ଭୁବନେଶ୍ବର: ଓଡିଶା ଛାଡିବେ ବରିଷ୍ଠ ଆଇଏଏସ ଅଫିସର ଶ୍ରୀଯୁକ୍ତ ସଂଜୟ କୁମାର ସିଂ। ସେ ଇଣ୍ଟର ଷ୍ଟେଟ ବଦଳିରେ ନିଜ ଗୃହ ରାଜ୍ୟ ବିହାରକୁ ଯିବା ପାଇଁ ଇଚ୍ଛା ପ୍ରକାଶ କରିଛନ୍ତି। ସେଥିପାଇଁ ସେ କେନ୍ଦ୍ର ସରକାରଙ୍କୁ ଆବେଦନ କରିଛନ୍ତି। ଏହି ଆବେଦନ ପରେ କେନ୍ଦ୍ର ସରକାର ଅକ୍ଟୋବର ୨୨ ତାରିଖରେ ରାଜ୍ୟ ସରକାରଙ୍କୁ ଏକ ଚିଠି କରିଛନ୍ତି।
ଏହି ଚିଠିରେ ସେ ଇଣ୍ଟର ଷ୍ଟେଟ ବଦଳି ପାଇଁ ଆବେଦନ କରିଛନ୍ତି ବୋଲି ଉଲ୍ଲେଖ ରହିଛି। ତାଙ୍କ ନାମରେ କିଛି ଭିଜିଲାନ୍ସ କିମ୍ବା ଅନ୍ୟ କିଛି ମାମଲା ରହିଛି କି ନାହିଁ ତାହା ଜଣାଇବା ପାଇଁ କେନ୍ଦ୍ର ଏହି ଚିଠି କରିଛି। ଜଣେ ଇଣ୍ଟର ଷ୍ଟେଟ ବଦଳି ପାଇଁ ଆବେଦନ କଲେ ନିୟମ ଅନୁସାରେ ଏହିପରି ଚିଠି କେନ୍ଦ୍ର ସରକାର ରାଜ୍ୟକୁ କରିଥାନ୍ତି। ରାଜ୍ୟ ସରକାର ସବୁଜ ସଙ୍କେତ ଦେବା ପରେ ତାଙ୍କର ବିହାରକୁ ବଦଳି ହେବ।
ଶ୍ରୀଯୁକ୍ତ ସିଂ ବର୍ତ୍ତମାନ ଓଡିଶା ସରକାରଙ୍କ ପୂର୍ତ୍ତ ବିଭାଗ ସହିତ ଖାଦ୍ୟ ଯୋଗାଣ ଓ ଖାଉଟୀ କଲ୍ୟାଣ ବିଭାଗର ପ୍ରମୁଖ ଶାସନ ସଚିବ ଅଛନ୍ତି। ସେ ଓଡିଶାର ଜଣେ ଦକ୍ଷ ଆଇଏଏସ ଅଫିସର ଭାବେ ବେଶ୍ ଜଣାଶୁଣା। ୧୯୯୭ ମସିହା ବ୍ୟାଚର ଏହି ଅଧିକାରୀ ପୂର୍ବରୁ ବିହାରରେ ବହୁ ବର୍ଷ ଧରି କାର୍ଯ୍ୟ କରିଛନ୍ତି। ସେ ବିହାରର ପାଟନା ଓ ଗୟା ଜିଲ୍ଲାର ଜିଲ୍ଲାପାଳ ସହିତ ବିହାର ମୁଖ୍ୟମନ୍ତ୍ରୀଙ୍କ ସ୍ବତନ୍ତ ସଚିବ ଭାବେ କାର୍ଯ୍ୟ କରିଛନ୍ତି।
ସେ ପୂର୍ବରୁ ଓଡିଶାର ଗ୍ରାମ୍ୟ ଉନ୍ନୟନ ବିଭାଗ, ସୂଚନା ଓ ଲୋକସଂପର୍କ ବିଭାଗର ସଚିବ ଭାବେ କାର୍ଯ୍ୟ କରିଛନ୍ତି। ସେହିପରି ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ସଚିବ ଭାବେ ମଧ୍ୟ କାର୍ଯ୍ୟ କରିଛନ୍ତି। ସେହିପରି ବାଣିଜ୍ୟ କର ଏବଂ ଜିଏସଟି ବିଭାଗର କମିଶନର, ବିଏମସି କମିଶନର ଏବଂ ବିଡିଏ ଭିସି ଭାବେ ମଧ୍ୟ କାର୍ଯ୍ୟ କରିଛନ୍ତି।