ଭୁବନେଶ୍ୱର: ଆଞ୍ଚଳିକ ଶିକ୍ଷା ପ୍ରତିଷ୍ଠାନ, ଭୁବନେଶ୍ୱର ଦିବାକର ପଟ୍ଟନାୟକ ଅଗ୍ରଗ୍ରାମୀ ଶିକ୍ଷା ପ୍ରତିଷ୍ଠାନ, ବ୍ରହ୍ମପୁର, ଓଡିଶା ଏବଂ ଦେବସଂଘ ବୃତ୍ତିଗତ ଅଧ୍ୟୟନ ଏବଂ ଶିକ୍ଷା ଗବେଷଣା ସଂସ୍ଥାନ, ଦେଓଘର, ଝାଡ଼ଖଣ୍ଡ ସହିତ ବୁଝାମଣାପତ୍ର ସ୍ୱାକ୍ଷର କରିଛି। ଏହି ବୁଝାମଣାପତ୍ର ଶିକ୍ଷକ ଶିକ୍ଷା କ୍ଷେତ୍ରରେ ଗବେଷଣା, ଶୈକ୍ଷିକ ଆଦାନପ୍ରଦାନ ଏବଂ ଶୈକ୍ଷିକ ସମ୍ପ୍ରସାରଣ କାର୍ଯ୍ୟକ୍ରମରେ ସହଯୋଗକୁ ସୁଦୃଢ଼ କରିବ। ଆଞ୍ଚଳିକ ଶିକ୍ଷା ପ୍ରତିଷ୍ଠାନ, ଭୁବନେଶ୍ୱରର ଅଧ୍ୟକ୍ଷା ପ୍ରଫେସର ମାନସୀ ଗୋସ୍ୱାମୀ ଏହି ଅବସରରେ ପ୍ରତିଷ୍ଠାନ ଗୁଡ଼ିକ ମଧ୍ୟରେ ନିରନ୍ତର ସହଯୋଗର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ଜାତୀୟ ଶିକ୍ଷାନୀତି ୨୦୨୦ର ସୁପାରିଶ ସହିତ ସମନ୍ୱୟ ରଖି ଗୁଣାତ୍ମକ ଗବେଷଣା, ସମ୍ପ୍ରସାରଣ କାର୍ଯ୍ୟକ୍ରମ ଏବଂ ଶିକ୍ଷକ ଶିକ୍ଷାରେ ଶୈକ୍ଷିକ ପ୍ରକ୍ରିୟାକୁ ସୁଦୃଢ଼ କରିବାରେ ପ୍ରତିଷ୍ଠାନ ଗୁଡ଼ିକର ସହଭାଗୀତା ଉପଯୋଗୀ ହେବ ବୋଲି ସେ ପ୍ରକାଶ କରିଥିଲେ।
ପ୍ରତିଷ୍ଠାନର ଏମଓୟୁ କମିଟିର ଅଧ୍ୟକ୍ଷ ପ୍ରଫେସର ହୃଷିକେଶ ସେନାପତି ମଧ୍ୟ ଶିକ୍ଷକ ଶିକ୍ଷାରେ ଗବେଷଣା ସଂସ୍କୃତି, ଶୈକ୍ଷିକ ନବସୃଜନ ଏବଂ ସମ୍ପ୍ରସାରଣ ପଦକ୍ଷେପକୁ ସୁଦୃଢ଼ କରିବା ପାଇଁ ନିରନ୍ତର ପ୍ରତିଷ୍ଠାନଗତ ସହଭାଗୀତାର ଗୁରୁତ୍ୱ ଉପରେ ଆଲୋକପାତ କରିଥିଲେ। ପ୍ରଫେସର ମନୋଜ କୁମାର ପ୍ରଧାନ, ଅଧ୍ୟକ୍ଷ ଡି.ପି.ଆଇ.ଏ.ଏସ୍.ଇ, ବ୍ରହ୍ମପୁର ଏବଂ ପ୍ରଫେସର ରଜନିଶ ପାଣ୍ଡେ, ଅଧ୍ୟକ୍ଷ ଡି.ଆଇ.ପି.ଏସ.ଇ.ଆର, ଦେଓଘର, ଝାଡ଼ଖଣ୍ଡ ଛାତ୍ର, ଦକ୍ଷତା- ବିକାଶ କାର୍ଯ୍ୟକ୍ରମ ଏବଂ ସମ୍ପ୍ରସାରଣ ଓ ବିସ୍ତାର କାର୍ଯ୍ୟ ମାଧ୍ୟମରେ ସକ୍ରିୟ ସହଯୋଗ ଓ ସେମାନଙ୍କର ପ୍ରତିବଦ୍ଧତା ବିଷୟରେ ପ୍ରକାଶ କରିଥିଲେ। ସେମାନେ ଏପରି ସୁଯୋଗ ପ୍ରଦାନ କରିବା ପାଇଁ ଆଞ୍ଚଳିକ ଶିକ୍ଷା ପ୍ରତିଷ୍ଠାନ, ଭୁବନେଶ୍ୱରକୁ ଧନ୍ୟବାଦ ଜଣାଇଥିଲେ। ଏମ୍ଓୟୁ କମିଟିର ସଂଯୋଜକ ପ୍ରଫେସର ଲକ୍ଷ୍ମୀଧର ବେହେରା, ବିଭିନ୍ନ ବିଭାଗୀୟ ମୁଖ୍ୟ, ପ୍ରଶାସନିକ ଅଧିକାରୀ ତଥା ଏହି ପ୍ରତିଷ୍ଠାନ ଗୁଡ଼ିକର ଅଧ୍ୟାପକ- ଅଧ୍ୟାପିକା ଏବଂ ପ୍ରତିଷ୍ଠାନର ଅନ୍ୟାନ୍ୟ କର୍ମଚାରୀମାନେ ଏମ୍ଓୟୁ ସ୍ୱାକ୍ଷର ସମାରୋହରେ ଉପସ୍ଥିତ ଥିଲେ।