ଭୁବନେଶ୍ୱର: କେନ୍ଦୁଝର ଜିଲ୍ଲାର ଜଙ୍ଗଲ ଅଧିକାରୀମାନେ ପ୍ରାୟ ୧୯ କିଲୋଗ୍ରାମର ୧୪ ଟି ହାତୀ ଦାନ୍ତ ଜବତ କରିଛନ୍ତି। ତିନି ଜଣଙ୍କୁ ଗିରଫ କରାଯାଇଛି ବୋଲି କେନ୍ଦୁଝର ଜଙ୍ଗଲ ବିଭାଗ କହିଛି। ସୋମବାର ବିଳମ୍ବିତ ରାତିରେ ପିଟାପିଟି ଗ୍ରାମ ନିକଟରୁ ଏକ କାରରୁ ଏହି ଦାନ୍ତ ଜବତ କରାଯାଇଛି ବୋଲି ହରିଚନ୍ଦନପୁର ପୋଲିସ ଅଧିକାରୀ କହିଛନ୍ତି।
ଏକ କାରରେ ଦାନ୍ତ ନିଆଯାଉଛି ବୋଲି ସୂଚନା ମିଳିବା ପରେ ପୋଲିସ ଓ ଜଙ୍ଗଲ ବିଭାଗର ଅଧିକାରୀମାନେ ଜଗି ବସିଥିଲେ। କାରଟି ଆସିବା ପରେ ତାକୁ ଅଟକାଇ ଥିଲେ ମଧ୍ୟ ତାହା ରହି ନ ଥିଲା। ସେଠାରୁ ଖସି ପଳାଇବା ପାଇଁ ଡ୍ରାଇଭର ଜୋରରେ କାର ଚଳାଇଥିଲା। ହେଲେ ସେମାନଙ୍କୁ ପୋଲିସ ଗୋଡାଇ ଗୋଡାଇ ଧରିବା ପରେ ଦାନ୍ତ ବାହାରିଥିଲା। ବର୍ତ୍ତମାନ ଏହା ପଛରେ କେଉଁମାନେ ଅଛନ୍ତି ତାହା ତଦନ୍ତ ଚାଲିଛି ବୋଲି ପୋଲିସ କହିଛି।
Tags: କେନ୍ଦୁଝର ପୋଲିସ, ହାତୀ ଦାନ୍ତ
