ଜେରୁଜେଲମ୍: ଇସ୍ରାଏଲର ପ୍ରତିରକ୍ଷା କଣ୍ଟ୍ରାକ୍ଟର ‘ରାଫେଲ୍’ ଏକ ଅତ୍ୟାଧୁନିକ ଦୂରଗାମୀ କ୍ରୁଜ୍ କ୍ଷେପଣାସ୍ତ୍ର ‘ସୁପର ଆଇସ୍’ ଉନ୍ମୋଚନ କରିଛି। ଏହା ପୂର୍ବ ସଂସ୍କରଣଗୁଡ଼ିକ ତୁଳନାରେ ବହୁ ଅଧିକ ଓଜନର ୱାରହେଡ୍ ବହନ କରିବା ସହ ପ୍ରତିକୂଳ ପରିବେଶରେ ଥିବା ରଣନୈତିକ ଲକ୍ଷ୍ୟଗୁଡ଼ିକୁ ଅତି ସଠିକ ଭାବରେ ଧ୍ୱଂସ କରିବାର କ୍ଷମତା ରଖିଛି। “ସୁପର ଆଇସ୍’ ନାମକ ଏହି କ୍ଷେପଣାସ୍ତ୍ର ୧,୦୦୦ ପାଉଣ୍ଡ (ପ୍ରାୟ ୪୫୪ କିଲୋଗ୍ରାମ) ଓଜନର ୱାରହେଡ୍ ବହନ କରିବାକୁ ସକ୍ଷମ, ଯାହା ମାର୍କ ୮୩ ବୋମା ସହିତ ସମତୁଲ। ଏହି କ୍ଷେପଣାସ୍ତ୍ରକୁ ଯୁଦ୍ଧ ବିମାନ, ଯୁଦ୍ଧପୋତ ଏବଂ ସ୍ଥଳଭାଗରେ ଥିବା ଲଞ୍ଚର୍ ଭଳି ବିଭିନ୍ନ ପ୍ଲାଟଫର୍ମରୁ ଉତକ୍ଷେପଣ କରାଯାଇପାରିବ, ଯାହା ସେନାକୁ “ସର୍ବାଧିକ ଅପରେସନାଲ୍ ନମନୀୟତା’ ପ୍ରଦାନ କରିବ ବୋଲି କମ୍ପାନୀ ପକ୍ଷରୁ କୁହାଯାଇଛି। ଏହା ପୂର୍ବରୁ ରାଫେଲ୍ ଦ୍ୱାରା ବିକଶିତ ହୋଇଥିବା କ୍ରୁଜ୍ କ୍ଷେପଣାସ୍ତ୍ର, ଯେପରିକି “ଆଇସ୍ ବ୍ରେକର’, ଏବଂ “ସି ବ୍ରେକର୍’ ୨୫୦ ପାଉଣ୍ଡ ଓଜନର ୱାରହେଡ୍ ବହନ କରିପାରୁଥିଲେ ଏବଂ ସେଗୁଡ଼ିକର ଲକ୍ଷ୍ୟଭେଦ କ୍ଷମତା ସର୍ବାଧିକ ୩୦୦ କିଲୋମିଟର ପର୍ଯ୍ୟନ୍ତ ଥିଲା। ତେବେ ରାଫେଲ୍ ପକ୍ଷରୁ ଯଦିଓ “ସୁପର ଆଇସ୍’ର ପ୍ରକୃତ ଦୂରତା ବା ରେଞ୍ଜ୍ ସାର୍ବଜନୀନ ଭାବେ ପ୍ରକାଶ କରାଯାଇନାହିଁ । କିନ୍ତୁ କମ୍ପାନୀ ସ୍ପଷ୍ଟ କରିଛି ଯେ ଏହାକୁ “ଜଟିଳ ଅପରେସନାଲ୍ ଆବଶ୍ୟକତା ପୂରଣ କରିବା ଏବଂ ପ୍ରତିକୂଳ ପରିବେଶ ତଥା ଦୂରଗାମୀ ପରିସୀମାରେ ଥିବା ଉଚ୍ଚ ମୂଲ୍ୟବାନ ରଣନୈତିକ ଲକ୍ଷ୍ୟକୁ ଧ୍ୱଂସ କରିବା ପାଇଁ ଡିଜାଇନ୍ କରାଯାଇଛି’। ରାଫେଲ୍ ଅନୁସାରେ ଏହି କ୍ଷେପଣାସ୍ତ୍ରରେ ଅତ୍ୟାଧୁନିକ ବୈଷୟିକ କ୍ଷମତା ରହିଛି, ଯେଉଁଥିରେ ସୁଦୃଢ଼ ସ୍ୱୟଂଚାଳିତ ନାଭିଗେସନ୍ ସିଷ୍ଟମ୍, ଭୂପୃଷ୍ଠର ନିକଟତର ହୋଇ ଉଡ଼ାଣ ଭରିବାର କ୍ଷମତା ଯେକୌଣସି ପାଗରେ କାର୍ଯ୍ୟକ୍ଷମ ହେବା ଏବଂ ବିଭିନ୍ନ ପ୍ରକାର ଲକ୍ଷ୍ୟକୁ ସଠିକ୍ ଭାବରେ ଟାର୍ଗେଟ୍ କରିବାର ଅତ୍ୟଧିକ ସଠିକତା ଭଳି ବୈଶିଷ୍ଟ୍ୟକୁ ସାମିଲ କରାଯାଇଛି।
