ପୁରୀ: ଆସନ୍ତା ଗୁରୁବାର ଅନୁଷ୍ଠିତ ହେବାକୁ ଥିବା ବିଶ୍ୱ ପ୍ରସିଦ୍ଧ ରଥଯାତ୍ରା ପାଇଁ ପୁରୀରେ ବ୍ୟାପକ ଟ୍ରାଫିକ ପରିଚାଳନା ବ୍ୟବସ୍ଥା କରାଯାଇଛି। ଚଳିତ ବର୍ଷ ପ୍ରଯୁକ୍ତି ଆଧାରିତ ଟ୍ରାଫିକ ପରିଚାଳନାକୁ ସର୍ବାଧିକ ଗୁରୁତ୍ୱ ଦିଆଯାଇଛି। ୬ଟି ନୂଆ ପାର୍କିଂ ସ୍ଥାନକୁ ମିଶାଇ ମୋଟ ୩୦ଟି ପାର୍କିଂ ବ୍ୟବସ୍ଥା କରାଯାଇଥିବା ବେଳେ ୪ଟି ସ୍ୱତନ୍ତ୍ର ବସ୍ ପାର୍କିଂ ଜୋନ୍ ରହିଛି। ୩ଟି ସ୍ଥାନରେ ଡ୍ରୋନ୍ ମାଧ୍ୟମରେ ଟ୍ରାଫିକ ଉପରେ ନଜର ରଖାଯିବ।
ଏଥିସହ ଏଆଇ ଆଧାରିତ ଚାଟବଟ୍, ଟ୍ରାଫିକ ମୋବାଇଲ୍ ଆପ୍, ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଓ ସିସିଟିଭି ବ୍ୟବସ୍ଥା କରାଯାଇଛି। ବର୍ଷା ଋତୁକୁ ଦୃଷ୍ଟିରେ ରଖି ପାର୍କିଂ ସ୍ଥାନଗୁଡ଼ିକରେ ଜଳ ଜମିବା ସମସ୍ୟା ଦୂର କରିବା ପାଇଁ ଡି-ୱାଟରିଂ ପମ୍ପ ଲଗାଯାଇଛି। ସହରରେ ହଜାରରୁ ଅଧିକ ସୂଚନା ଫଳକ, ୭୩ଟି ଟ୍ରାଫିକ ସହାୟତା କେନ୍ଦ୍ର ଏବଂ ୨ଟି ଏଲଇଡି ମୋବାଇଲ୍ ଭ୍ୟାନ୍ ଭକ୍ତମାନଙ୍କୁ ଯାତାୟାତ ସୂଚନା ଓ ସହାୟତା ପ୍ରଦାନ କରିବ।