ଭୁବନେଶ୍ୱର: ପ୍ରଯୁକ୍ତିବିଦ୍ୟା ଆଧାରିତ ରେଳ ସୁରକ୍ଷା ଓ ନିରାପତ୍ତା ଦିଗରେ ନିଜର ଯାତ୍ରା ଜାରି ରଖି ପୂର୍ବତଟ ରେଳପଥ ଏହାର ସୀମା ମଧ୍ୟରେ ଥିବା ସମ୍ବେଦନଶୀଳ ସ୍ଥାନଗୁଡିକରେ ୫୦୦ରୁ ଅଧିକ ସୌରଶକ୍ତି ଚାଳିତ ସିସିଟିଭି (CCTV) କ୍ୟାମେରା ସଫଳତାର ସହ ସ୍ଥାପନ କରିଛି। ଏହି ସଫଳତା ରେଳ ଚଳାଚଳ, ରେଳ ସମ୍ପତ୍ତି ଏବଂ ଯାତ୍ରୀମାନଙ୍କର ନିରାପତ୍ତା ଓ ସୁରକ୍ଷା ସୁନିଶ୍ଚିତ କରିବା ସହ ନଜର ରଖିବା ବ୍ୟବସ୍ଥାକୁ ଅଧିକ ଦୃଢ଼ କରିବା ପାଇଁ ପୂର୍ବତଟ ରେଳପଥର ପ୍ରତିବଦ୍ଧତାକୁ ଦର୍ଶାଉଛି।
ଷ୍ଟେସନ ପରିସର, ଲେଭଲ କ୍ରସିଂ, ମାର୍ଶାଲିଂ ୟାର୍ଡ, ବ୍ରିଜ୍, ନିଛାଟିଆ ରେଳ ଧାରଣା ଏବଂ ଜୋନ୍ର ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନ ସମେତ ବିପଦପୂର୍ଣ୍ଣ ତଥା ସମ୍ବେଦନଶୀଳ ସ୍ଥାନଗୁଡ଼ିକରେ ରଣନୀତିକ ଭାବେ ଏହି କ୍ୟାମେରାଗୁଡ଼ିକ ସ୍ଥାପନ କରାଯାଇଛି। ସମ୍ପୂର୍ଣ୍ଣ ଭାବେ ସୌରଶକ୍ତି ଦ୍ୱାରା ପରିଚାଳିତ ଏହି ଅତ୍ୟାଧୁନିକ ସିସିଟିଭି ବ୍ୟବସ୍ଥା ବିନା କୌଣସି ବାଧାରେ ୨୪ ଘଣ୍ଟା ନଜର ରଖିବାର ସୁବିଧା ପ୍ରଦାନ କରୁଛି।
ଏହି ସୌରଶକ୍ତି ଚାଳିତ ସିସିଟିଭି କ୍ୟାମେରାଗୁଡ଼ିକର ବ୍ୟାପକ ସ୍ଥାପନ ଫଳରେ ରେଳ ଭିତ୍ତିଭୂମି ଏବଂ ଟ୍ରେନ୍ ଚଳାଚଳ ଉପରେ ନଜର ରଖିବା କ୍ଷମତା ଯଥେଷ୍ଟ ବୃଦ୍ଧି ପାଇଛି। ଏହି ରିଅଲ୍-ଟାଇମ୍ (ତତ୍କାଳୀନ) ସିସିଟିଭି ବ୍ୟବସ୍ଥା ରେଳ ଅଧିକାରୀ ଏବଂ ସୁରକ୍ଷା ସଂସ୍ଥାଗୁଡ଼ିକୁ ବେଆଇନ ପ୍ରବେଶ, କେବୁଲ୍ ଚୋରି, ଭଙ୍ଗାରୁଜା, ପଥର ମାଡ଼ ଏବଂ ଅନ୍ୟାନ୍ୟ ବେଆଇନ କାର୍ଯ୍ୟକଳାପକୁ ରୋକିବା ଓ ଚିହ୍ନଟ କରିବାରେ ସାହାଯ୍ୟ କରୁଛି। ରେକର୍ଡ ହୋଇଥିବା ଫୁଟେଜ୍ର ଉପଲବ୍ଧତା ତୁରନ୍ତ ତଦନ୍ତ, ଶୀଘ୍ର ପ୍ରତିକ୍ରିୟା ଏବଂ ପ୍ରଭାବଶାଳୀ ଭାବେ ନିୟମ ଲାଗୁ କରିବାରେ ସହଯୋଗ କରୁଛି, ଯାହାଦ୍ୱାରା ସୁରକ୍ଷା ଏବଂ କାର୍ଯ୍ୟଦକ୍ଷତାରେ ସୁଧାର ଆସୁଛି।
ରେଳ ଚଳାଚଳ ପାଇଁ ଆଧୁନିକ, ସ୍ଥାୟୀ ଏବଂ ପରିବେଶ ଅନୁକୂଳ ପ୍ରଯୁକ୍ତିବିଦ୍ୟା ଗ୍ରହଣ କରିବା ଦିଗରେ ପୂର୍ବତଟ ରେଳପଥର ନିରନ୍ତର ପ୍ରୟାସର ଏହା ଏକ ଅଂଶ ବିଶେଷ। ଅକ୍ଷୟ ସୌରଶକ୍ତିର ବ୍ୟବହାର କରି ଏହି ସିସିଟିଭି ନେଟୱାର୍କ ଖୁବ୍ କମ୍ ରକ୍ଷଣାବେକ୍ଷଣ ଏବଂ ବିନା କୌଣସି ବିଦ୍ୟୁତ୍ ଖର୍ଚ୍ଚରେ କାମ କରେ, ଯାହା ଏହି ବ୍ୟବସ୍ଥାକୁ ଉଭୟ ସ୍ୱଳ୍ପ ଖର୍ଚ୍ଚୀ ଏବଂ ପରିବେଶ ଅନୁକୂଳ କରିପାରିଛି।
ଏହି ସଫଳତାକୁ ଆଧାର କରି, ପୂର୍ବତଟ ରେଳପଥ ଅକ୍ଟୋବର ୨୦୨୬ ସୁଦ୍ଧା ୨,୦୦୦ରୁ ଅଧିକ ସୌରଶକ୍ତି ଚାଳିତ ସିସିଟିଭି କ୍ୟାମେରା ସ୍ଥାପନ କରିବା ପାଇଁ ଏକ ବଡ଼ ଲକ୍ଷ୍ୟ ଧାର୍ଯ୍ୟ କରିଛି। ବର୍ତ୍ତମାନର ଦ୍ରୁତ କାର୍ଯ୍ୟକାରିତାକୁ ଦେଖିଲେ, ପୂର୍ବତଟ ରେଳପଥ ଭାରତୀୟ ରେଳବାଇର ପ୍ରଥମ ଜୋନ୍ ଭାବେ ଏହି ସଫଳତା ହାସଲ କରିବାକୁ ଯାଉଛି, ଯାହା ପ୍ରଯୁକ୍ତିବିଦ୍ୟା ଆଧାରିତ ରେଳ ସୁରକ୍ଷା ଏବଂ ନିରାପତ୍ତା କ୍ଷେତ୍ରରେ ଏକ ନୂଆ ମାଇଲଖୁଣ୍ଟ ସ୍ଥାପନ କରିବ।
‘ବିକଶିତ ଭାରତ-୨୦୪୭’ର ବ୍ୟାପକ ଉଦ୍ଦେଶ୍ୟ ଅଧୀନରେ ଏକ ସୁରକ୍ଷିତ, ସ୍ମାର୍ଟ ଏବଂ ସ୍ଥାୟୀ ରେଳ ନେଟୱାର୍କ ପାଇଁ ଭାରତ ସରକାରଙ୍କ ଦୂରଦୃଷ୍ଟି ସହ ଏହି ପଦକ୍ଷେପ ସମ୍ପୂର୍ଣ୍ଣ ଅନୁକୂଳ ଅଟେ।