ଚଳିତ ମାସର ପ୍ରଥମ ଦିନରେ ସାଧାରଣ ଲୋକଙ୍କୁ ଝଟକା ଲାଗିଛି। ବୁଧବାର ଘରୋଇ ରନ୍ଧନ ଗ୍ୟାସ (ଏଲପିଜି) ଦରରେ ବୃଦ୍ଧି ଘଟିଛି। ସରକାରୀ ସେକ୍ଟରରେ ତୈଳ କମ୍ପାନୀଗୁଡ଼ିକ ଇନ୍ଧନ ଗ୍ୟାସ ସିଲିଣ୍ଡର୍ ଦର ବୃଦ୍ଧି କରିଛନ୍ତି। ସବ୍ସିଡି ଯୁକ୍ତ ୧୪.୨ କେଜି ଏଲପିଜି ସିଲିଣ୍ଡର ଦର ଦିଲ୍ଲୀରେ ୨୮ ପଇସା ଏବଂ ମୁମ୍ବଇରେ ୨୯ ପଇସା ବୃଦ୍ଧି ପାଇଛି। ତେବେ ଅଣ ସବ୍ସିଡି ୧୪.୨ କେଜି ଏଲପିଜି ସିଲିଣ୍ଡର ଦର ଦିଲ୍ଲୀ ଓ ମୁମ୍ବଇରେ ୬ ଟଙ୍କା ବୃଦ୍ଧି ପାଇଛି।ଏହା ପୂର୍ବରୁ ଅପ୍ରେଲ ୧ ରେ ଘରୋଇ ରନ୍ଧନ ଗ୍ୟାସ ଦରରେ ବୃଦ୍ଧି କରାଯାଇଥିଲା। ସେତେବେଳେ ଅଣ ସବ୍ସିଡି ଏଲପିଜି ସିଲିଣ୍ଡର ଦର ବୃଦ୍ଧି ପାଇ ୭୦୬.୫୦ ହୋଇଥିଲା। ଭାରତୀୟ ତୈଳ ନିଗମ (ଆଇଓସି) ଅନୁସାରେ ଦାମ ବୃଦ୍ଧି ସହ ଅଣ ସବ୍ସିଡି ଏଲପିଜି ସିଲିଣ୍ଡର ଦର ଦିଲ୍ଲୀରେ ୭୧୨.୫ ଟଙ୍କା, କଲିକତାରେ ୭୩୮.୫ ଟଙ୍କା, ମୁମ୍ବଇରେ ୬୮୪.୫ ଟଙ୍କା ଏବଂ ଚେନ୍ନଇରେ ୭୨୮ ଟଙ୍କାରେ ପହଞ୍ଚିଛି। ଏହି କ୍ରମରେ ସବ୍ସିଡି ଯୁକ୍ତ ଏଲପିଜି ସିଲିଣ୍ଡର ଦର ଦିଲ୍ଲୀରେ ୪୯୬.୧୪ ଟଙ୍କା, କଲିକତାରେ ୪୯୯.୨୯ ଟଙ୍କା, ମୁମ୍ବଇରେ ୪୯୩.୮୬ ଟଙ୍କା ଏବଂ ଚେନ୍ନଇରେ ୪୮୪.୦୨ ଟଙ୍କାରେ ପହଞ୍ଚିଛି।
