ସୀତାରାମ ଅଗ୍ରଓ୍ବାଲ
ଚିଲିକା: ଦୀର୍ଘ ୭ ମାସ ଧରି ତାଣ୍ଡବ ରଚାଇଥିବା ମହାମାରୀ କରୋନା ପ୍ରଭାବରେ ସମଗ୍ର ଅଞ୍ଚଳ ଅସ୍ତବ୍ୟସ୍ତ। ଏହି ଅବଧି ମଧ୍ୟରେ ଅନେକେ କରୋନାରେ ଆକ୍ରାନ୍ତ ହେବାସହ ଅନେକ ଅମୁଲ୍ୟ ଜୀବନ ମଧ୍ୟ ଚାଲିଯାଇଛି। କରୋନା କେବଳ ଜନଜୀବନ ଉପରେ ପ୍ରଭାବ ବିସ୍ତାର କରିନି ଏହି ପରିସ୍ଥିତି ଯୋଗୁଁ ଅନେକେ ଜୀବିକା ମଧ୍ୟ ହରାଇଛନ୍ତି। ଛୋଟମୋଟ ବ୍ୟବସାୟୀଙ୍କଠାରୁ ଆରମ୍ଭ କରି ଦିନ ମଜୁରିଆ, ଟ୍ୟୁସନ୍ ମାଷ୍ଟର ତଥା ବୁଲା ବିକାଳୀମାନେ ଜୀବିକା ହରାଇଛନ୍ତି।
ସେହିପରି କରୋନା ମାଡରୁ ପୂଜକମାନେ ମଧ୍ୟ ବର୍ତ୍ତି ପାରିନାହାନ୍ତି। କରୋନା କାଳରେ ବହୁ ସଂକଟର ସମ୍ମୁଖୀନ ହୋଇଛନ୍ତି ମନ୍ଦିରର ପୂଜା ପଣ୍ଡାମାନେ। ଭକ୍ତଙ୍କ ଅନୁଦାନରେ ପୂଜାରୀର ପରିବାର ପ୍ରତିପୋଷଣ ହେଉଥିବାବେଳେ ଭକ୍ତଙ୍କୁ ମନ୍ଦିର ବାରଣ କରାଯାଇଛି। କରୋନା ଯୋଗୁଁ ଦୀର୍ଘ ସାତ ମାସ ଧରି ମନ୍ଦିରଗୁଡିକ ବନ୍ଦ ରହିଛି। ଅନଲକ୍ ପ୍ରକ୍ରିୟାରେ ରାଜ୍ୟର କେତେକ ପର୍ଯ୍ୟଟନ ସ୍ଥଳୀଗୁଡ଼ିକକୁ ଖୋଲିବା ପାଇଁ ସରକାରୀ ଅନୁମତି ମିଳିଥିବା ସତ୍ୱେ ଏପର୍ଯ୍ୟନ୍ତ ଧର୍ମନୁଷ୍ଠାନ ଗୁଡିକ ବନ୍ଦ ରହିଛି। କେବଳ ନୀତିକାନ୍ତି ଅନୁଯାୟୀ ପୂଜକ ଏବଂ ସେବାୟତ ମାନେ ପ୍ରତ୍ୟେକ ଦିନ ମନ୍ଦିର ଗୁଡିକରେ ପୂଜାର୍ଚନା କରୁଛନ୍ତି। କାଁ ଭାଁ ଶ୍ରଦ୍ଧାଳୁ ମାନଙ୍କ ଆଗମନରେ ପୂଜକ ଓ ସେବାୟତମାନେ ସେମାନଙ୍କ ଅନୁଦାନ ଦ୍ୱାରା ପରିବାର ପୋଷଣ କରିଥାନ୍ତି। ମାତ୍ର ଖୋର୍ଦ୍ଧା ଜିଲ୍ଲା ଅନ୍ତର୍ଗତ ଚିଲିକା ବ୍ଲକର ବହୁ ପୁରାତନ ତଥା ଏକୋଇଶି ମୌଜାର ଆରାଧ୍ୟ ଦେବତା ଶ୍ରୀ ରାମେଶ୍ୱର ଦେବଙ୍କ ପୀଠରେ ଅଭାବନୀୟ ଘଟଣା ଘଟିଯାଇଛି। ଏଠାରେ ନିତିଦିନ ପୂଜକ ସ୍ଥାନୀୟ ବାସିନ୍ଦା କେଞ୍ଚୁ ପଣ୍ଡାଙ୍କୁ ଉପେକ୍ଷା କରାଯାଉଥିବାବେଳେ ଅନ୍ୟ ସେବାୟତଙ୍କ ପ୍ରାଦୁର୍ଭାବ ଦେଖିବାକୁ ମିଳିଛି।
