ପାଟନା: NEET UG ପୁନଃପରୀକ୍ଷାକୁ ନେଇ ପୁଣି ଥରେ ସାମ୍ନାକୁ ଆସିଛି ଏକ ଚାଞ୍ଚଲ୍ୟକର ଜାଲିଆତି ଘଟଣା। ପେପର ଲିକ୍ ବିବାଦ ପରେ ଆୟୋଜିତ ପୁନଃପରୀକ୍ଷାରେ ମଧ୍ୟ ଠକେଇ ଚକ୍ର ସକ୍ରିୟ ଥିବା ଜଣାପଡ଼ିଛି। ବିହାରର ଲଖିସରାଇ ଜିଲ୍ଲାରେ ପୋଲିସ ଏକ ବଡ଼ ‘ସଲଭର ଗ୍ୟାଙ୍ଗ’ର ପର୍ଦ୍ଦାଫାସ କରି ୯ ଜଣ ନକଲି ପ୍ରାର୍ଥୀଙ୍କୁ ଗିରଫ କରିଛି। ସବୁଠାରୁ ଚମକପ୍ରଦ କଥା ହେଉଛି, ଗିରଫ ହୋଇଥିବା ଅଭିଯୁକ୍ତମାନଙ୍କ ମଧ୍ୟରେ ଡାକ୍ତର ଏବଂ ପ୍ରସିଦ୍ଧ ମେଡିକାଲ୍ କଲେଜର MBBS ଛାତ୍ର ମଧ୍ୟ ରହିଛନ୍ତି।
ରବିବାର ଆୟୋଜିତ NEET UG ପୁନଃପରୀକ୍ଷାରେ ୨୦ ଲକ୍ଷରୁ ଅଧିକ ପରୀକ୍ଷାର୍ଥୀ ଅଂଶଗ୍ରହଣ କରିଥିଲେ। ଏହି ସମୟରେ ଲଖିସରାଇର ବିଭିନ୍ନ ପରୀକ୍ଷା କେନ୍ଦ୍ରରେ ବାୟୋମେଟ୍ରିକ୍ ଯାଞ୍ଚ ବେଳେ ସନ୍ଦେହ ସୃଷ୍ଟି ହୋଇଥିଲା। ଯାଞ୍ଚ ପରେ ଜଣାପଡ଼ିଥିଲା ଯେ କିଛି ବ୍ୟକ୍ତି ପ୍ରକୃତ ପରୀକ୍ଷାର୍ଥୀଙ୍କ ବଦଳରେ ନକଲି ପ୍ରାର୍ଥୀ ଭାବେ ପରୀକ୍ଷା ଦେଉଥିଲେ।
ପୋଲିସ ସୂଚନା ଅନୁଯାୟୀ, କେନ୍ଦ୍ରୀୟ ବିଦ୍ୟାଳୟରୁ ୭ ଜଣ, କେଆରକେ ହାଇସ୍କୁଲରୁ ଜଣେ ଏବଂ ହସନପୁର ହାଇସ୍କୁଲରୁ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି।
ତଦନ୍ତରୁ ଜଣାପଡ଼ିଛି ଯେ ଗିରଫ ହୋଇଥିବା କିଛି ଅଭିଯୁକ୍ତ ପ୍ରସିଦ୍ଧ ମେଡିକାଲ୍ କଲେଜର MBBS ଛାତ୍ର ହୋଇଥିବାବେଳେ କିଛି ଜଣ ପୂର୍ବରୁ ଡାକ୍ତରୀ ପେଶାରେ ରହିଛନ୍ତି। ଅଭିଯୋଗ ଅନୁସାରେ, ସେମାନଙ୍କୁ ମୋଟା ଅର୍ଥର ବିନିମୟରେ ଅନ୍ୟ ପରୀକ୍ଷାର୍ଥୀଙ୍କ ସ୍ଥାନରେ ବସାଯାଇଥିଲା।
ଏହି ଘଟଣା ପୁଣିଥରେ ପ୍ରତିଯୋଗିତାମୂଳକ ପରୀକ୍ଷାର ସ୍ୱଚ୍ଛତା ଓ ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠାଇଛି।
ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ପରୀକ୍ଷା କେନ୍ଦ୍ରରେ ବାୟୋମେଟ୍ରିକ୍ ଯାଞ୍ଚ ପାଇଁ ନିଯୁକ୍ତ ଘରୋଇ ସଂସ୍ଥାର ୭ ଜଣ କର୍ମଚାରୀଙ୍କୁ ମଧ୍ୟ ଅଟକ ରଖାଯାଇଛି। ଏହି ଜାଲିଆତିରେ ସେମାନଙ୍କ କୌଣସି ଭୂମିକା ଥିଲା କି ନାହିଁ, ତାହାକୁ ନେଇ ପୋଲିସ ପଚରାଉଚରା ଚଳାଇଛି।
ପ୍ରାଥମିକ ତଦନ୍ତରୁ ଏହା ଏକ ଆନ୍ତଃ-ଜିଲ୍ଲା ଏବଂ ଆନ୍ତଃ-ରାଜ୍ୟ ସଲଭର ଗ୍ୟାଙ୍ଗ ହୋଇପାରେ ବୋଲି ସନ୍ଦେହ କରାଯାଉଛି। ଗିରଫ ଅଭିଯୁକ୍ତମାନେ ବିହାର ବାହାରର ବିଭିନ୍ନ ରାଜ୍ୟ ଓ ଜିଲ୍ଲାର ବାସିନ୍ଦା ହୋଇଥିବା ଜଣାପଡ଼ିଛି।
ଜିଲ୍ଲାପାଳ ଶୈଳେନ୍ଦ୍ର କୁମାର ଏବଂ ପୋଲିସ ଅଧୀକ୍ଷକ ପ୍ରେରଣା କୁମାରଙ୍କ ତତ୍ତ୍ୱାବଧାନରେ SDM ଓ SDPOଙ୍କ ନେତୃତ୍ୱରେ ଗଠିତ ସ୍ୱତନ୍ତ୍ର ଟିମ୍ ବର୍ତ୍ତମାନ ଏହି ଚକ୍ରର ଅନ୍ୟ ସଦସ୍ୟଙ୍କୁ ଖୋଜୁଛି।
ପେପର ଲିକ୍ ବିବାଦ ପରେ ପୁନଃପରୀକ୍ଷା ଆୟୋଜନ କରାଯାଇଥିଲା। କିନ୍ତୁ ପୁନଃପରୀକ୍ଷାରେ ମଧ୍ୟ ଏଭଳି ଜାଲିଆତି ସାମ୍ନାକୁ ଆସିବା ପରେ NEET ପରୀକ୍ଷା ପ୍ରକ୍ରିୟାର ବିଶ୍ୱସନୀୟତା ଓ ସୁରକ୍ଷା ବ୍ୟବସ୍ଥାକୁ ନେଇ ପୁଣିଥରେ ଗଭୀର ପ୍ରଶ୍ନ ଉଠିଛି।