ଆଜି ହେଉଛି ମଦର୍ସ ଡେ’ ବା ମାତୃ ଦିବସ । ମଇ ୧୨ ତାରିଖ ଦିନ ବିଶ୍ବ ମାତୃ ଦିବସ ପାଳନ କରାଯାଇଥାଏ । ତେବେ କେତେକ ଦେଶରେ ଏହାକୁ ଅଲଗା ଅଲଗା ଦିନରେ ମଧ୍ୟ ପାଳନ କରାଯାଏ । ଏମିତିରେ ଦେଖିବାକୁ ଗଲେ ପ୍ରତ୍ୟେକ ଦିନ ହେଉଛି ମାତୃ ଦିବସ । ମା’ ହେଉଛି ଏକ ପବିତ୍ର ଓ ମଧୁର ଶବ୍ଦ । ଏହି ଶବ୍ଦରେ ଲୁଚି ରହିଛି ମମତା ଓ ସହନଶୀଳତା । ମା’ର ପଣତକାନି ସାରା ଦୁନିଆର ଦୁଃଖ ପାଇଁ ନିଅଣ୍ଟ । ସେ ହେଉଛି ସର୍ବଂସହା, ସେ ସ୍ରଷ୍ଟା ଓ ପୁଣି ସେ ସୃଷ୍ଟି । ସମଗ୍ର ସଂସାର ତା’ ଭିତରେ ବିଦ୍ୟମାନ । ତେବେ ଚଳିତ ବର୍ଷ ମାତୃ ଦିବସ ୨୦୧୯ର ଏକ ଥିମ୍ ରଖାଯାଇଛି । ଏହି ଥିମ୍ ହେଉଛି ବାଲାନ୍ସ ଫର୍ ବେଟର୍ ଅର୍ଥାତ୍ ବିଶ୍ବରେ ଲିଙ୍ଗ ସନ୍ତୁଳନ ରକ୍ଷା କରିବା । ଏହା ସାହାଯ୍ୟରେ ସମଗ୍ର ବିଶ୍ୱବାସୀଙ୍କୁ ଲିଙ୍ଗ ସନ୍ତୁଳନ ରକ୍ଷା କରିବାର ବାର୍ତ୍ତା ପ୍ରେରଣ କରାଯାଇଛି । ତେବେ ମାତୃ ଦିବସର ଆରମ୍ଭ ଆମେରିକାରୁ ହୋଇଥିଲା । ୱର୍ଜିନିଆରେ ଏନା ଜାର୍ବିସ୍ ନାମକ ଜଣେ ମହିଳା ଏହାର ଆରମ୍ଭ କରିଥିଲେ । ଏନା ନିଜ ମାକୁ ଖୁବ୍ ଭଲ ପାଉଥିଲେ । ଅବିବାହିତ ଏନା ତାଙ୍କ ମାଙ୍କ ନିଧନ ପରେ ତାଙ୍କ ସ୍ମୃତି ଉଦ୍ଦେଶ୍ୟରେ ଏହି ଖାସ୍ ଦିନର ଆରମ୍ଭ କରିଥିଲେ । ତେବେ ଗୋଟିଏ ଦିନ ନୁହେଁ, ପ୍ରତ୍ୟେକ ଦିନର ଆରମ୍ଭ ଓ ଶେଷ ହୁଏ ସେଇ ମା’ ପାଖରେ । ଯିଏ ନଅ ମାସ ପର୍ଯ୍ୟନ୍ତ ପେଟରେ ରଖି ଆମକୁ ଏ ଦୁନିଆର ଆଲୋକ ଦେଖାଇଛି ପୁଣି ସାରା ଦୁନିଆର ଦୁଃଖ କଷ୍ଟଠାରୁ ଦୂରେଇ ରଖି ଆମକୁ ବଡ଼ କରିଛି । ଆଜିର ପବିତ୍ର ମାତୃ ଦିବସ ଅବସରରେ ଦୁନିଆର ସବୁ ମା’ମାନଙ୍କୁ ଆମର କୋଟି କୋଟି ପ୍ରଣାମ ।
