ମୁମ୍ବାଇ : ଚଳିତ ମହାରାଷ୍ଟ୍ର ରାଜନୀତିରେ ବହୁ ରାଜନୈତିକ ଡ୍ରାମା ପରେ ଉଦ୍ଧବ ଠାକ୍ରେ ମୁଖ୍ୟମନ୍ତ୍ରୀ ରୂପେ ଅବସ୍ଥାପିତ ହୋଇଛନ୍ତି । ଶିବସେନା ପ୍ରମୁଖ ଉଦ୍ଧବ ଠାକ୍ରେ ନଭେମ୍ବର 28ରେ ମୁଖ୍ୟମନ୍ତ୍ରୀ ରୂପେ ଶପଥଗ୍ରହଣ କଲେ । ଉଦ୍ଧବ ଠାକ୍ରେଙ୍କ ମୁଖ୍ୟମନ୍ତ୍ରୀ ହୋଇଯିବା ଛଅ ମାସ ନ ପୂରୁଣୁ ପୁଣି ଥରେ ତାଙ୍କ ଚୌକି ଉପରେ ସଂକଟର ବାଦଲ ଘନେଇଛି । ତେବେ ଏଥର କୌଣସି ବିରୋଧୀଙ୍କ ଈଶାରାରେ ଏହି ସଂକଟ ଆସିନି ବରଂ ଦୁନିଆରେ ମୃତ୍ୟୁର ତାଣ୍ଡବ ରଚୁଥିବା କରୋନା ଯୋଗୁଁ ଏହି ସ୍ଥିତି ଉପୁଜିଛି ।
କହିବାର କଥା ଏହିକି ଯେ, ମୁଖ୍ୟମନ୍ତ୍ରୀ ହୋଇଥିବା ଉଦ୍ଧବ ଠାକ୍ରେ କୌଣସି ନିର୍ବାଚନ ଲଢି ମୁଖ୍ୟମନ୍ତ୍ରୀ ହୋଇନାହାନ୍ତି । ଉଦ୍ଧବ ଠାକ୍ରେ ନିଜ ରାଜନୈତିକ ଜୀବନରେ କେବେ ବି ନିର୍ବାଚନ ଲଢି ନାହାନ୍ତି କି ସେ ମହାରାଷ୍ଟ୍ର ସରକାରଙ୍କ ବିଧାନମଣ୍ଡଳର କୌଣସି ସଦନର ସଦସ୍ୟ ମଧ୍ୟ ନୁହଁନ୍ତି । କିନ୍ତୁ ସମ୍ବିଧାନାର ଧାରା 164 (4) ଅନ୍ତର୍ଗତ ମୁଖ୍ୟମନ୍ତ୍ରୀ ପଦରେ ରହିବା ପାଇଁ ଛ’ ମାସ ଭିତରେ ଅର୍ଥାତ୍ ମେ 29, 2020 ପୂର୍ବରୁ ରାଜ୍ୟ ବିଧାନମଣ୍ଡଳର ଯେକୌଣସି ଗୃହର ସଦସ୍ୟତା ନେବା ଅନିବାର୍ଯ୍ୟ । ଯାହାକୁ ନେଇ ଏବେସଂଶୟ ଦେଖାଦେଇଛି । କରୋନାର ଗ୍ରହଣ ଏବେ ଉଦ୍ଧବ ଚୌକି ଉପରେ ପଡିଯାଇଛି । ଦେଶ ଏବେ କରୋନା ମହାମାରୀ ସହ ଲଢେଇ ପାଇଁ ଲାଗୁ ରହିଛି ଲକ୍ ଡାଉନ୍ । ଏପରି ସ୍ଥିତିରେ ଉଦ୍ଧବ କିପରି ମହାରାଷ୍ଟ୍ର ସରକାରଙ୍କ ବିଧାନମଣ୍ଡଳର ସଦସ୍ୟ ହୋଇପାରିବେ, ତାହା ଏବେ ପ୍ରଶ୍ନ ଉଠୁଛି ।
ଉଦ୍ଧବ ଠାକ୍ରେ ଏବେ ବିଧାନସଭା (ଏମ୍ଏଲ୍ଏ) ବା ବିଧାନ ପରିଷଦ(ଏମଏଲସି)ର ସଦସ୍ୟ ହେବା ଆବଶ୍ୟକ ହୋଇପଡିଛି । କିନ୍ତୁ କରୋନା ଭାଇରସ ଯୋଗୁଁ ସାରାଦେଶରେ ଲକ୍ ଡାଉନ୍ ଜାରି ରହିଛି । ଏପରି ସମୟରେ ମହାରାଷ୍ଟ୍ର ଏମଏଲସିରେ ହେବାକୁ ଥିବା ନିର୍ବାଚନକୁ ଘୁଞ୍ଚାଇ ଦିଆଯାଇଛି । ଏହି କାରଣରୁ ଠାକ୍ରଙ୍କୁ ମୁଖ୍ୟମନ୍ତ୍ରୀ ପଦ ବଞ୍ଚାଇବା ପାଇଁ ଅସୁବିଧା ସମ୍ମୁଖୀନ ହେବାକୁ ପଡୁଛି ।
