ଭୁବନେଶ୍ବର: ସୁନ୍ଦରଗଡ଼ ଜିଲ୍ଲା ଲାଠିକଟା ବ୍ଲକ ହାତୀଅଡ଼ା ଗାଁରେ ଏକ ଅତ୍ୟନ୍ତ ଦୁର୍ଭାଗ୍ୟଜନକ ତଥା ଅଭାବନୀୟ ଘଟଣା ଘଟିଥିବା ସମ୍ପର୍କରେ ସୂଚନା ମିଳିଛି। ରିପୋର୍ଟ ଅନୁସାରେ ସୋମବାର ବିଳମ୍ବିତ ରାତିରେ ଦୁଇ କୋମଳମତୀ ଭାଇଭଉଣୀ (ସମୀର ହୋରୋ ଏବଂ ସାଇରନ୍ ହୋରୋ) ଙ୍କୁ ଏକ ବିଷଧର ସାପ ଦଂଶନ କରିବାରୁ ସେମାନଙ୍କ ମୃତ୍ୟୁ ହୋଇଛି। ପିଲାଦୁହେଁ ଖାଇପିଇ ଶୋଇପଡିଥିବା ସମୟରେ ହିଁ ସେମାନଙ୍କ ସହ ଏପରି ଘଟିଥିଲା। ପରେ ଏ ଘଟଣା ବିଷୟରେ ଅବଗତ ହୋଇ ଉଭୟ ଭାଇ ଭଉଣୀଙ୍କୁ ପରିବାର ଲୋକେ ରାଉରକେଲା ଆରଜିଏଚ୍ ହସ୍ପିଟାଲରେ ଭର୍ତ୍ତି କରିଥିଲେ ଯେଉଁଠାରେ ଉଭୟଙ୍କୁ ମୃତ ଡାକ୍ତର ଘୋଷଣା କରିଛନ୍ତି।
ମୃତ ଭଉଣୀ ଓ ଭାଇର ବୟସ ଯଥାକ୍ରମେ ୭ ଓ ୧୦ ବର୍ଷ ବୋଲି ଜଣାପଡ଼ିଛି। ଆଉ ଦିନ କେଇଟା ପରେ ରାକ୍ଷୀ ପୂର୍ଣ୍ଣିମା ପାଳିବାକୁ ନେଇ ଦୁଇ ପିଲା ବେଶ୍ ଖୁସି ଥିବା ବେଳେ ସର୍ପାଘାତରେ ଉଭୟଙ୍କ ମୃତ୍ୟୁ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି। ପରିବାର ଲୋକେ ମଧ୍ୟ ଏହି ଘଟଣାରେ ଗଭୀର ମର୍ମାହତ ହୋଇଛନ୍ତି। ଅନ୍ୟ ଏକ ରିପୋର୍ଟ ଅନୁସାରେ ଏହି ସୋମବାର ବିଳମ୍ବିତ ରାତିରେ ବଣାଇ ଅଞ୍ଚଳରେ ମଧ୍ୟ ସମାନ ଘଟଣା ଘଟିଛି। ରାତିରେ ଶୋଇଥିବା ଅଜା ନାତିଙ୍କୁ ଏକ ବିଷଧର ସାପ କାମୁଡ଼ିବାରୁ ଉଭୟ ପ୍ରାଣ ହରାଇଛନ୍ତି। ପ୍ରଥମେ ସେମାନଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲେ ମଧ୍ୟ ସେଠାରେ ଡାକ୍ତର ଉଭୟ ଅଜା ଓ ନାତିଙ୍କୁ ମୃତ ଘୋଷଣା କରିଛନ୍ତି।