ନୂଆଦିଲ୍ଲୀ: ଆଜି କଂଗ୍ରେସ ଅଭିଯୋଗ କରିଛି ଯେ, ରାୟପୁର ଅଭିମୁଖେ ବିମାନରୁ ଏହାର ମିଡିଆ ବିଭାଗର ମୁଖ୍ୟ ପୱନ ଖେଡାଙ୍କୁ ଓହ୍ଲାଇ ଦିଆଯାଇଛି। ଦଳର ମୁଖପାତ୍ର ସୁପ୍ରିୟା ଶ୍ରୀନେତ ପ୍ରଶ୍ନ କରିଛନ୍ତି ଯେ, ଖେଡାଙ୍କୁ କେଉଁ ଆଧାରରେ ଓହ୍ଲାଇଦିଆଯାଇଛି ଏବଂ ଦେଶରେ କୌଣସି ଆଇନ ଅଛି କି, ନାହିଁ? କୁହାଯାଏ ଯେ, ଏହି ଘଟଣା ଇଣ୍ଡିଗୋ ବିମାନ ନମ୍ବର ୬ଇ୨୦୪ ରେ ଘଟିଥିଲା ଏବଂ ଏହାର ପ୍ରତିବାଦରେ ଅନେକ କଂଗ୍ରେସ ନେତା ବିମାନରୁ ଓହ୍ଲାଇ ଆସିଥିଲେ ଏବଂ ବିମାନଟି ଏବେ ବି ଛିଡା ହୋଇଛି।
ଏହି ପ୍ରସଙ୍ଗରେ କଂଗ୍ରେସ ବିଜେପି ଉପରେ ପ୍ରଶ୍ନ ଉଠାଇଛି। ଦଳ ଏହାକୁ ଛତିଶଗଡରେ କଂଗ୍ରେସ ଅଧିବେଶନ ସହ ଯୋଡିଛି। ରାୟପୁରରେ ଅନୁଷ୍ଠିତ ହେବାକୁ ଥିବା ଜାତୀୟ ସମ୍ମିଳନୀକୁ ରୋକିବା ପାଇଁ ଉଦ୍ୟମ କରାଯାଉଛି ବୋଲି କଂଗ୍ରେସ ଅଭିଯୋଗ କରିଛି। ପ୍ରକାଶ ଯୋଗ୍ୟ ଯେ ପୱନ ଖେଡା ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇଛନ୍ତି। ଏହି ମନ୍ତବ୍ୟ ସମ୍ପର୍କରେ ବିଜେପି ତାଙ୍କ ବିରୋଧରେ ଅଭିଯୋଗ ଆଣିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅପମାନିତ କରିଥିବାରୁ ଖେଡାଙ୍କୁ ଗିରଫ କରିବାକୁ ବିଜେପି ଦାବି କରିଛି।
