ଭୁବନେଶ୍ୱର: ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ଖୋର୍ଦ୍ଧା ଜିଲ୍ଲା ପ୍ରଶାସନର ମିଳିତ ଆନୁକୂଲ୍ୟରେ ଆଜି ବିଜେବି ସ୍ୱୟଂଶାସିତ ମହାବିଦ୍ୟାଳୟରେ ଭୋଟର ସଚେତନନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଉପଲକ୍ଷେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ବିଏମ୍ସି କମିଶନର ଶ୍ରୀ ରାଜେଶ ପ୍ରଭାକର ପାଟିଲ, ଖୋର୍ଦ୍ଧା ଜିଲ୍ଲାପାଳ ଚଞ୍ଚଳ ରାଣା, ବିଜେବି କଲେଜ ଅଧ୍ୟକ୍ଷା ପ୍ରଫେସର ଇତିଶ୍ରୀ ପାଢୀ, ଆଂଚଳିକ ଉଚ୍ଚଶିକ୍ଷା ବିଭାଗ ନିର୍ଦ୍ଦେଶକ ସୁମନ ଦାସ ପ୍ରମୁଖ ଉପସ୍ଥିତ ରହି ଛାତ୍ରଛାତ୍ରୀମାନଙ୍କୁ ଭୋଟ ଦେବା ସହ ଅନ୍ୟମାନଙ୍କୁ ଭୋଟ ଦେବା ପାଇଁ ଉତ୍ସାହିତ କରିବାକୁ କହିଥିଲେ। ଏହି ଅବସରରେ ନୂତନ ଭୋଟରମାନଙ୍କୁ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା।
ବହୁ ବ୍ୟକ୍ତିଙ୍କ ବଳିଦାନରେ ଆମକୁ ମିଳିଛି ଏହି ଗଣତନ୍ତ୍ର । ସାରା ବିଶ୍ୱରେ ଆମର ଗଣତନ୍ତ୍ର ସର୍ବ ବୃହତ । ଆମ ସହିତ ସ୍ୱାଧୀନତା ପାଇଥିବା ବିଶ୍ୱର ଅନ୍ୟ ରାଷ୍ଟ୍ରଗୁଡିକ ନିଜର ଗଣତନ୍ତ୍ରକୁ ରକ୍ଷା କରିବା ପାଇଁ ଏବେ ସଂଗ୍ରାମ କରୁଛନ୍ତି । ଅନ୍ୟ ପକ୍ଷରେ ଆମର ଗଣତାନ୍ତ୍ରିକ ପଦ୍ଧତି ଚାଲୁ ରହିଛି କିନ୍ତୁ ସମୟକ୍ରମେ ଏହାକୁ ସୁଦୃଢ କରିବାର ଆବଶ୍ୟକତା ରହିଛି । ଏଥିରେ ମୂଳ ଅଂଶୀଦାର ହେଉଛନ୍ତି ଆମର ଭୋଟ ଦାତା; ବିଶେଷ କରି ନୂଆ ଏବଂ ଯୁବ ଭୋଟରମାନେ ଏହି ବିକାଶ ମୂଳକ ପ୍ରକ୍ରିୟାର ମଙ୍ଗ ଧରିବାକୁ ଉପସ୍ଥିତ ଛାତ୍ରଛାତ୍ରୀଙ୍କୁ ଆହ୍ୱାନ ଦେଇଥିଲେ ବିଏମସି କମିଶନର ଶ୍ରୀ ରାଜେଶ ପ୍ରଭାକର ପାଟିଲ । ଆଳସ୍ୟ ଭାବ ହେତୁ ଭୋଟ ନ ଦେବା ଏକ ଗଣତାନ୍ତ୍ରିକ ମୂଲ୍ୟବୋଧକୁ କ୍ଷୁର୍ଣ୍ଣ କରୁଛି । ତେଣୁ ପ୍ରତି ନିର୍ବାଚନରେ ଆଗ୍ରହର ସହିତ ମତଦାନ କରିବା ଅଭ୍ୟାସକୁ ସମସ୍ତେ ଆପଣେଇବାକୁ ସେ ପରାମର୍ଶ ଦେଇଛନ୍ତି । ଭୁବନେଶ୍ୱରରେ ହେଉଥିବା ୪୩ ପ୍ରତିଶତ ଭୋଟ ହାରକୁ ଶତ ପ୍ରତିଶତ କରିବା ପାଇଁ ସେ ଆହ୍ୱାନ ଦେଇଥିଲେ ।