ମହାରାଷ୍ଟ୍ର ବିଧାନସଭ ପରିଷଦର 9 ସଦସ୍ୟଙ୍କ କାର୍ଯ୍ୟକାଳ ଅପ୍ରେଲ୍ 24ରେ ଶେଷ ହେଉଛି । ଏହି 9 ବିଧାନ ପରିଷଦ ଆସନରେ ନିର୍ବାଚନ ହେବାକୁ ଥିଲା, ଯାହାକୁ ଏବେ ଘୁଞ୍ଚାଇ ଦିଆଯାଇଛି । ପୂର୍ବରୁ ଏହି 9ଟି ଆସନ ମଧ୍ୟରୁ ଗୋଟିଏରେ ଉଦ୍ଧବ ଠାକ୍ରେ ନିର୍ବାଚନ ଲଢିବେ ବୋଲି ରହିଥିଲା । କିନ୍ତୁ ଏବେ ଏହି ବିକଳ୍ପ ମଧ୍ୟ ନାହିଁ ।
ଅପରପକ୍ଷରେ ବିଧାନସଭାର ସଦସ୍ୟ ହେବା ପାଇ ଠାକ୍ରେ ନିଜ ଦଳର କୌଣସି ବିଧାୟକଙ୍କ ଇସ୍ତଫା ଦେବକୁ ପଡିବ । ଏହା ପରେ 29 ମଇଠାରୁ 45 ଦିନ ପୂର୍ବରୁ ନିର୍ବାଚନ ଆୟୋଗ ଉପନିର୍ବାଚନର ଘୋଷଣା କରିବେ । କିନ୍ତୁ ନିକଟରେ ମହାରାଷ୍ଟ୍ରର ରାଜନୈତିକ ସମୀକରଣକୁ ଦେଖିଲେ ଏପରି ସମ୍ଭାବନା ମଧ୍ୟ ସ୍ପଷ୍ଟ ହେବାପରି ଲାଗୁନାହିଁ ।
ତେବେ ଉଦ୍ଧବଙ୍କ ପାଖରେ ଅନ୍ୟ ଏକ ବିକଳ୍ପ ରହିଛି । ମହାରାଷ୍ଟ୍ରରେ ରାଜ୍ୟପାଳଙ୍କ ଦ୍ବାରା ମନୋନୀତ ହେବାକୁ ଥିବା ବିଧାନ ପରିଷଦର ଦୁଇଟି ଆସନ ଖାଲି ରହିଛି । ଏହି ଆସନରୁ ଗୋଟିଏ ଆସନ ଉଦ୍ଧବଠାକ୍ରେ ନାମ ନାମିତ କରିବା ପାଇଁ ରାଜ୍ୟପାଳଙ୍କ ନିକଟକୁ ସରକାର ସୁପାରିଶ୍ କରିପାରନ୍ତି । ଯଦି ସରକାରଙ୍କ ଦ୍ବାରା ପଠାଯାଇଥିବା ନାମକୁ ରାଜ୍ୟପାଳ ସହମତି ଦିଅନ୍ତି ତେବେ ଉଦ୍ଧବଙ୍କ ଏହି ସମସ୍ୟାରସମାଧାନ ହୋଇପାରିବ ।
ସେହିପରି ଅନ୍ୟ ଏକ ବିକଳ୍ପ ହିସାବରେ ଉଦ୍ଧବ ଠାକ୍ରେ ନିଜ ପଦରୁ ଇସ୍ତଫା ଦେଇ ପୁନର୍ବାର ମୁଖ୍ୟମନ୍ତ୍ରୀ ପଦର ଶପଥ ନେଇପାରିବେ । ଏପରି ସମୟରେ ତାଙ୍କୁ ବିଧାନମଣ୍ଡଳର ସଦସ୍ୟ ହେବା ପାଇଁ ପୁନଃ ଛମାସର ସମୟ ମିଳିପାରିବ ।
କିନ୍ତୁ ଏହି ଦ୍ବିତୀୟ ବିକଳ୍ପରେ ସବୁଠୁ ବଡ ଅସୁବିଧା ହେଉଛି ଯେ, ଯଦି ମୁଖ୍ୟମନ୍ତ୍ରୀ ଇସ୍ତଫା ଦେବେ ତେବ ଏହା ପୂରା କ୍ୟାବିନେଟ୍ର ଇସ୍ତଫା ରୂପେ ଗଣାଯିବ । ଏପରି ସମୟରେ ଉଦ୍ଧବଙ୍କ ସହିତ ପୁନଃ ମନ୍ତ୍ରିମଣ୍ଡଳର ଦ୍ବିତୀୟ ଥର ଶପଥ ନେବାକୁ ପଡିବ । କରୋନା ଭାଇରସ୍ ଯୋଗୁଁ ରାଜ୍ୟରେ ସ୍ଥିତି ସଙ୍ଗୀନ ରହିଥିବାରୁ ଏବେ ଏପରି କରିବା ବହୁ କଷ୍ଟକର ହୋଇପଡିବ । ଗୋଟିଏ ପଟେ ଉଦ୍ଧବ ସରକାର କରୋନା ସହ ଲଢେଇ କରୁଥିବାବେଳେ ଏହି କରୋନା କବଳରୁ ନିଜ ଚୌକିକୁ କିପରି ବଞ୍ଚାଇବେ ତାହା ଏକ ବଡ ପ୍ରଶ୍ନ ହୋଇପଡିଛି। (ଏଜେନ୍ସି)
