ନୂଆଦିଲ୍ଲୀ: ନିର୍ବାଚନ ଆୟୋଗଙ୍କୁ ଇଭିଏମ୍ ଯାଞ୍ଚ ସହ ଜଡିତ ଏକ ଆବେଦନ ଉପରେ ଉତ୍ତର ଦାଖଲ କରିବାକୁ ସୁପ୍ରିମକୋର୍ଟ କହିଛନ୍ତି। ଆସୋସିଏସନ ଫର ଡେମୋକ୍ରାଟିକ୍ ରିଫର୍ମସ୍ (ଏଡିଆର) ର ଏହି ପିଟିସନରେ ସୁପ୍ରିମକୋର୍ଟ ନିର୍ବାଚନ କମିଶନଙ୍କୁ ଇଭିଏମ୍ ର ବର୍ଣ୍ଟ ମେମୋରୀ ଯାଞ୍ଚ ପାଇଁ ଏକ ସ୍ପଷ୍ଟ ପ୍ରୋଟୋକଲ୍ ପ୍ରସ୍ତୁତ କରିବାକୁ କହିଛନ୍ତି। ମାର୍ଚ୍ଚ ପ୍ରଥମ ସପ୍ତାହରେ ଏହାର ଶୁଣାଣି କରିବା ପାଇଁ ସୁପ୍ରିମକୋର୍ଟର ପ୍ରଧାନ ବିଚାରପତି ସଞ୍ଜୀବ ଖାନ୍ନା ଏବଂ ଜଷ୍ଟିସ ଦୀପାଙ୍କର ଦତ୍ତଙ୍କ ଖଣ୍ଡପୀଠ କହିଛନ୍ତି। ଅଦାଲତ ଏହା ମଧ୍ୟ କହିଛନ୍ତି ଯେ, ନିକଟରେ ନିର୍ବାଚନ ଅନୁଷ୍ଠିତ ହୋଇଥିବା ସ୍ଥାନଗୁଡିକର ଇଭିଏମ୍ ତଥ୍ୟ ଡିଲିଟ୍ କରିବା ଉଚିତ୍ ନୁହେଁ କିମ୍ବା ଏଥିରେ ନୂତନ ତଥ୍ୟ ଲୋଡ୍ କରିବା ଉଚିତ୍ ନୁହେଁ।
ଗତ ବର୍ଷ ସୁପ୍ରିମକୋର୍ଟର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ ଦର୍ଶାଯାଇଛି। ଏହି ନିଷ୍ପତ୍ତିରେ ସୁପ୍ରିମକୋର୍ଟ ବାଲାଟ ପେପର ମାଧ୍ୟମରେ ନିର୍ବାଚନର ପୁରୁଣା ବ୍ୟବସ୍ଥାକୁ ଫେରାଇ ଆଣିବାକୁ ମନା କରିଦେଇଥିଲେ। ଏହା ବ୍ୟତୀତ ସମସ୍ତ VVPAT ସ୍ଲିପ୍ ଗଣନା କରିବାର ଦାବି ମଧ୍ୟ ଖାରଜ କରାଯାଇଥିଲା। କିନ୍ତୁ ଉତ୍ତମ ସ୍ୱଚ୍ଛତା ପାଇଁ ନିର୍ବାଚନ ଫଳାଫଳ ଘୋଷଣା ହେବାର ୧ ସପ୍ତାହ ମଧ୍ୟରେ ଇଭିଏମ୍ ର ବର୍ଣ୍ଟ ମେମୋରୀ ଯାଞ୍ଚ କରିବାକୁ କୋର୍ଟ ଅନୁମତି ଦେଇଛନ୍ତି।
ମାର୍ଚ୍ଚ ୨୬ ତାରିଖ ୨୦୨୪ ରେ ଦିଆଯାଇଥିବା ଏହି ନିଷ୍ପତ୍ତିରେ ସୁପ୍ରିମକୋର୍ଟ କହିଥିଲେ ଯେ, ଦ୍ୱିତୀୟ କିମ୍ବା ତୃତୀୟ ମାନ୍ୟତା ପ୍ରାର୍ଥୀ ଫଳାଫଳ ଘୋଷଣା ହେବାର ଏକ ସପ୍ତାହ ମଧ୍ୟରେ ପୁନଃ-ଯାଞ୍ଚ ପାଇଁ ଦାବି କରିପାରିବେ। ଏପରି ପରିସ୍ଥିତିରେ, ଇଞ୍ଜିନିୟର ଦଳ ଯେକୌଣସି ୫ ମାଇକ୍ରୋ କଣ୍ଟ୍ରୋଲରର ବର୍ଣ୍ଟ ମେମୋରୀ ଯାଞ୍ଚ କରିବେ। ପ୍ରାର୍ଥୀଙ୍କୁ ଏହି ଅନୁସନ୍ଧାନର ଖର୍ଚ୍ଚ ବହନ କରିବାକୁ ପଡିବ। ଯଦି ଅନିୟମିତତା ପ୍ରମାଣିତ ହୁଏ ତେବେ ପ୍ରାର୍ଥୀ ଟଙ୍କା ଫେରସ୍ତ ପାଇବେ।
ADR ର ଆବେଦନରେ କୁହାଯାଇଛି ଯେ, ନିର୍ବାଚନ ଆୟୋଗର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିସର୍ (SOP) ରେ କେବଳ ଇଭିଏମ୍ ଏବଂ ମକ୍ ପୋଲର ମୌଳିକ ଯାଞ୍ଚ ପାଇଁ ନିର୍ଦ୍ଦେଶ ରହିଛି। ବର୍ଣ୍ଟ ମେମୋରୀର ଯାଞ୍ଚ ସମ୍ପର୍କରେ ଆୟୋଗ ଏପର୍ଯ୍ୟନ୍ତ ପ୍ରୋଟୋକଲ ପ୍ରସ୍ତୁତ କରିନାହାଁନ୍ତି। ଇଭିଏମ୍, କଣ୍ଟ୍ରୋଲ୍ ୟୁନିଟ୍, ବାଲାଟ୍ ୟୁନିଟ୍, ଭିଭିପିଏଟ୍ ଏବଂ ସିମ୍ବଲ ଲୋଡିଂ ୟୁନିଟ୍ ର ଚାରିଟି ଅଂଶର ମାଇକ୍ରୋ କଣ୍ଟ୍ରୋଲର ଯାଞ୍ଚ ପାଇଁ ପ୍ରୋଟୋକଲ୍ କାର୍ଯ୍ୟକାରୀ କରିବାକୁ ନିର୍ବାଚନ ଆୟୋଗଙ୍କୁ ନିର୍ଦ୍ଦେଶ ଦେବାକୁ ଆବେଦନକାରୀ ଦାବି କରିଛନ୍ତି।
