ନୂଆଦିଲ୍ଲୀ: ପଶ୍ଚିମ ଏସିଆରେ ଚାଲିଥିବା ସଙ୍କଟ ଯୋଗୁଁ ଇନ୍ଧନ ମୂଲ୍ୟ ବୃଦ୍ଧି ବିମାନ ଚଳାଚଳ କ୍ଷେତ୍ର ଉପରେ ଯଥେଷ୍ଟ ଚାପ ପକାଉଛି। ତୈଳ ସଙ୍କଟ ମଧ୍ୟରେ ମୋଦି ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ବୁଧବାର (ଜୁନ୍ ୩) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ତୈଳ ବିପଣନ କମ୍ପାନୀଗୁଡ଼ିକ ପାଇଁ ୧୦,୦୦୦ କୋଟି ଟଙ୍କାର ATF ପାଣ୍ଠିକୁ ଅନୁମୋଦନ କରାଯାଇଛି। ଏହି ପାଣ୍ଠି ତୈଳ ବିପଣନ କମ୍ପାନୀଗୁଡ଼ିକୁ ସ୍ଥିର ATF ମୂଲ୍ୟ ବଜାୟ ରଖିବାରେ ସାହାଯ୍ୟ କରିବ।
ଏକ ସରକାରୀ ବିବୃତ୍ତି ଅନୁଯାୟୀ, ସରକାରଙ୍କ ପକ୍ଷରୁ ଏହି ବଜେଟ୍ ସହାୟତା ତୈଳ ବିପଣନ କମ୍ପାନୀଗୁଡ଼ିକ (OMCs) କୁ ସୁଧମୁକ୍ତ ଅଗ୍ରିମ ଭାବରେ ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟର ଅନୁଦାନ ଦାବି ମାଧ୍ୟମରେ ପ୍ରଦାନ କରାଯିବ। ଉଦ୍ଦେଶ୍ୟ ହେଉଛି ଉଚ୍ଚ ଏବଂ ଅସ୍ଥିର ବିମାନ ଟର୍ବାଇନ୍ ଇନ୍ଧନ (ATF) ମୂଲ୍ୟ ହେତୁ ବିମାନ କମ୍ପାନୀଗୁଡ଼ିକୁ କ୍ଷତିରୁ ରକ୍ଷା କରିବା।