ଭୁବନେଶ୍ୱର: ଝାରମୁଣ୍ଡା ଓଡ଼ିଶା ଆଦର୍ଶ ବିଦ୍ୟାଳୟର ସୌମ୍ୟାଶ୍ରୀ ଥାନପତି ଜାତୀୟ ବିଜ୍ଞାନ ସେମିନାର ୨୦୨୬ର ବିଜେତା ହୋଇଛନ୍ତି। ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ଅଧୀନ ଜାତୀୟ ବିଜ୍ଞାନ ସଂଗ୍ରହାଳୟ ପରିଷଦ (ଏନସିଏସଏମ) ପକ୍ଷରୁ ଏହି ସେମିନାର ଆୟୋଜନ କରାଯାଇଥିଲା। ଦିଲ୍ଲୀର ଜାତୀୟ ବିଜ୍ଞାନ କେନ୍ଦ୍ର ଠାରେ ଆଜି ଅନୁଷ୍ଠିତ ପ୍ରତିଯୋଗିତାରେ ସୌମ୍ୟାଶ୍ରୀ ୩୪ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ପ୍ରତିଯୋଗୀଙ୍କୁ ପଛରେ ପକାଇ ବିଜୟୀ ହୋଇଛନ୍ତି। ‘‘ଭାରତର ଶକ୍ତି ଭଣ୍ଡାର ୨୦୪୭: ସମ୍ଭାବନା ଓ ଆହ୍ୱାନ’’ ବିଷୟବସ୍ତୁକୁ ନେଇ ଏହି ପ୍ରତିଯୋଗିତା ଆୟୋଜନ କରାଯାଇଥିଲା। ଏହା ଛାତ୍ରଛାତ୍ରୀଙ୍କୁ ଭାରତର ଶକ୍ତି ଆବଶ୍ୟକତା, ଭବିଷ୍ୟତର ଶକ୍ତି ସମ୍ଭାବନା ଏବଂ ଦୀର୍ଘସ୍ଥାୟୀ ଶକ୍ତି ସୁରକ୍ଷା ସୁନିଶ୍ଚିତ କରିବା ଲାଗି ଆହ୍ୱାନଗୁଡ଼ିକ ସମ୍ପର୍କରେ ଅନ୍ୱେଷଣ କରିବା ଲାଗି ଏକ ମଞ୍ଚ ଯୋଗାଇ ଥିଲା।
ପୁରସ୍କାର ସ୍ୱରୂପ ସୌମ୍ୟାଶ୍ରୀ ବିଜେତା ଟ୍ରଫି, ଏକ ପ୍ରମାଣପତ୍ର ଏବଂ ୪୮ ହଜାର ଟଙ୍କାର ବୃତ୍ତି ମିଳିଥିଲା। ସୌମ୍ୟାଶ୍ରୀ ବିଜେତା ହୋଇଥିବା ବେଳେ ଅନ୍ୟ ୯ ଜଣ ପ୍ରତିଯୋଗୀଙ୍କୁ ରନର୍ସଅପ୍ ପୁରସ୍କାର ପାଇଥିଲେ । ରନର୍ସମାନଙ୍କୁ ୨୮ ହଜାର ଟଙ୍କାର ବୃତ୍ତି ମିଳିଥିଲା । କାର୍ଯ୍ୟକ୍ରମରେ ପିଏନଜିଆରବିର ଅଧ୍ୟକ୍ଷ ଡକ୍ଟର ଅନୀଲ କୁମାର ଜୈନ, ନୀତି ଆୟୋଗର ଶକ୍ତି ପରାମର୍ଶଦାତା ରାଜନାଥ ରାମ, ଏନସିଏସଏମ ମହାନିର୍ଦ୍ଦେଶକ କେ.ଏସ ମୂରଲୀ ପ୍ରମୁଖ ଯୋଗ ଦେଇଥିଲେ।