ୱାଶିଂଟନ: ମଧ୍ୟପ୍ରାଚ୍ୟରେ ଶାନ୍ତି ସ୍ଥାପନ ପାଇଁ ଚାଲିଥିବା ଆମେରିକା-ଇରାନ ଆଲୋଚନା ଏକ ନିର୍ଣ୍ଣାୟକ ପର୍ଯ୍ୟାୟରେ ପହଞ୍ଚିଥିବା ବେଳେ ଲେବାନନର ରାଜଧାନୀ ବୈରୁତ ଉପରେ ଇସ୍ରାଏଲର ଆକ୍ରମଣ ନୂଆ ସଙ୍କଟ ସୃଷ୍ଟି କରିଛି। ରବିବାର ହୋଇଥିବା ଏହି ଆକ୍ରମଣରେ ତିନି ଜଣଙ୍କ ମୃତ୍ୟୁ ଘଟିଥିବା ବେଳେ ୧୫ ଜଣ ଆହତ ହୋଇଛନ୍ତି। ଘଟଣା ପରେ ଇରାନ ତୀବ୍ର ପ୍ରତିକ୍ରିୟା ପ୍ରକାଶ କରିଥିବାରୁ ବହୁ ଚର୍ଚ୍ଚିତ ଶାନ୍ତି ଚୁକ୍ତି ଏବେ ଅନିଶ୍ଚିତତାରେ ପଡ଼ିଥିବା କୁହାଯାଉଛି।
ଇସ୍ରାଏଲ କହିଛି ଯେ, ହିଜବୋଲାର ଡ୍ରୋନ୍ ଆକ୍ରମଣର ପ୍ରତିଶୋଧ ସ୍ୱରୂପ ବୈରୁତରେ ଏହି ଅଭିଯାନ ଚାଲିଥିଲା। ତେବେ ଏହି ସମୟରେ ଆକ୍ରମଣକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅସନ୍ତୋଷ ପ୍ରକାଶ କରିଛନ୍ତି।
ସୋସିଆଲ ମିଡିଆରେ ଟ୍ରମ୍ପ କହିଛନ୍ତି ଯେ ବୈରୁତ ଉପରେ ଆକ୍ରମଣ ଏପରି ଏକ ସମୟରେ ହୋଇଛି, ଯେତେବେଳେ ଆମେରିକା ଓ ଇରାନ ଏକ ଐତିହାସିକ ଶାନ୍ତି ଚୁକ୍ତିର ବହୁତ ନିକଟରେ ଥିଲେ। ସେ କହିଛନ୍ତି, ଇସ୍ରାଏଲର ଆତ୍ମରକ୍ଷାର ଅଧିକାର ଥିଲେ ମଧ୍ୟ ଏହି ପ୍ରତିଶୋଧମୂଳକ ଆକ୍ରମଣ “ଛୋଟ ଓ ଅର୍ଥହୀନ” ଘଟଣାର ପ୍ରତିକ୍ରିୟା ଥିଲା ଏବଂ ଏହା ଶାନ୍ତି ପ୍ରକ୍ରିୟାକୁ ବାଧା ଦେବା ଉଚିତ୍ ନୁହେଁ।
ଟ୍ରମ୍ପ ଆହୁରି କହିଛନ୍ତି ଯେ ଲେବାନନ ସମେତ ସମଗ୍ର ଅଞ୍ଚଳରେ ଶାନ୍ତି ଓ ସ୍ଥିରତା ଆଣିପାରିବା ଭଳି ଏକ ଚୁକ୍ତିର ଅତ୍ୟନ୍ତ ନିକଟରେ ସମସ୍ତ ପକ୍ଷ ପହଞ୍ଚିଛନ୍ତି। ସେ ଇସ୍ରାଏଲକୁ ଲେବାନନରେ ଆଉ କୌଣସି ଆକ୍ରମଣ ନ କରିବାକୁ ଏବଂ ହିଜବୋଲାକୁ ମଧ୍ୟ ଇସ୍ରାଏଲ ବିରୋଧରେ କାର୍ଯ୍ୟାନୁଷ୍ଠାନରୁ ବିରତ ରହିବାକୁ ଆହ୍ୱାନ ଜଣାଇଛନ୍ତି।
ବୈରୁତ ଆକ୍ରମଣ ପରେ ଇରାନର ଶୀର୍ଷ ନେତୃତ୍ୱ ଓ ଆଲୋଚକମାନେ କଡ଼ା ମନୋଭାବ ଦେଖାଇଛନ୍ତି। ଇରାନ ପକ୍ଷରୁ କୁହାଯାଇଛି ଯେ ଏହି ଘଟଣା ଆମେରିକାର ପ୍ରତିବଦ୍ଧତା ଉପରେ ପ୍ରଶ୍ନ ଉଠାଉଛି ଏବଂ ଚୁକ୍ତିକୁ ଆଗକୁ ନେବା କଷ୍ଟକର ହୋଇପାରେ। କିଛି ଇରାନୀ ନେତା ଆକ୍ରମଣର ପ୍ରତିଶୋଧ ନେବାକୁ ମଧ୍ୟ ଚେତାବନୀ ଦେଇଛନ୍ତି।
ସୂତ୍ର ଅନୁଯାୟୀ, ଇରାନ ଏପର୍ଯ୍ୟନ୍ତ ପ୍ରସ୍ତାବିତ ଚୁକ୍ତିକୁ ଚୂଡ଼ାନ୍ତ ଅନୁମୋଦନ ଦେଇନାହିଁ ଏବଂ ବୈରୁତ ଘଟଣା ପରେ ଆଲୋଚନା ପ୍ରକ୍ରିୟାରେ ବିଳମ୍ବ ହେବାର ଆଶଙ୍କା ସୃଷ୍ଟି ହୋଇଛି।
ବିଶ୍ଳେଷକମାନଙ୍କ ମତରେ, ବୈରୁତ ଉପରେ ଏହି ଆକ୍ରମଣ କେବଳ ଲେବାନନ-ଇସ୍ରାଏଲ ତଣାଟଣିକୁ ନୁହେଁ, ବରଂ ଇରାନ-ଆମେରିକା ସମ୍ପର୍କର ଭବିଷ୍ୟତକୁ ମଧ୍ୟ ପ୍ରଭାବିତ କରିପାରେ। ଯଦି ଉଭୟ ପକ୍ଷ ଆଲୋଚନା ଟେବୁଲକୁ ଫେରିନଥାନ୍ତି, ତେବେ ସମଗ୍ର ମଧ୍ୟପ୍ରାଚ୍ୟରେ ଅସ୍ଥିରତା ଆହୁରି ବଢ଼ିପାରେ।