ରଣପୁର: ପବିତ୍ର ଦେବସ୍ନାନ ପୂର୍ଣ୍ଣିମା ପରେ ଆଜିଠାରୁ ଶ୍ରୀଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କ ପଟି ଦିଅଁ ଦର୍ଶନ ଆରମ୍ଭ ହୋଇଛି। ସ୍ନାନଯାତ୍ରା ପରେ ମହାପ୍ରଭୁ ଅଣସରରେ ରହୁଥିବାରୁ ସାଧାରଣ ଭକ୍ତମାନେ ଶ୍ରୀ ବିଗ୍ରହଙ୍କ ପ୍ରତ୍ୟକ୍ଷ ଦର୍ଶନ ପାଇପାରୁ ନାହାନ୍ତି। ଏହି ସମୟରେ ଭକ୍ତଙ୍କ ଦର୍ଶନ ନିମନ୍ତେ ପାରମ୍ପରିକ ଭାବେ ପଟି ଦିଅଁଙ୍କୁ ପୂଜା ଓ ଦର୍ଶନ କରାଯାଏ।
ରାଜ ଅମଳରୁ ଚିତ୍ରକର ସେବାୟତମାନେ ଏହି ପବିତ୍ର ପରମ୍ପରାକୁ ନିଷ୍ଠାର ସହ ପାଳନ କରିଆସୁଛନ୍ତି। ଠାକୁରଙ୍କ ପାରମ୍ପରିକ ଚିତ୍ରକାର ଦୁର୍ଗା ପ୍ରସାଦ ମହାପାତ୍ର ଓ ସତ୍ୟ ନାରାୟଣ ମହାପାତ୍ର ଶୁଦ୍ଧପୁତ ଭାବେ ଅଁଳା ନବମୀ ଠାରୁ ତିଆରି କରି ଆସୁଥିଲେ। ତିନୋଟି ପଟ୍ଟଚିତ୍ରରେ ଶ୍ରୀବଳଭଦ୍ରଙ୍କୁ ଅନନ୍ତ ବାସୁଦେବ, ଦେବୀ ସୁଭଦ୍ରାଙ୍କୁ ଭୁବନେଶ୍ୱରୀ ଏବଂ ଶ୍ରୀଜଗନ୍ନାଥଙ୍କୁ ଯଜ୍ଞ ଶ୍ରୀ ନୀଳମାଧଵ ବେଶରେ ପୂଜା କରାଯାଇଥାଏ। ଏହି ପଟି ଦିଅଁଙ୍କୁ ଅଣସର କାଳରେ ମନ୍ଦିରରେ ସ୍ଥାପନ କରି ନିୟମିତ ନୀତିକାନ୍ତି କରାଯାଏ।
ଧାର୍ମିକ ବିଶ୍ୱାସ ଅନୁଯାୟୀ, ଅନବସର ସମୟରେ ପଟି ଦିଅଁଙ୍କ ଦର୍ଶନ କଲେ କୋଟି ଜନ୍ମର ପୁଣ୍ୟ ଲାଭ ହୁଏ। ଏହି ପବିତ୍ର ଦର୍ଶନ ପାଇଁ ଆଜିଠାରୁ ବହୁ ସଂଖ୍ୟାରେ ଭକ୍ତଙ୍କ ସମାଗମ ଦେଖିବାକୁ ମିଳିଛି। ଏହି ପ୍ରାଚୀନ ପରମ୍ପରା ଆଜି ମଧ୍ୟ ଭକ୍ତି, ଆସ୍ଥା ଓ ସାଂସ୍କୃତିକ ଐତିହ୍ୟର ଏକ ଅନନ୍ୟ ନିଦର୍ଶନ ହୋଇ ରହିଛି।