ପାରଳାଖେମୁଣ୍ଡି: ଗଜପତି ଜିଲ୍ଲାବାସୀଙ୍କ ଦୀର୍ଘଦିନର ସ୍ୱପ୍ନ ସାକାର ହେବାକୁ ଯାଉଛି। ଦକ୍ଷିଣ ଓଡ଼ିଶାର ପ୍ରମୁଖ ରେଳ କେନ୍ଦ୍ର ପାରଳାଖେମୁଣ୍ଡି ଷ୍ଟେସନର କାୟାକଳ୍ପ ବଦଳି ଯାଇଛି। କେନ୍ଦ୍ର ସରକାରଙ୍କ ‘ଅମୃତ ଭାରତ ଷ୍ଟେସନ ଯୋଜନା’ରେ ପ୍ରାୟ ୧୭ କୋଟି ଟଙ୍କା ବ୍ୟୟରେ ନିର୍ମିତ ଏହି ଅତ୍ୟାଧୁନିକ ଷ୍ଟେସନର ସମସ୍ତ କାର୍ଯ୍ୟ ଶେଷ ହୋଇଛି।
ଏହି ନୂତନ ଷ୍ଟେସନର ସବୁଠାରୁ ବଡ଼ ଆକର୍ଷଣ ହେଉଛି ଏହାର ଭବ୍ୟ ସ୍ଥାପତ୍ୟ। ପାରଳାଖେମୁଣ୍ଡିର ପ୍ରସିଦ୍ଧ ଗଜପତି ରାଜପ୍ରାସାଦର ମଡେଲ୍ରେ ଏହି ନୂଆ ଷ୍ଟେସନ ଗୃହକୁ ତିଆରି କରାଯାଇଛି, ଯାହା ଅଞ୍ଚଳର ରାଜକୀୟ ଇତିହାସକୁ ମନେ ପକାଇ ଦେଉଛି। ଷ୍ଟେସନ ଭିତରେ ବିଭିନ୍ନ ଚିତ୍ରକଳା ମାଧ୍ୟମରେ ସ୍ଥାନୀୟ ସଂସ୍କୃତିକୁ ସୁନ୍ଦର ଭାବେ ଦେଖାଯାଇଛି।
ଯାତ୍ରୀଙ୍କ ସୁବିଧା ପାଇଁ ଏଠାରେ ବିମାନବନ୍ଦର ଭଳି ବ୍ୟବସ୍ଥା କରାଯାଇଛି। ଭିଡ଼ ନିୟନ୍ତ୍ରଣ ପାଇଁ ୧୨ ମିଟର ଚଉଡ଼ାର ବିଶାଳ ପାଦଚଲା ଓଭରବ୍ରିଜ୍, ଆଧୁନିକ ପ୍ଲାଟଫର୍ମ ଶେଡ୍, ଆରାମଦାୟକ ପ୍ରଶସ୍ତ ଅପେକ୍ଷା ଗୃହ ଏବଂ ଖାଦ୍ୟପେୟ କେନ୍ଦ୍ର ସ୍ଥାପନ କରାଯାଇଛି। ସ୍ଥାନୀୟ କଳାକୃତିର ପ୍ରଚାର ପାଇଁ ଏଠାରେ ‘ୱାନ୍ ଷ୍ଟେସନ୍ ୱାନ୍ ପ୍ରୋଡକ୍ଟ’ ଷ୍ଟଲ୍ ମଧ୍ୟ ଖୋଲିଛି। ଯାତ୍ରୀଙ୍କ ସୁରକ୍ଷା ଲାଗି ସାରା ଷ୍ଟେସନରେ ସିସିଟିଭି କ୍ୟାମେରା ଓ ଅଗ୍ନିଶମ ବ୍ୟବସ୍ଥା ସହ ଟ୍ରେନ୍ ଚଳାଚଳ ସୂଚନା ପାଇଁ ଡିଜିଟାଲ୍ ବୋର୍ଡ ଲଗାଯାଇଛି।
ବିଶେଷ କରି ଭିନ୍ନକ୍ଷମ ବା ଦିବ୍ୟାଙ୍ଗ ଯାତ୍ରୀଙ୍କ ପାଇଁ ଷ୍ଟେସନକୁ ସମ୍ପୂର୍ଣ୍ଣ ସୁଗମ୍ୟ କରାଯାଇଛି। ସେମାନଙ୍କ ପାଇଁ ଲିଫ୍ଟ, ବ୍ରେଲି ମ୍ୟାପ୍, ସ୍ୱତନ୍ତ୍ର ଶୌଚାଳୟ ଏବଂ କମ୍ ଉଚ୍ଚତାର ଟିକେଟ୍ କାଉଣ୍ଟର କରାଯାଇଛି। ଏହା ସହିତ ପରିବେଶ ସୁରକ୍ଷା ପାଇଁ ସୌର ଶକ୍ତି ଏବଂ ବର୍ଷା ଜଳ ସଂରକ୍ଷଣର ବ୍ୟବସ୍ଥା ମଧ୍ୟ ରହିଛି। ସାରା ଓଡ଼ିଶାରେ ଚିହ୍ନଟ ହୋଇଥିବା ୫୯ଟି ଅମୃତ ଭାରତ ଷ୍ଟେସନ ମଧ୍ୟରୁ ପାରଳାଖେମୁଣ୍ଡିର ଏହି ନୂଆ ରୂପ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ପାରଳାଖେମୁଣ୍ଡି ରେଳ ଷ୍ଟେସନ ହେଉଛି ଓଡ଼ିଶାର ସେହି ୫୯ଟି ରେଳ ଷ୍ଟେସନ ମଧ୍ୟରୁ ଅନ୍ୟତମ, ଯାହାକୁ ‘ଅମୃତ ଭାରତ ଷ୍ଟେସନ ଯୋଜନା’ ଅଧୀନରେ କରାଯାଉଛି ଏବଂ ଏହା ସେହି ଷ୍ଟେସନଗୁଡ଼ିକ ମଧ୍ୟରୁ ଗୋଟିଏ, ଯାହାକୁ ୧୭ ଜୁଲାଇ ୨୦୨୬ରେ ମାନ୍ୟବର ପ୍ରଧାନମନ୍ତ୍ରୀ ଲୋକାର୍ପଣ କରିବେ।