବେ ନିଯୁକ୍ତି ଦିଆଯାଇଛି। ଏହି ନିଷ୍ପତ୍ତିକୁ ନେଇ କଂଗ୍ରେସ ଶିବିରରେ ଉତ୍ସାହ ଦେଖିବାକୁ ମିଳିଛି। ବରିଷ୍ଠ କଂଗ୍ରେସ ନେତା ରାଜକୁମାର ଭେର୍କା ଏହି ନିଯୁକ୍ତିକୁ ସ୍ୱାଗତ କରିବା ସହ ଦଳ ସମ୍ପୂର୍ଣ୍ଣ ଏକଜୁଟ୍ ଥିବା ପ୍ରକାଶ କରିଛନ୍ତି। କଂଗ୍ରେସ ନେତା ରାଜକୁମାର ଭେର୍କା କହିଛନ୍ତି, “ପର୍ଗଟ୍ ସିଂହ ପୂର୍ବରୁ ଭାରତୀୟ ହକି ଦଳର କ୍ୟାପଟେନ୍ ଥିଲେ ଏବଂ ଏବେ ସେ ପଞ୍ଜାବ କଂଗ୍ରେସର କ୍ୟାପଟେନ୍ ହୋଇଛନ୍ତି। ତାଙ୍କର ସଫଳ ନେତୃତ୍ୱରେ କଂଗ୍ରେସ ଦଳ ଆଗାମୀ ନିର୍ବାଚନରେ ଶ୍ରେଷ୍ଠ ପ୍ରଦର୍ଶନ କରିବ। ସମ୍ପୂର୍ଣ୍ଣ କଂଗ୍ରେସ ପାର୍ଟି ତାଙ୍କ ସହ ମଜବୁତ ଭାବେ ଛିଡ଼ା ହୋଇଛି।” ପର୍ଗଟ୍ ସିଂହ ଜାଲନ୍ଧର କ୍ୟାଣ୍ଟନମେଣ୍ଟରୁ କଂଗ୍ରେସ ବିଧାୟକ ଅଟନ୍ତି। ଅମରିନ୍ଦର ସିଂହ ରାଜା ୱାରିଂଙ୍କ ସ୍ଥାନରେ ତାଙ୍କୁ ଏହି ଦାୟିତ୍ୱ ଦିଆଯାଇଛି। ଆଗାମୀ ବିଧାନସଭା ନିର୍ବାଚନ ପୂର୍ବରୁ ପର୍ଗଟ୍ ସିଂହଙ୍କ ଭଳି ଜଣେ ପ୍ରଭାବଶାଳୀ ଓ ଖେଳ ଜଗତରୁ ଆସିଥିବା ଚେହେରାଙ୍କୁ ଦଳର କମାଣ ଦେବା ଦ୍ୱାରା ଦଳୀୟ ସଂଗଠନ ଆହୁରି ମଜବୁତ ହେବ ବୋଲି କଂଗ୍ରେସ ନେତାମାନେ ଆଶା ପ୍ରକାଶ କରିଛନ୍ତି।