ସୂଚନା ମୁତାବକ ରାମେଶ୍ୱର ଦେବଙ୍କ ମୁଖ୍ୟ ପୂଜକ କେଞ୍ଚୁ ପଣ୍ଡା ଦୀର୍ଘ ଦୁଇ ବର୍ଷରୁ ଊର୍ଧ୍ୱ ସମୟ ଧରି ଠାକୁରଙ୍କ ସେବା କରିଆସୁଥିବା ବେଳେ ଅନ୍ୟ ସେବାୟତମାନେ ଗୋଷ୍ଠୀବଦ୍ଧ ହୋଇ ତାଙ୍କୁ ଠାକୁରଙ୍କ ସେବା କାମରୁ ନିବୃତ କରିବା ସହ ନାନାଦି ବାଧା ଉପୁଜାଉଥିବା କୋହଭରା କଣ୍ଠରେ ଶ୍ରୀ ପଣ୍ଡା କହିଥିଲେ। ଏଥିସହ ମନ୍ଦିର ଟ୍ରଷ୍ଟି ଙ୍କୁ ବାରମ୍ବାର ଅଭିଯୋଗ କଲାପରେ ମଧ୍ୟ ସେମାନେ ଏହାକୁ କର୍ଣ୍ଣପାତ କରି ଏଡାଇ ଦେଉଛନ୍ତି।
ଏ ସମ୍ପର୍କରେ ରବିବାର ପୂର୍ବାହ୍ନରେ ବାଲୁଗାଁ ଶାଳିଆ ପ୍ରେସ କ୍ଲବ କୌଣସି ମତେ ସନ୍ଧାନ ପାଇ ଘଟଣା ସମ୍ପର୍କରେ ଆଲୋକପାତ କରିବାରୁ ପୂଜକ ମହାଶୟ ନିଜେ ଠାକୁରଙ୍କ ପ୍ରତି ଅଗାଢ ଭକ୍ତିର ସହ କାର୍ଯ୍ୟନିର୍ବାହ କଲେ ମଧ୍ୟ ସାଥି ସେବାୟତ ମାନଙ୍କ ଦ୍ୱାରା ମାନସିକ ଏବଂ ଶାରୀରିକ ନିର୍ଯ୍ୟାତନା ପାଇଥିବା ଏବଂ ତତସହିତ ଶ୍ରଦ୍ଧାଳୁଙ୍କ ଦାନକୁ ସେବାୟତ ମାନେ ହଡପ କରୁଥିବାର ଅଭିଯୋଗ କରିଛନ୍ତି। ଏ ସମ୍ପର୍କରେ ରାମେଶ୍ୱର ଟ୍ରଷ୍ଟ ବୋର୍ଡର କିଛି ସଦସ୍ୟଙ୍କୁ ପଚାରିବାରୁ ସେମାନଙ୍କଠୁ କୌଣସି ସନ୍ତୋଷଜନକ ଉତ୍ତର ମିଳିପାରିନଥିବା ବେଳେ ଆଗାମୀ ଦିନରେ ଏହା ଉପରେ ସବିଶେଷ ଆଲୋଚନା କରାଯାଇ ଉଚିତ ପଦକ୍ଷେପ ନିଆଯିବ ବୋଲି ଟ୍ରଷ୍ଟ ବୋର୍ଡ ସଭାପତି ଭ୍ରମରବର ପାଇକରାୟ ସୂଚନା ଦେଇଥିଲେ। ମାତ୍ର ପୂଜକ କେଞ୍ଚୁ ପଣ୍ଡା ଏବଂ ତାଙ୍କ କନିଷ୍ଠ ଭାଇ କେଳୁ ଚରଣ ପଣ୍ଡା ଅତ୍ୟନ୍ତ ମର୍ମାହତ ହୋଇ ସ୍ଥାନୀୟ ଜନସାଧାରଣ ତଥା ଟ୍ରଷ୍ଟ ବୋର୍ଡର ସମସ୍ତ ସଦସ୍ୟଙ୍କୁ ଏହାର ସ୍ଥାୟୀ ଏବଂ ଆଶୁ ସମାଧାନ ପାଇଁ ଅନୁରୋଧ କରିଛନ୍ତି।
