ନୂଆଦିଲ୍ଲୀ: ମହିଳା ସଂରକ୍ଷଣ, ପରିସୀମନ ଏବଂ ନିର୍ବାଚନ ସଂସ୍କାରକୁ ନେଇ କେନ୍ଦ୍ର ସରକାରଙ୍କ ଆଭିମୁଖ୍ୟ ଉପରେ କଠୋର ପ୍ରଶ୍ନ ଉଠାଇଛନ୍ତି କଂଗ୍ରେସ ସଭାପତି ମଲ୍ଲିକାର୍ଜୁନ ଖର୍ଗେ। କର୍ଣ୍ଣାଟକର କଲବୁର୍ଗୀଠାରେ ଏକ ସମ୍ମିଳନୀରେ ସେ କହିଛନ୍ତି ଯେ କଂଗ୍ରେସର ଏହି ଲଢ଼େଇ କ୍ଷମତା ପାଇଁ ନୁହେଁ, ବରଂ ଗଣତନ୍ତ୍ର ଓ ସମ୍ବିଧାନକୁ ସୁରକ୍ଷିତ ରଖିବା ପାଇଁ। ଲୋକସଭାର ବର୍ତ୍ତମାନର ଆସନ ସଂଖ୍ୟା ଆଧାରରେ ହିଁ ମହିଳାମାନଙ୍କୁ ୩୩ ପ୍ରତିଶତ ସଂରକ୍ଷଣ ତୁରନ୍ତ ଲାଗୁ କରାଯାଇପାରିବ। ଏଥିପାଇଁ ପରିସୀମନକୁ ଅପେକ୍ଷା କରିବାର କୌଣସି ଆବଶ୍ୟକତା ନାହିଁ ବୋଲି ସେ ପ୍ରଧାନମନ୍ତ୍ରୀ ଓ ସ୍ୱରାଷ୍ଟ୍ରମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି।
ଖର୍ଗେ ଅଭିଯୋଗ କରିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିରୋଧୀଙ୍କ ଚିଠିର ନିଜେ ଉତ୍ତର ନ ଦେଇ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁଙ୍କୁ ମଧ୍ୟସ୍ଥି ଭାବେ ବ୍ୟବହାର କରୁଛନ୍ତି। ଏଥିସହ ସେ ଆଗାମୀ ନିର୍ବାଚନଗୁଡ଼ିକୁ ଇଭିଏମ୍ (EVM) ବଦଳରେ ବାଲାଟ୍ ପେପର ମାଧ୍ୟମରେ କରାଇବା ଏବଂ ଭୋଟର ତାଲିକାରେ ସ୍ୱଚ୍ଛତା ଆଣିବା ପାଇଁ ଦାବି କରିଛନ୍ତି।
ଏହି ଅବସରରେ ଖର୍ଗେ କହିଛନ୍ତି ଯେ ଗତ ଏପ୍ରିଲ ୨୦୨୬ରେ ପରିସୀମନ ସମ୍ବନ୍ଧୀୟ ସମ୍ବିଧାନ ସଂଶୋଧନ ବିଲ୍କୁ ବିରୋଧୀଙ୍କ ସହମତି ବିନା ଆଣିବାକୁ ଚେଷ୍ଟା କରାଯାଇଥିଲା, ଯାହା ସମ୍ପୂର୍ଣ୍ଣ ବେଆଇନ୍। ସାମ୍ବିଧାନିକ ପରିବର୍ତ୍ତନ ପୂର୍ବରୁ ସର୍ବଦଳୀୟ ବୈଠକ ଡକାଇବାକୁ ସେ ଦାବି କରିଛନ୍ତି। ଏଥିସହିତ, ମୁଖ୍ୟ ନିର୍ବାଚନ କମିଶନର ଏବଂ ଅନ୍ୟାନ୍ୟ ନିର୍ବାଚନ କମିଶନର ଆଇନ, ୨୦୨୩ର ଧାରା ୧୬କୁ ହଟାଇବା ସହ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ପଦରୁ ହଟାଇବାକୁ ସେ ଦାବି ଜଣାଇଛନ୍ତି। ଅନ୍ୟପଟେ, ମଣିପୁରରେ ପୁନର୍ବାର ଘଟିଥିବା ହିଂସାକାଣ୍ଡରେ ୪ ଜଣ ନିରୀହ ନାଗରିକଙ୍କ ହତ୍ୟାକୁ ନିନ୍ଦା କରି ଖର୍ଗେ ସୋସିଆଲ ମିଡିଆ ‘ଏକ୍ସ’ରେ କେନ୍ଦ୍ର ସରକାରଙ୍କୁ ତୀବ୍ର ସମାଲୋଚନା କରିଛନ୍ତି।