ବାଣପୁର: ଆଜି ଚିଲିକା ବିଧାନସଭା କ୍ଷେତ୍ର ସ୍ଥିତ ବାଣପୁର ବ୍ଲକରେ ଆୟୋଜିତ ବିଶାଳ ‘ମହିଳା ସମାବେଶ’ ରେ ସ୍ଥାନୀୟ ବିଧାୟକ ତଥା ଆଇନ ମନ୍ତ୍ରୀ ପୃଥ୍ୱୀରାଜ ହରିଚ଼ନ୍ଦନ ଏବଂ ପୁରୀ ସାଂସଦ ଡ଼ା ସମ୍ବିତ ପାତ୍ର ଯୋଗ ଦେଇ ସଭାକୁ ସମ୍ବୋଧିତ କରିଥିଲେ। ମହାପ୍ରଭୁ ଶ୍ରୀ ଜଗନ୍ନାଥଙ୍କ ଆଶୀର୍ବାଦ ଓ ଆପଣ ମାନଙ୍କ ସହଯୋଗରେ ଉଭୟ କେନ୍ଦ୍ର ଓ ରାଜ୍ୟରେ ଡ଼ବଲ ଇଞ୍ଜିନର ସରକାର ଗଠିତ ହୋଇଛି। ଆମ ସରକାର ଗରିବ, କୃଷକ, ମହିଳା, ଯୁବକ ଓ ଅସହାୟଙ୍କ କଲ୍ୟାଣ ଲାଗି ଅନେକ କଲ୍ୟାଣକାରୀ ଯୋଜନା କାର୍ଯ୍ୟକାରୀ ହୋଇଛି। ପ୍ରତିଟି ନିଷ୍ପତ୍ତିରେ ଭରି ରହିଛି ଓଡ଼ିଆ ଅସ୍ମିତା, ସ୍ବାଭିମାନ ଓ ନବଜାଗରଣର ସ୍ବର୍ଣ୍ଣିମ ସ୍ପର୍ଶ।
ଆଦରଣୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମାନନୀୟ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଡବଲ ଇଞ୍ଜିନ ସରକାର ଆଜି ଆମର ମାତୃଶକ୍ତିଙ୍କୁ ସଶକ୍ତିକରଣ କରୁଛି। କେନ୍ଦ୍ର ସରକାରଙ୍କ ଯୋଜନା ମାଧ୍ୟମରେ ଆଜି ଓଡ଼ିଶାର ମହିଳା ମାନେ ସିଧା ଲାଭବାନ ହେଉଛନ୍ତି। ବିକଶିତ ଓଡ଼ିଶା ଗଠନ ନିମନ୍ତେ ଆମ ସରକାର ପ୍ରତିବଦ୍ଧତାର ସହ ‘ସୁଭଦ୍ରା’ ଯୋଜନା କାର୍ଯ୍ୟକାରୀ କରିଛନ୍ତି ବୋଲି ମାନ୍ୟବର ମନ୍ତ୍ରୀ ଶ୍ରୀ ହରିଚ଼ନ୍ଦନ ମତବ୍ୟକ୍ତ କରିଥିଲେ। ଅନୁରୂପ ଭାବେ ସାଂସଦ ଡ଼ା ପାତ୍ର ମଧ୍ୟ ପ୍ରଧାନମନ୍ତ୍ରୀ ମୋଦିଙ୍କ ପ୍ରଶଂସା କରିବା ସହ ମୋହନ ସରକାର ମହିଳାଙ୍କ ପାଇଁ ସମର୍ପିତ ବୋଲି କହିଥିଲେ।
ଏହି ସମାବେଶରେ ବାଣପୁର ବ୍ଲକ୍ ଅଧ୍ୟକ୍ଷ ଅମରେନ୍ଦ୍ର ରଣସିଂହ, ଚିଲିକା ବ୍ଲକ ଅଧ୍ୟକ୍ଷା ଜ୍ୟୋତ୍ସ୍ନା ବେହେରା, ବିଡ଼ିଓ ଶୀତଲ ଅଗ୍ରୱାଲ, ସିଡିପିଓ, ବ୍ଲକ ଶିକ୍ଷା ଅଧିକାରିଣୀ ଓ ମହିଳା ସଙ୍ଘର ସଭାନେତ୍ରୀ ପ୍ରମୁଖ ଉପସ୍ଥିତ ଥିଲେ।