ଭୁବନେଶ୍ୱର ଅନ୍ତର୍ଗତ ୩ଟି ବିଧାନସଭା ନିର୍ବାଚନ ମଣ୍ଡଳୀରେ ପ୍ରାୟ ୭୦୦ ବୁଥ ରହିଛି । ସେଗୁଡିକ ମଧ୍ୟରୁ ପ୍ରାୟ ୩୫୦ରୁ ଅଧିକ ବୁଥରେ କେବଳ ମହିଳା ଅଧିକାରୀ ଓ କର୍ମଚାରୀ ବୁଥ ପରିଚାଳନା କରିବେ । ସମସ୍ତ ରାଜନୈତିକ ଦଳ ଏହି ସବୁ ବୁଥ୍ ପାଇଁ ମହିଳା ପୋଲିଂ ଏଜେଣ୍ଟ ଦେବାକୁ ଅନୁରୋଧ କରିଛନ୍ତି ଖୋର୍ଦ୍ଧା ଜିଲ୍ଲାପାଳ ଶ୍ରୀ ଚଞ୍ଚଳ ରାଣା । ଚଳିତ ବର୍ଷ ଅଧିକ ନୂଆ ଭୋଟର ସାମିଲ ହୋଇଛନ୍ତି । ସେହିମାନେ ଭୋଟ ଦେବା ସହ ଅନ୍ୟମାନଙ୍କୁ ଭୋଟ ଦେବା ପାଇଁ ସଚେତନ କରାଇବାକୁ କହିଛନ୍ତି ଜିଲ୍ଲାପାଳ । ଏହା ବ୍ୟତିତ ଜିଲ୍ଲା ପ୍ରଶାସନ ପକ୍ଷରୁ ଏକ ଆପ୍ ପ୍ରସ୍ତୁତ କରାଯାଇଛି । ଏହି ଆପ ଦ୍ୱାରା ଭୁବନେଶ୍ୱରବାସୀ ସେମାନଙ୍କର ବୁଥ୍, କେତେ ଭୋଟର ମତଦାନ କରିଛନ୍ତି ଏବଂ ଆଉ କେତେ ଲୋକ ଭୋଟ ଦେବାକୁ ରହିଛନ୍ତି ଆଦି ତଥ୍ୟ ପାଇପାରିବେ ବୋଲି ସେ ସୂଚନା ଦେଇଛନ୍ତି ।
ବିଜେବି ସ୍ୱୟଂ ଶାସିତ ମହାବିଦ୍ୟାଳୟ ସଭାକକ୍ଷରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ୪ ଶହରୁ ଅଧିକ ଛାତ୍ରଛାତ୍ରୀ ଯୋଗଦେଇଥିବାବେଳେ ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀଗଣ, ଟିମ୍ ବି ଏମ୍ ସି, ଅଧ୍ୟାପକ, ଅଧ୍ୟାପିକା, କର୍ମଚାରୀ ସାମିଲ ହୋଇଥିଲେ ।
ଉପସ୍ଥିତ ଭୋଟରମାନଙ୍କୁ ଭୋଟ ଦେବା ପାଇଁ ଶପଥ ପାଠ କରାଯାଇଥିଲା ।
ଏହି ଅବସରରେ ପ୍ରଥମ ଥର ପାଇଁ ମତଦାନ କରିବାକୁ ଥିବା ଯୁବ ଭୋଟର ମାନଙ୍କୁ ସମ୍ବର୍ଦ୍ଧନା, କୁଇଜ ଏବଂ ଦସ୍ତଖତ ଅଭିଯାନ କରାଯାଇଥିଲା । ଭୋଟରମାନଙ୍କୁ ସଚେତନ କରାଇବା ପାଇଁ ଜାଗରଣ ଓ ଏଆଇପିଏଚ୍ କଳାକାରଙ୍କ ଦ୍ୱାରା ପଥପ୍ରାନ୍ତ ନାଟକ ପରିବେଷଣ କରାଯାଇଥିଲା । ଗତ କାଲି ଉତ୍କଳ ଗ୍ୟାଲେରିଆ ମଲରେ ଏବଂ ଆଜି ସକାଳୁ ଲିଙ୍ଗରାଜଙ୍କ ମନ୍ଦିର ସମ୍ମୁଖ ସହ ବିଭିନ୍ନ ସ୍ଥାନରେ ପଥପ୍ରାନ୍ତ ନାଟକ ମାଧ୍ୟମରେ ନିଜ ନିଜର ମତାଧିକାର ସାବ୍ୟସ୍ତ କରିବା ପାଇଁ ଲୋକମାନଙ୍କୁ ସଚେତନ କରାଯାଇଛି ।
